2 Chronicles 27
27:1 Yohtam gaw asak hkun manga ning hta hkawhkam tai wa nhtawm Yerusalem hta shi kru ning up nga ai. Shi a kanu gaw Zadok a shayi sha Yerusha rai nga ai.
27:2 Shi gaw shi a kawa galaw ai amu zawn dai Madu awng sharawng ai amu hpe shi galaw wu ai; rai ti mung shi a kawa zawn Nawku Htingnu kata hta manam pyaw ai baw nat nawng let yubak galaw ai n rai. Rai ti mung amyu masha ni chyawm gaw yubak naw galaw nga ma ai.
27:3 Yohtam gaw Nawku Htingnu a Dingdung Chyinghka hpe galaw ai hte Yerusalem mare na Ohpela mying ai mare bunghku hpe mung gaw kahtap wu ai.
27:4 Shi gaw Yuda mung na bum ni hta mare de da nhtawm maling ni hkan hpyen dap hte langchyi ni gap da wu ai.
27:5 Shi gaw Amon hkawhkam hpe shi a luksuk hte gasat dang kau wu ai. Dai hpang shi gaw masum ning a matu shaning shagu ndai ahkun hkanse shi hpe jaw ya na matu Amon masha ni hpe shadut wu ai; dai ni gaw gumhpraw tan mali, hkaulan mam bye sen manga, muk-yaw mam bye sen manga hte rai nga ai.
27:6 Yohtam chyawm gaw dai Madu shi a Karai Kasang a ga hpe sadi sahka hte madat mara nga wu ai majaw daru magam n-gun grau grau nna jat wa nga lu ai.
27:7 Yohtam hkaw dung nga yang na kaga mabyin lam ni, shi hpyen gasat ai lam ni hte shi a masa lam ni yawng hpe Israela hte Yuda Hkawhkam ni a Labau Laika hta ka matsing da nga ai.
27:8 Yohtam hkawhkam tai wa ai aten hta shi a asak hkun manga ning rai nna Yerusalem mare hta shi kru ning up nga ai.
27:9 Shi si mat sai rai nna Dawi a Mare hta lup makoi da ma ai; shi a kasha Ahaza gaw shi a hkang hta hkawhkam tai wa sai.