Library · kac

Psalms 116

116:1 Dai Madu gaw nye a nsen hpe na ya ai majaw, ngai shi hpe tsaw ra nga nngai; shi nye a akyu hpyi ai ga ni hpe madat ya nga ai. 116:2 Ngai shi hpe aten shagu shaga yang, nye a nsen hpe shi madat ya nga ai. 116:3 Si du a sumgawn gaw ngai hpe htinggrum da nna; katsan ga na ru tsang ni, ngai hpe wang shinggrup da nga sai. Shing rai, ngai gaw hkrit ai hte nchyi nmu myit kahtet nga li ai. 116:4 Shaloi, ngai gaw, “ Madu e, ngai nang hpe hpyi nem nga nngai, ngai hpe hkye hkrang la e,” ngu nna dai Madu hpe shaga ni ai. 116:5 Dai Madu gaw matsan dum ai hte mai kaja ai wa rai nga ai; anhte a Karai Kasang gaw matsan chye dum ai wa rai nga ai. 116:6 Dai Madu gaw matsan mayan hkrum ai masha ni hpe makawp maga ya nga ai; ngai hkrit tsang hpa hkrum ai shaloi, shi ngai hpe hkye hkrang la sai. 116:7 Nye a myit masin e, dai Madu gaw nang hpe mai kaja ai chyeju madun dan nit dai majaw, kam hpa nga u. 116:8 Dai Madu gaw ngai hpe si ai kaw nna mung, nye a myi prwi pru ai kaw nna mung, nye a lagaw kashawt ai kaw nna mung, hkye hkrang la sai. 116:9 Dai majaw, hkrung nga ai ni a mungkan hta dai Madu a man e, ngai hkawm nga na nngai. 116:10 “Ngai gaw tsep kawp agrawp mani kau ai hkrum nga nngai,” nga nna tsun nga ai shaloi pyi, ngai kam sham nga dingyang naw rai nga nngai. 116:11 Ngai hkrit tsang ai aten hta pyi, “Kadai hpe mung n kam lu nga ai,” ngu nna tsun ni ai. 116:12 Dai Madu ngai hpe jaw ya ai chyeju nlang hte hpe, hpa baw hte wa daw jau lu na rai nga a ta? 116:13 Ngai hpe hkye hkrang la ai majaw, dai Madu hpe chyeju dum shakawn na matu; shi hpe sabyi hkungga nawng jau ya na nngai. 116:14 Ngai shi hpe ga shaka tawn da ai hte maren, shi a amyu masha ni yawng a hpawng hta, ngai dai hpe shatup na nngai. 116:15 Shi a amyu masha ni hta na langai mi si mat wa yang, dai Madu gaw kade wa gawng run machyi nga a hka? 116:16 Madu e, ngai gaw na a shangun ma wa rai nga nngai; nye nu galaw daw ai zawn ngai nang hpe daw jau nga na nngai. Nang ngai hpe si ai kaw na hkye hkrang la nit dai. 116:17 Chyeju dum hkungga ni hte ngai nang hpe nawng jau na nngai, nye a akyu hpyi ai ga hte nang hpe sak jaw na nngai. 116:18 Ngai nang hpe ga sadi tawn da ai hte maren, na a amyu masha ni yawng a hpawng hta mung, Yerusalem na na a chyoi pra ai Htingnu hta mung, dai ga sadi hpe ngai shatup na nngai. Dai Madu hpe shakawn mu!