Library · kac

Genesis 5

5:1 Ndai gaw Adam a amyu matu ni a labau lasang lam rai nga ai. (Karai Kasang shinggyim masha ni hpe hpan da ai shaloi shi hkum nan hte bung hkra galaw da nu ai. 5:2 Shi gaw numsha hte lasha hpe hpan da nna dai ni hpe shaman ya nhtawm shanhte hpe, “Shinggyim Masha,” ngu nna shamying wu ai. 5:3 Adam a asak 130 ning du ai shaloi shi hte bung ai shadang sha langai shaprat nna dai wa hpe Shet ngu nna shamying wu ai. 5:4 Dai hpang Adam gaw asak 800 ning naw nga lu wu ai. Shi gaw kaga shayi shadang sha ni, 5:5 hpe mung shaprat nhtawm asak 930 ning hta si mat sai. 5:6 Shet gaw asak 105 ning du ai shaloi, shadang sha Enusha hpe shaprat wu ai, 5:7 dai hpang asak 807 ning du hkra naw nga wu ai. Kaga shayi shadang sha ni hpe mung shi shaprat nna, 5:8 shi a asak 912 ning hta si mat sai. 5:9 Enusha a asak 90 ning du ai shaloi shadang sha Kenan hpe shaprat wu ai, 5:10 dai hpang shi gaw asak 815 ning du hkra naw nga wu ai. Shi gaw kaga shayi shadang sha ni hpe mung shaprat nna, 5:11 shi a asak 905 ning hta si mat sai. 5:12 Kenan a asak 70 ning du ai shaloi, Mahalalela ngu ai shadang 5:13 sha langai hpe shaprat wu ai; dai hpang shi a asak 840 ning du hkra naw nga lu ai. 5:14 Shi mung kaga shayi shadang sha ni hpe shaprat nna shi a sak 910 ning hta si mat sai. 5:15 Mahalalela a asak 65 ning du ai shaloi, shadang sha Yared hpe shaprat wu ai, 5:16 dai hpang shi a asak 830 ning du hkra naw nga lu ai. Shi mung kaga shayi shadang sha ni hpe shaprat nna, 5:17 shi a asak 895 ning hta si mat sai. 5:18 Yared a asak 162 ning du ai shaloi, shadang sha Enuk hpe shaprat wu ai, 5:19 dai hpang shi a asak 800 ning du hkra naw nga lu ai. Shi mung kaga shayi shadang sha ni hpe shaprat nna, 5:20 shi a asak 962 ning hta si mat sai. 5:21 Enuk a asak 65 ning du ai shaloi, shi gaw shadang sha Mehtusela hpe shaprat wu ai. 5:22 Dai hpang, shi gaw Karai Kasang hte 300 ning tup rau hkawm rau sa ai hte kaga shayi shadang sha ni hpe mung shaprat wu ai. 5:23 Shi gaw asak 365 ning du hkra nga ai. 5:24 Shi hkrung nga ai hte yang Karai Kasang hte kanawn mazum nga wu ai, dai hpang shi n nga mat sai, hpa majaw nga yang Karai Kasang shi hpe woi la kau nga sai. 5:25 Mehtusela a asak 187 ning du ai shaloi, shi gaw shadang sha Lamek hpe shaprat wu ai; dai hpang shi a asak 782 ning du hkra naw nga nga ai. 5:26 Shi mung kaga shayi shadang sha ni hpe shaprat nna, 5:27 shi a asak 969 ning hta si mat sai. 5:28 Lamek a asak 182 ning du ai shaloi, shi hta shadang sha langai lu ai rai nna, 5:29 “Dai Madu e dagam kau ai ga hta, ndai ma gaw anhte hkrum ai laja lana re ai amu bungli ni yawng hta na anhte a matu ngwi pyaw ai lam sa ya na ra ai,” ngu nna tsun wu ai; dai rai nna shi hpe Noa ngu nna shamying wu ai. 5:30 Lamek gaw 595 ning du hkra naw nga lu ai; shi mung kaga shayi shadang sha ni hpe shaprat nna, 5:31 shi a asak 777 hta si mat sai. 5:32 Noa a asak 500 ning du ai hpang, shi a shadang sha masum rai nga ai Shem, Ham hte Yahpet ni hpe shaprat wu ai.