Library · kac

Job 37

37:1 Dai nbung laru gaw nye a myit masin hpe grai kahpra mat hkra htuk htak shangun nga ai. 37:2 Nanhte yawng hte e, shi a n-gup kaw na pru wa ai mu ngoi ai Karai Kasang a nsen hpe madat mu. 37:3 Shi gaw sumsing lamu a npu lai, ginding aga a jahtum shara mi kaw nna kaga shara mi de hkren myihprap gala shangun nga ai. 37:4 Dai hpang, myihprap wan gala nga ai hte yang, mu ngoi ai nsen kaba hte shi a shabam ai nsen hpe na lu nga ai. 37:5 Karai Kasang a hkang da ai ga gaw galu kaba ai amu ni, anhte n chye na lu ai mauhpa amu ni shabyin dat nga ai. 37:6 Shi gaw ginding aga ntsa e hkyen hkrat na hkang da nhtawm; marang mahpawng laru marang dat dat nga ai. 37:7 Shi gaw anhte galaw ai amu jahkring da nna; shi galaw lu ai amu anhte hpe madun dan nga ai. 37:8 Matse labye dusat ni shanhte a lungpu hku de shang ma ai. 37:9 Dingda maga de na nbung laru wa ai hte dingdung maga de na makret machyi hkra katsi ai nbung bung nga ai. 37:10 Karai Kasang a nsa hte gawut dat jang hka ni ge mat nna; dai gaw ja ai hkyen tai mat nga ai. 37:11 Myihprap wan gaw sumwi ni kaw na gala pru nga ai, 37:12 dai ni gaw Karai Kasang myit ra ai hku shamu hkawm ma ai. Shanhte gaw Karai Kasang hkang da ai hte maren mungkan shara shagu hkan e amu galaw ma ai. 37:13 Karai Kasang gaw ginding aga hpe madit na matu marang jahtu nga ai; anhte hpe ari jaw na matu mung, anhte hpe shi a myi man pa lam madun na matu mung, dai hpe shi shangun dat nga ai. 37:14 Yoba e, hkring mi hkring nna madat u; Karai Kasang galaw ai mauhpa amu ni hpe myit sumru yu u. 37:15 Karai Kasang gaw kaning rai hkang da ai ga jaw ai hte sumwi ni kaw na myihprap wan gala shangun nga ai hpe nang chye n ni? 37:16 Sumwi ni kaning rai sumsing lamu hta mawng nga ai mung, Karai Kasang a mauhpa kungkyang ai amu hpe mung nang chye n ni? 37:17 N rai law, dingda nbung gaw lamu ga hpe dip sa-up da yang, nang chyu sha kahtet kang ai hta nni nkri hkrum lu na ndai. 37:18 Nang gaw sumsing lamu hpe kahpyan da nna, dai hpe shatsawm da ai nhprang arai hpe ja gumdin shangun ai Karai Kasang hpe karum lu a ni? 37:19 Karai Kasang hpe kaning ngu tsun na lam anhte hpe sharin ya mi; Anhte a myit ni gaw kaman rai nga ai majaw anhte hpa n chye tsun ga ai. 37:20 Karai Kasang hte ga shaga na n wam nngai; hpa majaw ngai hpe jahten shaza na ahkaw ahkang ngai shi hpe jaw ang na rai ta? 37:21 Ya chyawm gaw sumsing lamu na nhtoi gaw htoi tu kabrim nna, anhte a matu dai hpe mada yu na, nau wa htoi kabrim nga ai; nbung hte sumsing lamu hpe ye jasan kau nga ai. 37:22 Dingdung maga de aja zawn htoi gala nga ai hpe mu lu nga ai, Karai Kasang a hpung shingkang gaw anhte hta hkrit hpa hte hpring nga ai. 37:23 Karai Kasang a daru magam n-gun gaw grai galu kaba nga ai rai nna; shi a makau de anhte shani sa lu ga ai n rai; shi gaw shinggyim masha ni hte kanawn mazum ai hta ding hpring nna teng man nga ai. 37:24 Masha shagu shi a man e hkrit let tsap nga ai gaw mauhpa amu n rai nga ai; hpaji rawng nngai nga nna tsun ai ni hpe shi hpa n nawn ya wu ai.