Job 33
33:1 Yoba e, ya chyawm gaw ngai tsun dan na ga yawng mayawng hpe sadi sahka hte madat u.
33:2 Nye a myit hta rawng ai hte maren, tsun na ngai jin jin rai nga nngai.
33:3 Ngai tsun ai ga yawng mayawng malang nga ai rai nna; teng man ai ga hpe ngai tsun nga nngai.
33:4 Karai Kasang a wenyi gaw ngai hpe hpan da nna asak jaw ya nga sai.
33:5 Nang rai lu yang, ngai hpe htan e; na a ndang kalang ga ni hpe hkyen da u.
33:6 Nang hte ngai gaw Karai Kasang a man e maren sha rai nga ga ai; an lahkawng yan gaw kagam ga hte shachyaw da hkrum ai yan rai nga ga ai.
33:7 Dai re ai majaw, nang ngai hpe hkrit na lam hpa mung n nga nga ai; ngai mung nang hpe ka-up na n rai.
33:8 Yu u, ndai gaw nang ning nga tsun sai lam hpe ngai na nngai:
33:9 “Ngai gaw mara kap nga nngai n rai; ngai gaw shut ai amu hpa mung n galaw kau hkrup nngai, ngai gaw mara n kap ai hte yubak kaw na lawt nga nngai.
33:10 Rai ti mung, Karai Kasang gaw ngai hpe jahte tam nna gumlau hpyen hpe zawn ngai hpe di nga ai.
33:11 Shi gaw nye a lagaw hpe hpri sin-yu hte gyit nna; ngai lahkam hkawm ai lam shagu hpe shi sin yu nga ai.”
33:12 Rai ti mung, Yoba e, ngai nang hpe tsun de ga; nang shut nga ndai. Karai Kasang gaw shinggyim masha kadai hta mung grau galu kaba nga ai.
33:13 Shinggyim masha a aput angun ai ga hpe galoi mung n htan ya nga ai Karai Kasang hpe nang hpa majaw mara shagun n ta?
33:14 Karai Kasang gaw lang mi hte lang mi tsun nga ai; kadai mung shi tsun ai ga hpe myit maju jung ma ai n rai.
33:15 Masha ni shana e yup nga yang, Karai Kasang gaw yup mang hte shingran ni hta ga sa shaga nga ai.
33:16 Shi gaw shanhte hpe shi tsun ai ga madat shangun nga ai rai nna; shi a sadi shadum ai ga ni a majaw shanhte hkrit kajawng ma ai.
33:17 Karai Kasang gaw shanhte yubak galaw nga ai hpe jahkring kau shangun na matu mung; gumrawng gumtawng ai masha ni tai wa nga ai kaw nna hkye la na matu mung tsun nga ai.
33:18 Shi gaw shanhte hpe jahten shaza kau hkrum shangun ai n rai; si hkrung si htan a lata kaw nna shi shanhte hpe hkye la nga ai.
33:19 Karai Kasang gaw masha hpe machyi shangun nna mung; shi a hkum hta nchyi nmu jahpring ya let mung shading sharai ya nga ai.
33:20 Machyi makaw hkrum ai ni gaw lusha n-gup n hpaw nga ma ai; kaja htum ai lusha hpe pyi yu matsat nga ma ai.
33:21 Shanhte a hkum shan ni hpa mi n kap mat nga ai; nang gaw shanhte a nrut nra ni hpe mu lu nga ndai;
33:22 shanhte gaw katsan ga de yu wa na hkyen nga ma ai.
33:23 Anhte a lit hpe shadum ya ai Karai Kasang a lamu kasa hkying mun hta na langai mi gaw shanhte hpe sa karum la mai nga a dawng.
33:24 Lamu kasa gaw matsan dum ai hte, “Shanhte hpe dat dat mu! Shanhte gaw katsan ga de yu wa ang ai ni n rai ma ai. Shanhte hpe shalawt dat kau ya na gawng malai ndai yang e nga nga ai,” ngu nna tsun na ra ai.
33:25 Shanhte a hkum shan ni gaw ma kaji zawn hkalung nna n-gun ja wa na mara ai;
33:26 Shanhte akyu hpyi yang Karai Kasang htan ya na ra ai; shanhte gaw Karai Kasang hpe kabu gara ai hte nawku na mara ai; Karai Kasang gaw shanhte a matu kaja ai arung arai ni hpe bai lajang tawn da ya na ra ai.
33:27 Masha shagu gaw shawa masha ni hpe, “Ngai shut kau ni ai. Ngai gaw jaw ai n galaw kau ni ai, rai ti mung Karai Kasang gaw ngai hpe ngam da nga ai.
33:28 Shi gaw ngai hpe katsan ga de yu sa wa ai kaw nna mawai la nga ai, ngai naw ahkrung nga nngai,” ngu nna tsun wu ai.
33:29 Karai Kasang gaw ndai amu yawng hte hpe lang mi hte lang mi bai galaw nna;
33:30 masha asak hpe hkye hkrang la ai hte kabu gara ai asak hkrun lam jaw ya nga ai.
33:31 Ya chyawm gaw, Yoba e, ngai tsun ai ga madat u; Atsin sha nga u, ngai ga tsun n-ga.
33:32 Rai ti mung, nang hta lama mi tsun dan mayu ai lam nga yang, dai hpe ngai na lu n-ga; nang ding man nga ndai hpe ngai kabu gara yin la na nngai.
33:33 Rai ti mung, dai hku n rai yang, atsin sha nga nna, nye a ga madat u, kaning re ai hpaji rawng ai wa tai wa hkra, ngai nang hpe sharin achyin ya na we ai.