Library · hlt

SIR 50

50:1 A manuca kah boeilu neh a pilnam kah oekpueinah, Khosoih boei Onias capa Simon, Amah tue vaengah im te a tlaih tih, amah tue vaengah bawkim te a cak sak. 50:2 Pangbueng a sang rhaepnip ham khoengim a tloeng tih, bawkim vongup ham vongtung te a khueh. 50:3 Anih tue vaengah tuito khaw a to, tui-im dongkah mah mah tuitunli bangla omthen. 50:4 A pilnam te pocinah khui lamloh metla hlawt ham khaw a poek, te dongah khopuei te tanglung neh a cak sak. 50:5 Pilnam loh anih boyong vaengah bahoeng a rhuepom, himbaiyan im lamkah puk aka thoeng bangla. 50:6 Khoboei soah aisi thuipa bang la, Khoning khotue vaengkah hla lum bangla, 50:7 Khohni bawkim dongah aka saeh khomik bangla, rhuepom khomai dongah aka yaal pampacung bangla, 50:8 Thaihcuek hnin kah rhaipai bangla, Sokca tuikaeng kah tuili pai bangla, Khohal tue kah Lebanon tlang ah aka daih bael hing bangla, 50:9 Botui bael dongkah hmai neh hmueihtui bangla, Sui a boh thil bael yak bangla, 50:10 A thaih loh a nan olive thing bangla, khomai aka tok hang hmaical thing bangla. 50:11 Thangpom himbai a bai vaengah, amah te rhuepom soep neh khuk uh. Hmueihtuk cim la a yoeng vaengah, rhokso tolhmuen te thangpomnah a khueh. 50:12 Khosoih kut dongah maehham a doe vaengah, hmueituk kah a lung ah pai. Te vaengah a taengvai kah manuca te rhaihulh bangla amah tah Lebanon kah lamphai thinghloe bangla om. Rhophoe kung bangla a vael uh bal. 50:13 A rhuepomnah khuiah Aaron koca rhoek om, a kut dongah Boeipa nawnnah te a khueh tih, Israel hlangping boeih kah hmai ah pai uh. 50:14 Hmueihtuk kah bibinah a coeng tih, Khohni tlungthang taengah nawnnah te soepsoei. 50:15 A kut te a yueng tih boengloeng a loh, Misur thii te tuisih la a doeng. Hmueihtuk kho te a bueih tih, Cungkuem kah manghai Khohni te hmueihtui a uem sak 50:16 Te vaengah Aaron koca rhoek yuhui tih, Thi neh a saii olueng te a ueng uh. Khohni hmai ah yaksaknah hamla ollen olthang a cai sak uh. 50:17 Te vaengah pilnam boeih te koe tingtun uh, a maelhmai te cirhong la a buluk uh tih, Khohni Pathen tlungthang, Amih kah Boeipa te a bawk uh. 50:18 Te phoeiah laasa rhoek loh Boeipa te a ol neh, olding olthen boeih neh a koeh uh. 50:19 Te vaengah pilnam boeih loh Boeipa Khohni Lungvat kung hmaiah thangthuinah te a nawn uh. Boeipa bawknah hmakhuen te a bawt hlan hil a thothuengnah te a soep sak uh. 50:20 Te phoeiah tah Simon te suntla a kut a phuel, Israel ca hlangping boeih soah te. Te phoeiah Boeipa kah yoethennah te aka neh a phong, Boeipa ming te thangpomnah a khueh. 50:21 Te dongah bawknah khuiah pabae la bakop uh tih, Khohni taeng lamkah yoethennah te a doe uh. 50:22 Cungkuem kah Pathen tah a yoethen pai saeh, Kho takuem ah kopoekrhai tangkik la bibi a saii. Ithang lamloh n'rhoengnah hil amah n'cuncah tih, a sitlohnah neh mamih taengah han saii. 50:23 Amah loh thiko kohoenah m'pae saeh lamtah, Mamih tue vaengah rhalmongnah om saeh. Khosue Israel tue vaengkah bangla. 50:24 A rhennah he mamih taengah han khueh saeh, mamih tue ah khaw amah loh n'loeih sak saeh. 50:25 Namtu panit tah ka hinglu loh a hnoel, a pathum kah tah pilnam voel moenih. 50:26 Te rhoek tah Seir neh Philistine kah khosa rhoek, Sekhem kah khosa pilnam hlang ang rhoek ni. 50:27 Yakmingnah neh mingnah dongah thuituennah te, He cabu dongah ka daek coeng. Jersalem kah Sirach koca Eleazar capa Jesuh he, amah lungbuei ah cueihnah a lun pah dongah ni. 50:28 He kah olkah amah aka ngaithuen tah a yeothen, a thinko ah aka rhaehrhong sak hlang cueih ni. 50:29 Te te vai hamla aka khueh rhoek tah, mebang hno dongah khaw vanat la om uh vetih, Boeipa rhihnah te amih kah namtlak la om ni.