Psalms 107
107:1 “ Madu gaw mai kaja nga nna, shi a tsaw ra myit htani htana agrin nga ai majaw, shi hpe chyeju shakawn mu!”
107:2 Shi a jaw e hkye hkrang la hkrum sai ni yawng hte gaw dai Madu hpe chyeju shakawn ai hta, dai ga ni hpe atsun nga mu.
107:3 Shi gaw nanhte a gumlau hpyen ni a lata kaw nna mawai la nu ai; sinpraw sinna, dingdung dingda mungdan shagu de nga hkawm nga ai nanhte hpe bai woi wa manit dai.
107:4 Masha nkau mi gaw, lam n nga ai nam mali hkan e, brak hkawm nga ma ai; shanhte shanu nga na mare de hkrang ai lam hpe mung n mu tam lu nga ma ai.
107:5 Shanhte gaw kawsi hpang gara ai hkrum nga ma ai; myit mada ai lam mahkra hpe shayaw kau mu ai.
107:6 Shaloi, shanhte ru tsang hkrum ai aten hta Madu hpe hpyi jahtau mu ai; shi shanhte a nni nkri kaw nna shanhte hpe hkye hkrang la nu ai.
107:7 Shi gaw shanhte hpe shanu nga lu na shara de, malang ai lam hku nna woi wa mu ai.
107:8 Shanhte a matu, shi galaw dan nu ai mauhpa magam bungli ni hte; shi a dinggrin tsaw ra myit a majaw shanhte dai Madu hpe chyeju shakawn lu na rai mu ai.
107:9 Shi gaw hpang gara hkrum ai ni hpe jahkru ya nna, kawsi hkrum ai ni hpe kaja ai lusha hte shakat ya nga ai.
107:10 Masha nkau mi gaw nsin kata hta myit nchyi nmu hte sharen da ai hkrum nga nna; bawng dung ai masha ni mung hpri sumri hte gyit da ai nni nkri hpe hkrum sha nga mu ai.
107:11 Hpa majaw nga yang, shanhte gaw Chyahtum Chyalai n-gun rawng ai Karai Kasang a hkang da ai ga ni hpe gumlau kau nna; shi a sharin shaga ai ga matsun ni hpe mung n hkap la kau ai majaw rai nga ai.
107:12 Shanhte gaw bungli ja ja galaw nga ma ai majaw hki ba nga ma ai shanhte kataw yang, kadai mung karum la na mu ai n rai.
107:13 Shaloi shanhte gaw ru tsang hkrum ai aten hta, dai Madu hpe hpyi jahtau mu ai rai nna; shi gaw shanhte a shoichyum shoirang kata kaw nna shanhte hpe hkrang shaw la nu ai.
107:14 Shi gaw shanhte hpe nsin tawng hte sin htat ai shingnip kata kaw nna woi shapraw la ai hte; shanhte hpe gyit hkang da ai hpri sumri ni hpe mung, gang di kau ya nu ai.
107:15 Shanhte a matu, shi galaw dan nu ai mauhpa magam bungli ni hte; shi a dinggrin tsaw ra myit a majaw, dai Madu hpe chyeju shakawn nga ra ma ai.
107:16 Shi gaw mare chyinghka ni hpe agrawp kau nna, hpri htinggrang ni hpe kahtum kadaw di kau nu ai.
107:17 Shanhte galaw ai yubak ni a majaw masha nkau mi angawk nga ma ai; shanhte galaw ai n hkru n hkra lam ni a majaw, nkau mi nchyi nmu hkrum sha nga ma ai.
107:18 Shanhte gaw lusha shahpa hpe pyi n kam yu mat mu ai hte, si hkrung si htan a chyinghka de ni wa nga ma ai.
107:19 Shaloi, shanhte ru tsang hkrum ai aten hta Madu hpe hpyi jahtau mu ai; shi shanhte a shoichyum shoirang kata kaw nna shanhte hpe hkrang shaw la mu ai.
107:20 Shi gaw shi a mungga hte shanhte hpe shamai shatsai ya ai hte, lup sung hku kata na, shanhte hpe hkye hkrang la wu ai.
107:21 Shanhte a matu, shi galaw dan sai mauhpa magam bungli ni hte; shi a dinggrin tsaw ra myit a majaw, dai Madu hpe chyeju shakawn lu na rai mu ai.
