Job 9
9:1 Rai sa, dai lam yawng mayawng hpe shawng de ngai na yu ni ai. Rai ti mung masha gaw Karai Kasang a man e kaning rai ding man lu na rai ta?
9:3 Kadai wa shi hte dangrang lu a ta? Shi gaw kadai mung n htai lu ai ga san hkying mi san lu nga ai.
9:4 Karai Kasang gaw hpaji grai rawng ai hte daru magam n-gun rawng nga ai; kadai mung shi hpe gumlang lu ai n rai.
9:5 Shi gaw n shadum ai sha bum ni hpe sit kau nhtawm, shi pawt ai aten hta dai ni hpe jahten sharun kau nga ai.
9:6 Karai Kasang gaw nnang nawng nawng shangun nna lamu ga hpe ashun awam di wu ai; shi gaw ginding aga hpe madi da ai shadaw ni hpe ashun wu ai.
9:7 Shi gaw ajan rawt wa ai hpe mung, shana e shagan ni htoi kabrim nga ai hpe mung hkang da lu ai.
9:8 Karai Kasang gaw sumsing lamu ni hpe kahpyan da nna, panglai numraw shingma ntsa hta shi kabye nga yang, kadai mung karum ai n rai.
9:9 Karai Kasang gaw lamu ntsa e-Wala Shingtau, Nhtoi Gintawng, Kru Majan hte dingda maga de na shagan majaw ni hpe noi da nga ai.
9:10 Shi galaw ai amu kaba hpe anhte n dang chye lu ga ai; shi galaw ai mauhpa amu htum ngu n nga nga ai.
9:11 Karai Kasang hkawm lai nga ai, rai tim ngai shi hpe n mu lu nngai.
9:12 Shi ra ai arai hpe shi la nga ai, kadai mung shi hpe jahkring lu ai n rai; Kadai mung shi hpe, “Nang hpa galaw nga n ta?,” ngu nna san gwi nga ai n rai.
9:13 Karai Kasang a pawt sindawng ai gaw dinggrin rai nga ai. Shi gaw shi hpe ninghkap na matu panglai numraw ngu ai Rahab hpe karum ai shi a gumlau hpyen ni hpe agrawp mani kau wu ai.
9:14 Dai rai nna Karai Kasang hpe htan na ga, ngai kaning rai mu tam na rai ta?
9:15 Ngai nan mara n kap nga ti mung, ngai galaw lu ai amu yawng gaw nye a tara agyi Karai Kasang kaw na matsan dum ai myit hpyi nem na sha tsun lu nngai.
9:16 Dai rai nna shi ngai hpe ga tsun shangun yang pyi, nye a ga madat ya na, ngai n kam lu nngai.
9:17 Shi gaw nbung laru dat dat nna, ngai hpe hpa mara n nga ai sha kayat ahpawt kadawng shangun nga ai.
9:18 Shi ngai hpe nsa awai la shangun ai n rai; shi gaw nye a asak hpe ahkup ahka nga ai hte jahpring ya nga ai.
9:19 Ngai n-gun hking ang ai kun? Karai Kasang hpe n-gun shingjawng ang ai kun? Ngai shi hpe tara rung de woi sa ang ai kun? Kadai wa shi hpe sa shangun lu a ta?
9:20 Ngai gaw mara n kap ai hte kam sham nga ti mung, nye a n-gup ngai hpe mara shagun na ra ai. Ngai tsun ai lam magup gaw ngai hpe daw dan na matu zawn rai nga ai.
9:21 Ngai gaw mara n kap nngai, rai ti mung ngai hta hpa byin wa na lam hpe pyi hpa zawn n nawn nngai. Ngai gaw asak hkrun lam hpe n dawng nngai; nye a matu hpa mung n ahkyak nga ai; mara n kap ai rai ti mung, kap ai rai ti mung, Karai Kasang gaw anhte hpe shamyit kau na ra ai.
9:23 Mara n kap ai wa akajawng sha si mat yang, Karai Kasang mani nga ai.
9:24 Karai Kasang gaw mungkan ga hpe n hkru ai ni a lata hta ap ya nga ai. Shi gaw tara agyi ni yawng hpe myi kyaw kau shangun nga ai. Dai amu hpe Karai Kasang n galaw yang, kadai galaw a ta?
9:25 Nye a nhtoi ni gaw gat chyang ai wa hta grau lawan ti mung, dai nhtoi langai mi mung mai kaja lam byin wa ai n rai.
9:26 Nye a asak gaw lawan htum ai sanghpaw li zawn prangtai hpe htim magra ai galang zawn lawan lai mat wa nga ai.
9:27 Nye a nchyi nmu hpe malap kau na matu ngai mani dan yang, nye a nni nkri yawng gaw ngai hpe shingran bai mu shangun na ra ai; Karai Kasang gaw ngai hpe mara n shagun ai, nga na n rai nga ai hpe ngai chye nngai.
9:29 Ngai nan mara kap nga nngai mi, hpa majaw ngai myit hkra na rai ta?
9:30 Kaning re ai sabya hte mung nye a shut hpyit mara ni hpe kashin kau lu ai n rai.
9:31 Karai Kasang gaw ngai hpe maza mala nhkun de kabai bang ai rai nna, nye a hpun palawng ni pyi ngai hpe matsat kau nga ai.
9:32 Karai Kasang gaw shinggyim masha rai yang, ngai shi hpe htan lu na nngai; shing rai an a htailai hkat ai hpe daw dan na matu tara rung de sa ang na ga ai.
9:33 Rai ti mung an a lapran e htinglu ya ai wa kadai n nga; Karai Kasang hte ngai hpe tara jeyang ya na kadai n nga ai.
9:34 Karai Kasang e, ngai hpe ari hkum jaw e! Na a hkrit hpa amu ni hpe la kau u!
9:35 Ngai n hkrit nngai. Nye a myit kraw lawang hpe ngai chye ai majaw ngai ga shaga na nngai.