WIS 9
9:1 A pa rhoek kah Pathen neh rhennah Boeipa aw, Na ol neh a cungkuem he na saii coeng.
9:2 Na cueinah neh hlanghing na hlombol tih, Saihluen rhoek soah ukkung la na khueh.
9:3 Diklai he cimnah, dueknah neh a taemrhai sak tih, Hinglu a dueng la laitloeknah na thui sak.
9:4 Na ngolkhoeng dongah aka ngol cueihnah te m'pae lamtah, Na sal rhoek khui lamloh kai he n'hnawt boeh.
9:5 Kai na salpa he tah na sal nu kah a capa ni, Thahnoeng neh a hing aka toi hlang ni. Olkhueng neh laitloeknah mingnah khaw yol.
9:6 Hlang lakli ah hlang soep la aka om pataeng Nang lamkah aka thoeng cueinah a tal atah a honghi lam ni a om eh.
9:7 Na pilnam kah manghai la om ham neh, Na capa rhoek neh na canu rhoek soah laitloekkung la om nan tuek.
9:8 Na tlang cim ah bawkim sak hamla ol nan paek tih, Na omnah khopuei ah hmueihtuk thoh hamla.
9:9 Na taengah cueihnah om tih, na bisai khaw a ming, Te dongah diklai na saii vaengah ana om coeng. Na mikhmuh ah kolo koi la aka om neh Na olpaek bangla a thuem la aka om te khaw a ming.
9:10 Te te vaan hmuencim lamloh han tueih tih, Na thangpomnah ngolkhoel dong lamloh anih han tueih, Amah te ka taengah bibikung la om tih, Na kongaih te ka yakming pai eh.
9:11 Anih long tah mingnah cukuem khaw a ming, Ka thuenghlengnah dongah a cueih la n'hoihaeng vetih, a thangpomnah neh n'tawt ni.
9:12 Te daengah ni ka bibi he doekoi la om vetih, Na pilnam soah tiktam la lai ka tloek eh. Te dongah ni a pa ngolkhoel khaw a tingtawk la a om eh.
9:13 Pathen kah cilkhih te u nim aka ming tih Boeipa kah kongaih te um aka poek thai?
9:14 hlanghing poeknah he tah a honghi mai ni. Mamih kah mangtaengah khaw a tlongtlai mai ni
9:15 Aka poci thai pum loh hinglu a hlak tih, diklai dap im loh lungpuei poeknah khaw a nan.
9:16 Diklai dongkah keh thatlohcik la n'tlap tih, kut dongkah aka om nawn pataeng patang nen ni n'dang Te dongah vaan ah aka om unim aka thuep thai.
9:17 Cueihnah na paek pawt a tah, Na cilkhih te u long a ming. Te dongah ni a so lamkah Cim Mueihla nan tueih.
9:18 Te tlam ni diklai longpuei khaw a dueng la a om tih, Pilnam loh na kongaih te a cang uh dongah, Cueihnah loh a daem sak.