WIS 18
18:1 Tedae na hlangcim rhoek ham vangnah a len om coeng, A thunkha rhoek loh a ol a yaak uh dae a muei hmu pawh, a patang uh pawt dongah yoethennah la a thui uh.
18:2 Na hlang cim rhoek tah uemonah neh om uh tih, tholh uh sitoe cakhaw amih taengah a tloh om pawh. Te vaengah amih taengah althanah a khueh te khawdawkngai hamla a bih uh.
18:3 Te dongah mingpawt longpuei ah na pilnam hoihaengkung la hmai tung aka vang te na paek. Khomik long do pawt tih omthennah yincaeh la poeh.
18:4 A thunkha rhoek tah hmaivang tal tih, hmaisuep kah thonglak nen ni a ting uh. Amih na ca rhoek te a kho tih thong a hlak uh, Na rhoek lamlong man diklai he olkhueng kah, vangnah aka duek tlaih pawt a paek suidae.
18:5 Na hlangcim kah camoe rhoek ngawn ham ol a tloek uh vaengah, camoe pakhat tah a voeih coeng dae koep a hlawt. Te dongah dantat hamla camoe muep na loh tih, amih te tuili neh rhenten na thup.
18:6 Tekah khoyin te a pa rhoek taengah oepsoeh na thui pah coeng, te dongah ni olhlo a ming rhep dongah a om ngaih uh, tekah a khuiah ni a pangtung uh rhoe pai.
18:7 Hlangdueng kah loeihnah neh a thunkha kah mitmoengnah khaw na pilnam loh a lamtawn rhoe pai.
18:8 Kaimih kah thunka rhoek na dan na tat van vaengah, kaimih tah na taengla nan khue tih nan thangpom.
18:9 Pilnam then kah camoe cim rhoek tah, a huep la hmueihhlutnah a nawn tih, Pathen olkhueng dongah pakhat la ko vai uh. Tedong hlangcim rhoek khaw amah tlam ni, yoethennah neh yoethaenah te a cut hmaih uh. Te vaengah a pa rhoek koehnah te aka hlai la om uh coeng.
18:10 Tedae a thunkha rhoek kah a pangnah tah haehum la hum coeng. a ca rhoek rhaengsaenah khaw lungma la khawk thang coeng.
18:11 Sal khaw a boei bangla dantatnah pakhat neh dan a tat, hlang thawt khaw manghai bangla sundaehnah rhenten a yook coeng.
18:12 Amih te dueknah pakhat te rhenten a paan uh dongah, a rhok te tae ham khaw yet aih. Amih up hamla ka hing khaw a rhoeh la om pawh, Ca a thintlonah koek khaw vaikhat la rhen a thup pah dongah.
18:13 Amih kah hnam bibinah rhangneh a cungkuem he, aka tangnah mueh hlang la om uh cakhaw, A caming a thup pah vaengah tah, na pilnam te Pathen ca ni tila a ming uh.
18:14 A cungkuem te suepduep loh mongtoe la a khuk vaengah, khoyin khaw a rhakthuem hil ngalh yong coeng.
18:15 Na ol tah vaan lamlong khaw, na boei ngolkhoel lamlong khaw aka poci khohmuen laklung ah, hlangtlung hlangrhalh bangla thaomnah neh coe.
18:16 Na olpaek then te, cunghang hat la a khuen tih pai coeng. Te vaengah hno cungkuem he dueknah baetawt. Diklai ah a pai vaengah khaw vaan a puet.
18:17 Vaikhat la rhihom mueimang kah huithuinah loh, amih te mat a hih tih rhihnah long buengrhuet a muk.
18:18 Te dongah hela khat, kela khat duek dalh la suvaih uh, Balae tih a duek uh ming ham a saii uh.
18:19 He dongah amih te mueimang loh a huek tih, a rhalrhing sak. Te dongah nih metla a patang khaw a ming mueh la a mitmoeng pawt eh.
18:20 Dueknah kawng long hlangduen khaw a ben tih, khosoek kah hlangping soah lucik khaw pai coeng, kosi tah phat a pha uh moenih.
18:21 Hlang cuem tah hlangtang la om ham khaw loe tih, thangthuinah, huithuinah neh botui te, a bibi dongkah thingthungnah la a khuen. Thintoek khaw a oel tih pocinah khaw a bawt sak vaengah na sal la a om khaw a tueng sak.
18:22 Khosi te pumsa thaomnah neh noeng pawt tih, caempuei caempa rhangnen bal moenih. Cunghang neh a rhal a hnah rhang nen moenih, a pa rhoek taengah na paek paipi neh olhlo a poek rhangnen ni.
18:23 Duek tih khat soah khat yalh tih a hmoek vaengah, anih loh a sim tih kosi koep a hlam pah dongah, hingnah longpuei te a tuk pah.
18:24 A himbai dung tah diklai pum kah mueimae la om tih, a pa rhoek kah thangpom nah te lungto rhui li dongah a tarhit. A lu dongkah rhuisam dongah na boeimangnah om coeng.
18:25 Te rhoek loh phaekkung khaw a hnah tih anih loh te te rhih. kosi ta a ten mailai ham mah rhoeh coeng.