Proverbs 23
23:1 Ukkung ingqawi buh ai haih hamna nang ngawih awh, namik huh awhkaw ak awm ce ak leekna toek.
23:2 Awk ai awh ak kamvana na awm awhtaw na hawngawh cimca toen.
23:3 Thailatnaak buh ni ti sim nawh a tuinaak doeng koeh nai.
23:4 Boei na ngaih yyt awh lynaak koeh toen, yh thai hamna na cyih ta.
23:5 Ak qeeng thai khawhawh koeh ly, ang hlaa tawi nawh ding valh kaw, Huu khanna ang ding amyihna.
23:6 Thlak yyt a buh koeh ai nawh, a buh tui ant tui koeh nai.
23:7 Ak poek amyih koep nani a awmna, “Ai hlah, aw hlah,” ti kawm saw; cehlai ak kawlung ing am ti tang kaw.
23:8 Na buh ai ce laawk kawm tik saw, nak awihleek ce plak kawp ti.
23:9 Thlakqaw ang zaakna awi koeh kqawn, nak awicyihkhqi ce husit kaw.
23:10 Syn awhkawng qii lung ami khoeng koeh thoeih nawh, cadah a khawhyn koeh cuh pyi.
23:11 Amingmih ak dyihpyikung taw ak thamah ni, anih ing na venawh awi kqawn law kaw.
23:12 Cawngpyinaak benna nak kawlung pe nawh, nang haa ing zaaknaak benna hawi.
23:13 Nasen toel koeh hqeh, cumcik ing vyk tik seiawm am thi kaw.
23:14 Cumcik ing na vyk awhtaw a hqingnaak cei khui awhkawng plawk kawp ti.
23:15 Ka capa, nak kaw a cyih awhtaw kak kaw zeel soeih soeih kaw.
23:16 Oeih, nam kha awhkawng awihthym ak cawnawh kak kaw awmhly soeih kaw.
23:17 Nak kawlung ing thlakche koeh oet seitaw, Khawsa kqihchahnaak doeng mah nak kawlung ing poek lah.
23:18 Kutdo awm law ngai kawm saw, nang ngaihuunaak ing am qeeng ti kaw.
23:19 Ka capa, ngai nawh, cyi lah, lam ak thym awh nak kawlung sawi lah.
23:20 Zuuk awkhqi ven ingkaw buh meh ak sawkkhqi venawh koeh boei;
23:21 Zuuk quikhqi ingkaw buh meh ak sawkkhqi taw khawdeng kawm uh.
23:22 Na pa, anik canaak ak awi ce pawm nawh, na nu ce a nucawng lawawh koeh thekha na.
23:23 Awihthym ce thlai nawh koeh zawi voel; cyihnaak, cawngpyinaak, zaaksimnaakkhqi awm.
23:24 Thlakdyng a pa taw awmhlynaak ak sang soeih ta kawm saw, capak cyi ak canaak ing ak khanawh zeelnaak ta kaw.
23:25 Na nu ingkaw na pa kawzeel sak lah, nang anik canaak kung awmhlynaak ing awm seh nyng.
23:26 Ka capa, nak kawlung ni pe lah, ka khawsak na mik ing hat lah seh.
23:27 A pum ak zawi nu taw lawkkhqawng dung amyihna, samphaih nu taw ak ceek lawkkhqawng amyihna awm hy.
23:28 Qukai amyihna thlang qym nawh, pakhqi ce amak ypawm thlangna coeng sak khqi hy.
23:29 Unu khaw ak map? Unu kaw ak see? Unu hqo ak hu? Unu ak patang? Unu ak leem? Unu amik ak ling?
23:30 Zuukung thawh ta dam nawh, zuu ing ak thoek qu ak aw thlangkhqi ni.
23:31 Ak ling zuu, boengloeng khanawh phyl nawh, plaiplek ing awiqawng khui ak kun koeh toek.
23:32 A dytnaak benawh khqui amyihna thlang cuk nawh khqui sy ak ngaan ing myih hy.
23:33 Na mik ak changchangna dai nawh, nak kaw khawhang sak kaw.
23:34 Tuicunli sawawh ak ip amyihna awm kawm tik saw, laawng hizannaak tung lingawh ak ip amyihna awm kawp ti.
23:35 Ni vyk u seiawm am tlo nawh, ni phawp useiawm am za nyng! Kang hqyng law tlaih awhtaw ka aawk hamkawi ak chang hu tlaih bit kawng,” ti kawp ti.