Library · hlt

SIR 24

24:1 Cueihnah tah amah uem uh tih, a pilnam lakli ah a thangpomnah a thui. 24:2 Khohni kah hlangping taengah a ka a ang tih, A caempuei taengah khaw a thangpomnah a thui. 24:3 “Kai tah Khohni ka dong lamloh ka thoeng tih, Diklai te khonuei bangla ka dah. 24:4 Vaan sosang ah ka om tih, Ka ngolkhoel khaw vaan bangyai soah om. 24:5 Vaan bangyai khaw ka hil coeng tih, Tangrhom kah a dungnah khaw a pha coeng. 24:6 Tuitunli kah tuiphu so neh, diklai hmai boeih ah khaw, Pilnam neh namtom boeih soah khaw docanah ka khueh. 24:7 Te rhoek boeih soah duemnah ka tlap, U kah khohmuen ah tim ka rhaehrhong la ve? 24:8 Hno cungkuem aka suenkung loh ol m'paek coeng, Kai aka suenkung loh ka dap hmuen khaw a coelh. Na rhaehnah hmuen te Jakob taengah khueh lamtah Israel khuikah loh na rho pang saeh. 24:9 Khosuen hlan kah, a tongcuek vaengah kai n'suen coeng Kum hal duela ka paa tlaih voel mahpawh. 24:10 A dap cim kah a mikhmuh ah ka tho ka tat tih, Kai he Zion ah n'thoh coeng. 24:11 Ngaihom khopuei ah kai he duemnah n'paek, Te dongah Jerusalem tah ka khohung la poeh. 24:12 Hinyah kap pilnam lakli ah khaw, Boeipa kah khoyo neh a rho lakli ah yung ka hlak. 24:13 Lebanon tlang kah lamphai thing neh, Hermon tlang sang kah ta-aw thing bangla ka rhoeng. 24:14 Engedi kah rhophoeng kung bangla, Jerikho kah rose rhaipai bangla, Lohma li kah olive thing hloe bangla, tui kaeng kah kolvan thing bangla yol ka rhoeng. 24:15 Yungum thing neh hlingtui bangla ka ul tih, Myrrh thinghloe bangla ka hmuehmuei khaw tui. tlang sungsin, khawphlawp, aangpi, dap khuikah hmuehmuei botui van pawn ni. 24:16 Terebinth bangla ka hlaeng ka phuel tih, ka hlaeng tah thangpomnah neh sitlohnah la om. 24:17 Misur bangla ka muem then coeng tih, Ka pailumnah khaw thangpomnah neh thaihsu la om. 24:18 Kai tah lungnah then, hinyahnah, mingnah, a cim ngaiuepnah kah manu la ka om. Kai ca rhoek a ming ka sui boeih te khaw, Amah loh ming a paek tangtae coeng ni. 24:19 Ka aka ngaih tah ka taengla ha lo uh, Ka thaih he a hah la ca uh. 24:20 Kai poekkoepnah he khotui lakah didip tih, Kai nan khuehnah te khoi litui lakah oi ngai. 24:21 Kai aka ca boeih tah a bung pong pawt vetih Kai aka o hlang tah a tui hal voel mahpawh. 24:22 Kai ol aka ngai tah yahpok pawt vetih, Kai taengah aka pongpa hlang tah tholh mahpawh. 24:23 He cabu dongkah he tah Khohni Pathen kah paipi ni, Te olkhueng te Moses loh mamih m'paek coeng, Te ni Jakob hlangping kah rho la aka om coeng. 24:24 Paa tlaih boeh Boeipa dongah namning sak, Amah taengla ka ben daengah ni n'thapoh eh. Pathen bueng tloengkhoel Boeipa coeng, A nih phoeiah tah khangkung a om moenih. 24:25 Te khaw cueihnah neh tah thaih cuek tue kah, Pishon neh Tigris tui bangla phul coeng. 24:26 Yakimingnah khaw Perath neh, cangah tue kah Jordan bangla long coeng. 24:27 Thuituennah tah cangkoei tue kah, Nal tuiva neh Gibon bangla phuet coeng. 24:28 Hlang lamhma long khaw cueihnah boeih ming pawt tih, a hnukkhueng long khaw a dungnah te pha pawh. 24:29 A poeknah te tuituenli lakah khaw puh tih, a cilsuep khaw tangrhom puei lakah khaw dung bal. 24:30 Kamah tah tuiva lamkah tuilong bangla, Dum khuikah tuilong tui bangla ka om, 24:31 Te dongah ka dum te ka suep vetih, Rhaipai thingkong te ka lae ni. A nunae, ka tuilong te tuiva la poeh, ka tuiva te tuitunli la poeh bal coeng. 24:32 Thuituennah te mincang khosae bangla ka khueh vetih, a hla lamkah khaw a ciping la ka khueh ni. 24:33 Tukilnah te tonghma ol bangla ka hawk vetih, hmailong kah cadilcahma boeih ham ka khueh pah ni. 24:34 Kai tah kamah bueng ham pawt tih, cueihnah aka tlap boeih ham ka thakthae he poek.