Job 7
7:1 Shinggyim masha a asak gaw hpyen amu galaw shadut hkrum ai zawn mung, lata amu galaw shaja ai asak hkrun lam zawn mung,
7:2 mayam gaw katsi ai shingnip hpe marit nga ai zawn mung, amu galaw ai wa gaw shi a shabrai jaw ya na matu ala nga ai wa zawn mung rai nga ai.
7:3 Shata mi hte shata mi, asak hkrung nga lu na matu ngai hpa n lu nngai; lana mi hte lana mi, yawn hkyen ai gaw ngai kaw du nga ai.
7:4 Ngai yup kaleng taw nga yang, aten lawan n lai hkraw nga ai, ngai gaw shana tup nji nmu hkrum nna, jahpawt nhtoi hpe marit nga nngai.
7:5 Nye a hkum shan gaw byet ni hte hpring nga ai, dai gaw gyi ku ni hte ka-up nga ai; hpye ai ningma ni kaw na matswi ni abyi pru nga ai.
7:6 Nye a nhtoi ni gaw da danghkyam hta grau lawan ai rai nna, myit mada shara n nga ai sha lai mat wa nga ai.
7:7 O Karai Kasang e, nye a asak gaw nsoi nsa langai sha rai nga ai hpe dum u law. nye a kabu gara ai mung htum mat sali ai.
7:8 Nanhte ngai hpe ya mu myit dai, rai ti mung galoi mung bai mu sana n rai. Nanhte ngai hpe hkan tam ai rai yang, ngai n nga mat na nngai.
7:9 Sumwi hkoi mat nna mat mat ai zawn, anhte shinggyim masha ni mung si mat wa nna, galoi mung nhtang wa ai n rai; anhte hpe chye yu sai ni anhte hpe malap kau na ma ai.
7:11 N rai law! Ngai gaw atsin sha nga lu na n rai! Ngai gaw masin pawt ai hte ahkup ahka ngu la nngai majaw nye a lajin ga naw tsun na nngai.
7:12 Nang ngai hpe hpa majaw sin nga n ni? Ngai gaw panglai numraw rai nga ai ngu myit nawn da wu ni?
7:13 Ngai gaw kaleng taw let ban sa la mayu nngai; nye a nchyi nmu hkam sha ai kaw na hkyamsa lam tam yu nngai.
7:14 Rai ti mung nang-nang gaw ngai hpe yup mang ni hte jahkrit nga ndai; nang gaw ngai hpe shingran ni hte yup dip dip shangun nga ndai;
7:15 hkum hkrang hta nchyi nmu rai hkam sha nga na hta, du manat sat kau hkrum na hpe ngai grau ra sharawng nngai.
7:16 Asak hkrun lam hpe hki ba dum nga nngai majaw asum jaw nngai. Nye a asak hkrun lam lachyum n pru shangun nga ai majaw ngai hpe hkrai kau da e.
7:17 Shinggyim masha gaw na a matu hpa majaw grai ahkyak nga a ta? Shi galaw ai amu hpe hpa majaw myit lawm nga a ta?
7:18 Nang gaw shi hpe jahpawt shagu san jep yu nhtawm ahkying aten shagu shi hpe dinglik yu nga ndai.
7:19 Nye a mayen mayu na aten daram sha pyi nang ngai hpe myi man n kayin kau lu n ni?
7:20 Ngai hpe yu ai wa e, nye a shut hpyit mara a majaw nang machyi hkra n ni? Ngai hpe hpa majaw na a shingte shara hku lang n ta? Ngai gaw na a matu grai kaba ai lit zawn tai nga a ni?
7:21 Nang gaw nye a shut hpyit mara hpe galoi mung n raw ya lu sani? Ngai galaw shut ai amu hpe nang mara n dat ya lu sani? Kade n na yang, nye a lup sung hku hta ngai taw nga na ni ai; nang ngai hpe tam ai shaloi, ngai nga na nngai n rai.