WIS 2
2:1 A thae la a poek uh dongah ni Amamih te, “Mamih kah hingnah toi nih kothaenah bae,” a ti uh. Khosak a bawtnah a pha vaengah a hoeinah om pawh, Hell lamloh aka mael m'ming pakhat khaw om pawh.
2:2 A poeyoek kah thovaelnah loh a cun la n'om uh tih He lamlong tah aka noek pawt bangla n'ngai uh ni. Mamih hnarhong lamkah hil pataeng hmaikhum lamni a om.
2:3 He he a kum vaengah mamih pum tah hmaiphu la mael vetih, Mamih kah mueihla khaw hli hong bangla paal ni.
2:4 Mamih kah ning he khaw a tuetang neh a hnilh vetih mamih bibi he aka poek pakhat khaw om mahpawh. Mamih hingnah he khomong khomai bangla khum vetih, Khosae loh cingmai a hnawt vaengkah bangla, Kholing loh a huul bangla om ni.
2:5 Mamih kah a tue aitlaeng he khokhawn bangla la khum tih Mamih duemnah lamloh maelnah khaw om pawh.
2:6 Te dongah halo uh lamtah hno then aka om te uem uh sih, Camoe vaengah suentae rhoek te rhep hnonah sih.
2:7 Misurtui neh botui he a hah la o uh sih lamtah, Lomai rhaipai he mamih lamloh khum boel saeh.
2:8 Rhaimuep te a tloih hlan ah khuem uh pawn sih.
2:9 Mamih kah omngaihlawnnah he rhekrha ham mamih loh hlong boel sih. He tah mamih kah hamsum neh Mamih kah hmulung pai ni.
2:10 Khodaeng hlang dueng te hnaemtaek sih lamtah, Nuhma khaw hlun boel sih.
2:11 Tedae mamih kah tlungnah he mah olkhueng la om saeh A vawtnah long khaw a khala pawt ni a tueng sak.
2:12 Hlnag dueng te rhongngol neh rhing sih, Anih tah mamih ham rhalawt la om tih mamih khoboe khaw a tloelh. Olkhueng aka tloelh kah tholnah dongah mamih n'ho tih, Mamih kah thuituennah he tholhnah la a kamkaih.
2:13 Pathen mingnah aka khueh la a phong tih, Amah te Boeipa capa ni a ti.
2:14 Anih he mamih kah poeknah aka coel la om.
2:15 A mikhmuh kah boeih he mamih ham tah hnorhih la om A omih he a tloe kah bangla om pawt tih, a khosing khaw lang pai.
2:16 Anih ham tah maih a dangdik lamni n'ngaih, Mamih kah longpuei he tueilaeh koi bangla a rhael, A hnukkhueng la aka dueng kah a bawtnah tah omngaihnah a ti tih, Pathen tah a napa ni tila koevoei uh.
2:17 A ol te a thuem la om vetih so uh lah sih, Noem uh sih lamtah a hingnah a bawt vaengah mebang nim a thoeng ve.
2:18 Hlang dueng he Pathen ca la a om atah anih te a bom bitni, Aka daengdaeh kut lamlong khaw anih te a hlawt bitni.
2:19 Soehsalnah, phaepnah neh anih te noem uh lah sih, Te daengah ni boengai la a om khaw m ‘hmuh eh.
2:20 Yahpohnah, dueknah neh anih te hnael uh sih, A thui bangla anih te a hoeptlang bitni.
2:21 A poek uh dae amih a phaelh la a mawt coeng, a halangnah loh amih te mik a dael sak coeng.
2:22 Pathen kah mangtaengnah olhuep te ming uh paw tih, Cimnah thangpang khaw a ngaiuep uh moenih.
2:23 Pathen loh mamih he poci pawt ham ni n'suen tih, amah kah kumhal mueimae la n'saii.
2:24 Tedae rhaithae kah uetnah rhangneh diklai ah dueknah om tih, a pueipo la aka om rhoek loh te te a yook van.