Library · kac

Psalms 118

118:1 Dai Madu gaw mai kaja nga ai majaw, shi hpe chyeju dum mu; shi a tsaw ra myit htani htana agrin nga ai. 118:2 “Shi a tsaw ra myit htani htana agrin nga ai,” nga nna Israela amyu masha ni tsun nga mu ga. 118:3 “Shi a tsaw ra myit htani htana agrin nga ai,” nga nna Karai Kasang a hkinjawng ni tsun mu ga. 118:4 “Shi a tsaw ra myit htani htana agrin nga ai,” nga nna shi hpe nawku daw jau ai ni yawng hte mung tsun nga mu ga. 118:5 Ngai ru yak kyindut hkrum nga yang, dai Madu hpe ngai hpyi jahtau ni ai; shi ngai hpe htan ya nna ngai hpe shalawt dat ni ai. 118:6 Dai Madu ngai hte rau rai nga ai rai nna, ngai hpa hpe mung n hkrit nga nngai; Kadai wa ngai hpe hpa di lu na rai nga a ta? 118:7 Dai Madu ngai hpe karum ai wa rai nga ai majaw; nye a gumlau hpyen ni sum mat ai hpe ngai mu lu na ring ngai. 118:8 Masha hta shamyet shanat ai hta, dai Madu hpe kam hpa ai gaw grau nna mai kaja nga ai. 118:9 Masha a ningbaw ni hpe shamyet shanat ai hta dai Madu hpe kam hpa ai gaw grau nna mai kaja nga ai. 118:10 Gumlau hpyen law law wa, ngai hpe wang shinggrup da nga ma ti mung; dai Madu a daru magam n-gun hte shanhte hpe ngai shamyit kau lu nga nngai! 118:11 Shanhte ngai hpe jut shagu de nna wang da nga ma ti mung: dai Madu a daru magam n-gun hte shanhte hpe ngai shamyit kau lu nga nngai. 118:12 Shanhte gaw lagat ni zawn, ngai hpe ginjup shatsang nga ma ti mung; ju hpun hkru ai wan zawn, shanhte tin tin hkru krawp mat nga ma ai. Dai Madu a n gun atsam hte ngai shanhte hpe shamyit kau nngai. 118:13 Ngai gaw laja lana gasat ai hkrum nna, sum hkrum nga nngai; rai ti mung dai Madu ngai hpe karum la nga sai. 118:14 Dai Madu ngai hpe daru magam n-gun hte atsam marai jahpring ya nna; shi ngai hpe hkye hkrang la ni ai. 118:15 “Dai Madu gaw chyahtum chyalai n-gun hte mauhpa magam amu ni hpe galaw nu ai! 118:16 Shi a daru magam atsam hte anhte hpe awng padang lam jaw ya sai; shi a chyahtum chyalai n-gun hte majan hpe dang kau nu ai,” nga nna Karai Kasang a amyu masha ni shanu nga ai sum ni kaw nna kabu gara jahtau ai awng padang nsen ni hpe madat mu. 118:17 Ngai si wa na nngai n rai, de a malai, ngai hkrung nga nna, dai Madu galaw dan sai magam amu ni hpe htawn tsun dan nga na nngai. 118:18 Shi ngai hpe laja lana di nna ari jaw nga ti mung: shi ngai hpe si shangun nga ai n rai. 118:19 Nawku Htingnu chyinghka ni e, nye a matu hpaw malang nga u; ngai shang wa nna dai Madu hpe chyeju sa dum na nngai. 118:20 Da ndai gaw Madu a chyinghka rai nga nna, ding hpring ai ni chyu sha shang lu nga ai. 118:21 Madu e, nang ngai hpe htan ya nna, ngai hpe awng padang jaw ya nit dai majaw, ngai nang hpe shakawn na nngai. 118:22 Nta gaw ai ni lata kau sai nlung gaw, yawng hta grau ahkyak htum ai ningjut nlung tai wa ai. 118:23 Dai gaw Madu e galaw ai amu rai sai; dai gaw anhte a man na mauhpa amu rai nga sahka! 118:24 Dai ni na nhtoi gaw dai Madu a awng padang lu ai shani rai nga ai; anhte kabu gara nga let, masat poi galaw nga ga ai. 118:25 Madu e, anhte hpe hkye hkrang la mi, anhte hpe hkye hkrang la mi! Madu e, anhte hpe awng padang jaw ya mi! 118:26 Madu a mying nsang hte du sa ai wa hpe Karai Kasang shaman ya nga u ga! Madu a Htingnu kaw nna, anhte nang hpe shakawn ga ai. 118:27 Dai Madu gaw Karai Kasang rai nga ai, shi gaw anhte hpe chyeju jaw ya mani ai. Nanhte a lata ni hta hpun lakung ni hpe lang nna, poi hpang ai hte tawn hkungri hpe hkawm shinggrup nga mu. 118:28 Nang gaw nye a Karai Kasang rai nga ndai ngai nang hpe chyeju shakawn nga na nngai; na a galu kaba ai lam hpe ngai htawn tsun nga na nngai. 118:29 Shi mai kaja nga ai majaw, dai Madu hpe chyeju shakawn nga mu; shi a tsaw ra myit htani htana agrin nga ai law.