Library · hlt

SIR 48

48:1 Tonghma Elijah tah hmai bangla a thoeng, A olthui khaw hmaithoi bangla tak. 48:2 Amih soah khokhanah a pai sak tih, a kohlopnah loh amih a hlangmi a muei sak. 48:3 Boeipa ol rhangneh vaan khaw a biing tih, a rhaepthum la hmai a tlak sak. 48:4 Elijah nang tah na khuet tangkik, Na khoboe te khobae rhambae pawn ni. U kah thangpomnah longnim nang kah te a tluk. 48:5 Nang loh rhok te dueknah lamkah khaw, Saelkhui lamkh khaw, Khohni kah olka rhangneh na thoh coeng. 48:6 Manghai rhoek te cungkunah khuila na tueih tih, Mingthang hlang khaw a thingkong dongah na duek sak. 48:7 Sinai kah a honah neh Horeb kah, Tawnloh laitloeknah khaw na yaak. 48:8 Pilnam tholh thungnah aka khueh manghai hoek, nang aka pang ham tonghma rhoek khaw na koelh. 48:9 Nang tah hmai humhae neh, hmai marhang leng loh n'loh coeng. 48:10 A tue a pha vaengah thintoek thinsa neh, Pathen kah kosi aka paa sak hamla, A napa rhoek kah thinko te a ca rhoek taengah mael sak ham Jakob koca te thoh sak ham m'hmoel te a daek coeng. 48:11 Nang aka hmuh tih lungnah neh, aka thoeihcam rhoek tah a yoethen uh. Te dongah rhep ka hing uh van pawn ni. 48:12 Elijah te hmumha loh a cun vaengah, Elisha tah a mueihla neh baetawt, Miknoek khaw rhaepnit la muep a saii, a ka dongkah khobaerhambae la thoeng. Amah tue vaengah tah ukkung hmaiah khaw thuen pawt tih, u long khaw anih te hnaep thai tlaih moenih. 48:13 Anih ham tah a kuel a ka khaw om pawh, a duek phoeiah pataeng a rhok te tonghma pueng. 48:14 A hing vaengah kopoek rhai a saii tih A dueknah dongah khaw a khoboe te kopoek rhai la om. 48:15 Te lallah pataeng pilnam he yut pawt tih, a tholhnah te hnawt uh pawh. Amih te a khohmuen lamloh kutbuem la a poelyoe tih, diklai pum ah a thaek a yaak uh lalah khaw. Pilnam te hlangmi a yool bueng a paih uh tih, Daivi imkhui lamkah ukkung bueng te dawk om. 48:16 Hlangvang loh a thuem tah a saii, Tedae a tloe rhoek tah ta-aep, ta-aep tholh uh. 48:17 Hezekiah lo a khopuei te a cak sak tih, A tlaklung ah tui a loei. Lungpang khaw thicung neh a vueh tih, Tui hamla tui-im a saii. 48:18 Anih tue ah Sennakherib loh ram a muk pah, Te dongah rhalkap a tueih tih nong uh. A kuthluem neh Zion a tlai thil tih, a mangkhaknah neh hoem muep a sat. 48:19 Te dongah Israel tah a thinko tuen tih a kut thuen, Te vaengah huta bungltloh bangla kopang uh. 48:20 Tedae amih tah rhennah aka khueh Boeipa ni a khue uh Boeipa taengah ni a kut te a phuel uh. A Cim Pathen loh amih ol te vaan lamkah a yaak, Te dongah Isiah rhangneh amih te a loeih sak. 48:21 Boeipa loh Assyria kah rhaehhmuen te a tloek tih, A puencawn loh a mih te boeih a khoe. 48:22 Hezekiah loh Boeipa loh a ngaih te a saii tih, A napa David kah khosing te a cak la a khoem. Amah te a mangthuinah dongah uepomnah neh, a tanglue la aka om Isaiah loh rhep a uen coeng. 48:23 Isaiah tue vaengah khomik khaw a hnuk la mael, te dongah manghai kah a hinglung khaw a tom pah. 48:24 Mueihla thincaknah rhangneh hmailong khaw a hmuh tih, Zion kah rhungrhahnah te khaw koep a hloep. 48:25 A bawtnah tue mebang a thoeng ham khaw a phoe tih, Olhueng khaw a phoe hlanah boeih a thui.