WIS 11
11:1 Amih kah bibi te cueihnah loh tonghma cim kah kut dongah a thaihtak sak.
11:2 Amih te khosoek khopong ah khaw cet uh tih, mingpawt hmuen ah a dap a tuk uh.
11:3 A thunkha khaw muk uh tih rhal khaw a tloek uh.
11:4 A halh uh vaengah namah te n'khue uh tih, lung ning loh a tuihalih khaw a rhaem sak.
11:5 Amah te nen te a thunkha rhoek dan a tat dae, A ngoe vaengah te nen te hoeikhangnah a dang.
11:6 Socak yueng la kumhal aka long tuiva te, thii neh na poek pah tih nu coeng.
11:7 Casen a ngawn te oltloeknah hamla na toel tih, Amih te buengrhuet la tui muep na paek.
11:8 A tuihalh tue vaengah a thunkha rhoe, Na toel pah te amih na hmuh sak.
11:9 A tawnba uh vaengah, sitlohnah neh amih hlinsai dongah, Lailak rhoek te kosi neh lai na tloek tih na phaep te a ming uh.
11:10 Amih te manu napa bangla na noemcai tih rhalrhing na paek dae, Lailak rhoek tah manghai mangkhak bangla tholh thungnah na khueh.
11:11 Yinhnuk yinhma ah khaw paepnah neh rhen om uh tih,
11:12 A nguekcoinah neh rhaepnit la om uh. Aka thoeng te a poeknah neh kopangnah la om.
11:13 Amamih kah dantatnah te a yaak uh vaengah, Hlangdueng loh hoeikhangnah a dang tih, Amih te Boeipa loh a sai coeng tila a hmuhming uh.
11:14 Lamhma vaengah amih te nueibu la a voeih uh, A vai uh tih a yan uh dongah A hnukkhueng la amah taengah aka thoeng te, ngaihmang khobing la om uh. Amih a halh uh vaengah khaw hlang dueng hamtah longpuei a tloe a khui pah coeng.
11:15 Hlang ang neh lailak kah poeknah te thuung hamla, amih loh rhul olmueh neh a hong rhamsa te bawk ham, Longphaelh la a mawt uh coeng. Te dongah amih te toel hamla mulhing te rhoepsaep la, Amih taengah na tueih pah.
11:16 Te dongah a tholhnah bang boeih la, thungnah khaw boeih om tite ming saeh.
11:17 Na dongah na kut tah a tha-om rhoe pai, Te nen ni pawmpam hno khui lamloh diklai na suen. Amih soah vom cako neh sathueng satlung hlah ham khaw Na vawt loengloeng moenih.
11:18 Muep aka phit ming mueh satlung khaw a thai la na suen Te bang te hmai hluei bangla phit tih, hmai puei bangla khu tih, A mik dong lamloh rhih om hmai aa te hli.
11:19 Mueirhih loh pilnam phae hamla a sai thai bueng kolla, amih mikhmuh kah a hiham nen mah a ngawn thai coeng.
11:20 Pilnam lamloh pakhat la a hil thoeng mai cakhaw, tiktamnah loh a hloem tih na thaomnah hil loh a haeh vaengah tah, A cungkuem he a hlangmi neh, cungnueh neh, a khiing neh na saekboe coeng.
11:21 Na sarhi he tah thaomnah a len la tueng ham om yoeyah tih Na ban dongkah thadueng te unim aka oel thai eh?
11:22 Diklai pum pataeng na hmaiah tah coi soikah cungcik bangla om tih, diklai dongah aka cip ming mincang buem tui bangla om.
11:23 Tedae a cungkuem na sai thai dongah, cungkuem taengah rhennah na khueh.
11:24 Aka om hno boeih he na lungnah tih, Na sai hno coeng he tah na tuei moenih. Na thinah hamla hno pakhat na moenih.
11:25 Na ngaih pawt koinih hno pakhat soah khaw na ueh mahpawh, Na hoep tangtae te na khue pawt koinih, metlam lae pakhat khaw a om pai eh.
11:26 Namah kah la a om dongah a cungkuem he a hlun, Aw Boeipa namah loh mulhing boeih he na lungnah.