Job 22
22:1 Karai Kasang a matu akyu rawng ai amu galaw na kadai nga nga a ta? Hpaji rawng htum ai wa pyi galaw lu ai kun?
22:3 Nang ding man ai hku galaw nga ai amu gaw Karai Kasang hpe akyu jaw a ni? Nang galaw ai mai kaja lam gaw shi hpe karum ya lu a ni?
22:4 Karai Kasang hpe n hkrit hkungga ai majaw nang hpe daru sharin na ra ai; shi nang hpe tara jeyang ai shara de woi sa na ra ai.
22:5 N rai law, nang galaw shut kau ai yubak grai kaba ai majaw rai nga lit dai; nang galaw ai n hkru ai amu yawng a majaw rai nga lit dai.
22:6 Shi hkoi la ai gumhpraw nang hpe bai nhtang jaw shangun nga ndai, nang gaw shi a hpun palawng ni hpe la kau ya nna, singgu krin tawn da nga ndai.
22:7 Nang gaw hki ba ai ni hpe lu ntsin n jaw hkraw ndai, kawsi kyet ai ni hpe lusha n jaw hkraw ndai.
22:8 Nang gaw na a daru magam n-gun hte arawng aya lang nna lamu ga ting hpe madu la nga ndai.
22:9 Nang gaw gaida ni hpe karum na ningdang kau ai sha n-ga; jahkrai ma ni hpe mung hpya lu hpya sha ai hte n kaja ai hku galaw nga ndai.
22:10 Dai rai nna, ya gaw na a grup yin shara shagu hkan nhkun ni nga nga ai; dai majaw akajawng sha nang hkrit wa wa rai nga ndai.
22:11 Nsin grau sin mak wa nna nang hpe ka-up kau na hka mawru hpe nang n mu lu ndai.
22:12 Karai Kasang gaw tsaw htum ai sumsing lamu ni hta nga nga nna; tsaw ai shara hta nga nga ai shagan ni hpe pyi shi naw gum yu nga ai n rai ni?
22:13 Rai tim, nang mahtang, “Karai Kasang hpa chye a ta? Shi gaw sumwi hta makoi rawng nga ai majaw, anhte hpe shi kaning rai tara jeyang lu na rai ta?,” ngu nna san ndai.
22:14 Htat ai sumwi ni a majaw sumsing lamu a lahta tsang e shi hkawm ai hpe n mu lu ai ngu nna nang myit nawn nga ndai.
22:15 N hkru ai masha ni tut nawng hkan ai lam ni hta nang hkawm sa na myit daw dan n ni?
22:16 Shanhte a aten garai n du yang, hka mawru hpungtun e kashin shayawng kau ai hkrum nga masai.
22:17 Dai ni gaw Karai Kasang hpe ningdang kau ai masha ni rai nna; shi shanhte a matu hpa n lu galaw ya nga ai, ngu kam ma ai.
22:18 Shing nga tim, Karai Kasang gaw shanhte hpe ngamu ngamai shangun ai majaw, n hkru ai ni a myit mang ai lam ni hpe ngai n chye na lu nngai.
22:19 N hkru ai masha ni ari jaw hkrum ai hpe shanhte mu ai shaloi, mai kaja ai masha ni kabu gara nna mara n kap ai ni mani asawng ma ai.
22:20 N hkru ai ni madu ai arai yawng mayawng hten za mat sai; wan gaw hpa mung n ngam da hkra hkru kau nga sai.
22:21 Ya chyawm gaw, Yoba e, Karai Kasang hta ngwi pyaw sim sa lam galaw tawn u; gumlau hpyen zawn shi hpe hkum di et; shing rai galaw ai rai yang, shi nang hpe shaman ya na ra ai.
22:22 Shi jaw ai sharin achyin ga ni hpe hkap la nna; shi a mungga ni hpe na a myit masin hta matsing da u.
22:23 Rai sa, nang gaw Karai Kasang hpang de grit nem ai myit hte nhtang wa lu na rai ndai; na a dum nta hta galaw hkrup ai n hkru ai amu yawng mayawng hpe jahtum kau u.
22:24 Nang lu ai aja kabai kau u; na ja jet ni hpe hkun hkraw ai hka shi lam e sumpum da su.
22:25 Chyahtum Chyalai N-gun Rawng Ai Karai Kasang gaw na a ja tai nga u ga; shi hpe na a gumhpraw sumpum shatai u.
22:26 Dai hpang, nang gaw Karai Kasang hta tut nawng kamhpa wa nna; shi gaw na a kabu gara ai a npawt rai nga ai hpe mu tam na rin dai.
22:27 Nang akyu hpyi yang, shi nang hpe htan ya na ra ai; nang sadi tawn da ai ga shaka hpe nang shatup na rin dai.
22:28 Nang galaw ai lam shagu awng dang na ra ai; nang sa wa ai lam hta nhtoi jahtoi ya na ra ai.
22:29 Karai Kasang gaw gumrawng gumtawng ai ni hpe shayu kau nna, shagrit shanem ai ni hpe hkye hkrang la nga ai.
22:30 Nang gaw mara n kap ai sha nang galaw ai amu jaw ai rai yang, shi nang hpe hkye mawai la na ra ai.