Library · kac

Job 15

15:1 Yoba e, Kaman lila ga ni! Kaman lila ga ni! 15:3 Nang galaw ai lam hte maren hpaji rawng ai wa tsun na wu ai n rai; dai zawn lachyum n pru ai ga ni hte shi nan ninghkap na wu ai n rai. 15:4 Nang ra ai hku shanang hkawm ai rai yang, kadai mung Karai Kasang hpe hkrit na n rai; kadai mung shi kaw akyu hpyi na n rai. 15:5 Nang tsun ai ga hte maren, nang tawt lai ai n hkru ai lam gaw dan leng nga ai; nang gaw mai kaja ai ga ni hpe shingdu e makoi da na shakut nga ndai. 15:6 Nang hpe daw dan na nye a matu hpa mung n ra nga ai; nang tsun ai ga shagu a majaw daw dan ai hkrum nga ndai. 15:7 Nang gaw shawng shangai ai wa rai nga ai ngu, myit nawn da wu ni? Karai Kasang gaw bum ni hpe hpan da ai shaloi, dai yang e nang nga nga sani? 15:8 Karai Kasang lajang da sai yaw shada lam ni hpe nang na hkrup sani? Shinggyim masha a hpaji byeng-ya hpe nang chyu sha madu la lu n ni? 15:9 Anhte n chye ai hpa mung nang chye nga ndai. 15:10 Anhte gaw na nwa a shawng e shangai nna dingla baw hpraw sai ni kaw na hpaji byeng-ya sharin la saga ai. 15:11 Karai Kasang nang hpe shalan shabran ya nga ai; dai hpe hpa majaw naw ningdang kau n ta? Anhte gaw shi a matu ga ngwi ga pyaw tsun ya saga ai. 15:12 Rai ti mung, nang gaw myit n dawt ai hte masin pawt let anhte hpe yu shati da nga ndai. 15:13 Nang gaw Karai Kasang hpe masin pawt nna, shi hpe jahpoi nga ndai. 15:14 Shinggyim masha kadai mung teng teng san seng lu a ni? Kadai mung Karai Kasang hta ding man lu a ni? 15:15 Karai Kasang gaw hpa majaw shi a lamu kasa ni hpe pyi n kam lu nga a ta? shanhte pyi shi a man hta san seng nga ma ai n rai. 15:16 Anhte gaw n hkru ai amu hpe hka zawn lu ga ai; rai sa, anhte gaw hten mat chye ga ai; anhte gaw manu n dan ga ai. 15:17 Yoba e, ya chyawm gaw ngai chye ai lam hpe madat u. 15:18 Hpaji rawng ai masha ni gaw shanhte a kaji kawa ni kaw na sharin hkam la lu ai teng man lam ni ngai hpe sharin ya ma ai; shanhte makoi magap da ai amu hpa mung n nga nga ai. 15:19 Shanhte a mungdan gaw maigan ni a lata kaw na lawt wa nga ai; kadai mung shanhte hpe Karai Kasang a lata kaw nna woi shadam kau lu nga ai n rai. 15:20 Kaga ni hpe dip gamyet sha ai n hkru ai ni gaw shanhte asak hkrung nga ai hte yang nni nkri hkrum na rai ma ai. 15:21 Shanhte a na ni hta hkrit hpa nsen ni kachyeng na mara ai; shanhte shim lum nga ai nga nna naw myit nga yang, damya ni htim gasat ma ai. 15:22 Shanhte gaw nsin hta na lawt wa na myit mada shara n nga nga ai; shara mi hta e, nhtu gaw shanhte hpe sat kau na matu ala nga ai; 15:23 langda ni mung shanhte a si mang ni hpe sha na nga, la dingda nga ai, Shanhte a du wa na ra ai aten gaw sin mak nga ai hpe shanhte chye nga ma ai; 15:24 ru yak tsin-yam tsindam gaw daru magam n-gun rawng ai hkawhkam langai mi zawn shanhte hpe gasat na matu ala nga ma ai. 15:25 Dai gaw Karai Kasang hpe lata latup madun nna Chyahtum Chyalai N-gun rawng ai wa hpe ninghkap ai wa a lai rai nga ai. 15:26 Shanhte gaw gumrawng gumtawng ai hte gumlau ai ni rai nga ma ai; shanhte gaw du ja ai hte shanhte a ninggang ni sharawt lang nhtawm Karai Kasang hpe gasat ninghkap na matu htim bang wa ma ai. 15:28 Shanhte gaw mare ni hpe gasat ka-up la nna nta madu ni hprawng shakram da ai nta ni hpe madu la nga ma ai; rai ti mung hpyen majan a majaw dai mare ni hte nta ni hpe jahten shaza kau na mara ai. 15:29 Shanhte gaw na na wa sut naw su nga na n rai; shanhte madu tawn ai arai hpa mung grin nga lu na mara ai n rai. Shanhte a shingnip shingna pyi mat mat wa na ra ai, 15:30 shanhte gaw nsin kaw nna hprawng lawt lu na ma ai n rai. Shanhte gaw lakung lakying ni hkru krawp mat ai hpun zawn tai mat nna, de a apu ni nbung e bung ahpawt kau hkrum na mara ai. 15:31 N hkru ai hpe kam hpa na nga, shanhte angawk angak rai nga yang, dai n hkru ai gaw shanhte a shagrau kumhpa tai na ra ai. 15:32 Shanhte a aten garai n lai yang, shanhte nyip mat wa na mara ai, galoi mung n chye tsit lali wa ai lakung zawn nyip mat wa na mara ai. 15:33 Shanhte gaw n myin ai sabyi si ni hpe sharun kau ai sabyi ru zawn mung, apu ni run hkrat mat ai tsanlun hpun zawn tai mat na mara ai. 15:34 Karai Kasang hpe n kam n sham ai masha ni a amyu matu ni nga na n rai; wan gaw mayun gumhpraw la nna gap da ai nta ni hpe hkru shamyit kau na ra ai. 15:35 Dai ni gaw ru yak tsin-yam tsindam maw mawn nna n hkru ai amu galaw ai ni rai nga ma ai; shanhte a myit kraw lawang ni hta masu hkalem ai ga ni hte tut nawng hpring nga ai.