107:22 Shanhte gaw shagu hkungga ni hte shi hpe chyeju shakawn lu na rai mu ai; kabu gara ai mahkawn mangoi ga hte shi galaw dan sai ni yawng hpe tsun hkai dan lu na rai mu ai.
107:23 Masha nkau mi gaw nammukdara hka a ntsa e, sanghpaw li ni hte hkawm sa nna; panglai hka ni a ntsa e, shanhte a kan bau magam amu hpe galaw shachyen nga ma ai.
107:24 Shanhte gaw dai Madu hpa galaw lu ai amu hte, panglai ntsa e, shi madun dan ai mauhpa magam amu ni hpe mu mada nga ma ai.
107:25 Shi hkang dat ai shaloi, nbung laru ru wa nna; hka leng ni rawt kabrawng wa nga ai.
107:26 Sanghpaw li ni mung nbung ntsa de rawt lung wa nna; sung ai hka de, lup shang mat wa nga ai. Ndai zawn re ai hkrithpa lam a majaw, masha ni gaw shanhte a nden mat mat mu ai.
107:27 Shanhte gaw chyaru nang ai ni zawn ndi nda rai hkawm nna; shanhte a kung kyang ai hpaji nlang mung kaman lila rai mat manu ai.
107:28 Shaloi, shanhte ru tsang hkrum ai aten hta, dai Madu hpe hpyi jahtau mu ai rai nna; shi shanhte a shoichyum shoirang kata kaw na hkrang shaw la nu ai.
107:29 Nbung laru hpe shi shazim kau ai hte, hka leng ni mung sim mat ma ai.
107:30 Nbung laru sim mat ai majaw, shanhte kabu gara nga ma ai; shanhte sa mayu ai daru de, shim ai hku, shanhte hpe shi woi wa nu ai.
107:31 Shanhte a matu, shi galaw dan sai mauhpa magam bungli ni hte shi a dinggrin tsaw ra myit a majaw, dai Madu hpe chyeju shakawn lu na rai mu ai.
107:32 Shanhte shi a galu kaba galu kaba ai lam hpe amyu masha ni a hpawng hta htawn tsun dan lu na rai mu ai hte; ningbaw ningla ni a zup hpawng hta shi hpe shakawn lu na rai mu ai.
107:33 Dai Madu gaw hka nu ni hpe atsai awai jahkraw kau nna, hka hpawk ni hpe pat kau ya nu ai.
107:34 Dai mungdan hta shanu nga ai ni a tara n lang ai lam a majaw, shi gaw ga sau hpring ai shara ni hpe jum ga shatai kau ya nu ai.
107:35 Zaibru jang ni hpe hka nawng, hkun hkraw ai lamu ga hpe hka hpawk lwi ai shara shatai kau nu ai.
107:36 Shi gaw kawsi hkrum ai amyu masha ni hpe dai shara hta nga shangun nna; shanhte shanu nga na matu mare hpe de da nga ma ai.
107:37 Shanhte gaw sun galaw nna, sabyi hpun ni hpe hkai nhtawm nsi naisi hpe ntaw ntsang shu la mu ai.
107:38 Shi a amyu masha ni hpe shi shaman ya nna, shanhte hta kashu kasha law law mayat maya nga ma ai; shanhte a yam nga ni n yawm mat u ga, shi bau sin ya nga ai.
107:39 Karai Kasang a amyu masha ni gaw gumshem dip gamyet sha hkrum ai hte nni nkri hkam sha nga ma ai; sum mat ai hte kaya kahpa hkrum sha nga ma ai shaloi,
107:40 shanhte a ntsa e, dip gamyet sha nga ai ni hpe shi matsat kau nga ai lam hpe madun dan nna; shanhte hpe lam n hku ai katsi katsang re ai nam mali de brak hkawm shangun mu ai.
107:41 Rai ti mung, shi gaw ra kadawn nga ai ni hte, shanhte a nni nkri kata kaw na mawai la ai hte; shanhte a dinghku masha ni hpe sagu hpung ni hpe zawn shalaw jahtam ya mu ai.
107:42 Ding hpring ai masha ni dai lam hpe mu nna kabu gara nga ma ti mung; tara n lang ai ni yawng hte hpe chyawm gaw shazim kau ya wu ai.
107:43 Hpaji rawng ai ni ndai amu ni a lam hpe myit sawn yu nga mu ga; shanhte gaw dai Madu a dinggrin tsaw ra myit hpe myit yu nga mu ga law.