SIR 6
6:1 Paya te rhal la lat khueh boeh, mingthae he khaw yahpohnah neh yan uh khoeng, Te dongah hlangtholh lai phae khaw te tlam ni a om.
6:2 Hoehhamnah khuiah khaw khak cungpung boeh, vaito bangla maehpoel la n'sah ve.
6:3 Na hnah te han luep vetih na thaih te ham phae ve, Te vaengah thing koh bangla nang n'hno hae ve.
6:4 Boethae kah hoehhamnah aka khueh a phae vetih, amih te a thunkha kah nueihbu la a poeh sak ni.
6:5 Ol then loh paya a ping sak tih, lai aka phaih loh boethen a yet sak.
6:6 Paya he na taengah muep om mai saeh, Tedae thawng khat dongah pakhat ni baerhoep la a om eh.
6:7 Paya la khueh na ngaih vaengah khaw, nuemnai lamtah khueh amih te cukhat la uepnah boeh.
6:8 Amih te paya lamkhaw boeih koih uh suidae, na patang tue ah tah nang n'om puei hae mahpawh.
6:9 Paya khaw thunkha la poeh vetih, tohhaemnah te rhaidaeng la a thui ni.
6:10 Na caboei aka vael na paya rhoek khaw, na ngaihmang tue vaengah tah pai hae mahpawh.
6:11 Na khueh na tawn vaengah tah na pum pabae la om vetih na tueiyoeih rhoek soah boei khaw a bi ni.
6:12 Tedae na tlak vaengah tah, nang taeng lamloh mael uh vetih, nang te n'thuh uh tak ni.
6:13 Na thunkha rhoek taeng lamloh lakhla khoem uh lamtah, na paya rhoek taengah khaw hueltue la ngaithuen.
6:14 Paya uepom tah hmuencak kah hlipyingnah la om tih, kawnthen aka hmuh rhoek bangla om.
6:15 Uepom paya tah a puehsoi la a phu om tih, U long khaw a phu a ting la thui thai mahpawh.
6:16 Paya he hingnah aka hlawt si la om tih, Boeipa aka rhih long ni te te a hm uh.
6:17 Boeipa aka rhih long tah paya khaw a then la a hoihaeng, amih vanbangla a imben soah khaw om.
6:18 Ka ca aw, na camoe lamkah toelnah te tuek lah, na sam a pok vaengah khaw cueihnah na dang pueng ni.
6:19 Te te lotawn cangtuh bangla ha thoeng tih, cangah tue then a lamtawn. Lo na phoh vaengah kolkalh tah na thakthae dae, a thaih te pahoi na caak pawn ni.
6:20 Te te bahoeng ngakyal ham khaw om dae, a taengah anglatnah a naeh thai moenih.
6:21 Te tah lungto aka rhih bangla a noem dongah, phawn a voeih ham te uelh mahpawh.
6:22 Cueihnah he a ming nen khaw a tluk dongah, muep a doe uh ham khaw sikim uh thai pawh.
6:23 Ka ca, hnatun lamtah, ka laitloeknah he doe lah, ka cilkhih he khaw hnawt boeh.
6:24 A khocin dongah na kho te thawt lamtah, a rhawnmoep dongah na rhawn te khueh lah.
6:25 Na laeng te duen lamtah amah te kawt lah, amah kah pinyennah khuiah khaw omdam boeh.
6:26 Na hinglu boeih neh amah te paan lah, na thaomnah boeih neh a longpuei te ngaithuen lah.
6:27 Khe lamtah tlap lah, na hmuhkoi la ha om bitni, amah te na tuuk coeng atah hlah voel boeh.
6:28 A hnukkhueng ah tah duemnah m'paek vetih, nang ham omngaihnah la poeh ni.
6:29 A palawm pataeng sui himbai la poeh tih, amah pinyinah khaw daidi haikang la poeh.
6:30 A rhoeplong tah sui thoeihcamnahnah la om tih, a haikang khaw daidi rhui bangla om.
6:31 Amah te thangpomnah hnikul la na bai vetih, amah te boeilennah rhuisam la na khuem bitni.
6:32 Na huem atah, ka ca nang te n'toel vetih, namah hamla na loh atah aka khuel la na om ni.
6:33 Hnatun hamla na lungnah van atah mingnah na dang vetih,
6:34 hna na kaeng van atah hlangcueih la na poeh ni.
6:35 Hingcim dongkah thuingongnah tah hnatun hamla sikim lamtah, hlangcueih kah thuidoeknah loh nang n'rhael boel saeh.
6:36 Lungming hlang te na hmuh atah yue thoo lamtah lai-om, na khopha te a kuihlak dongah daeptlawt saeh.
6:37 Boeipa kah olrhi te poek lamtah, a olpaek boeih khaw a tue takuem ah thuep lah. Amah loh na lungbuei kah hmuhmingnah m'paek vetih, cueihnah na hue te khaw m'paek bitni.