Library · kac

Psalms 135

135:1 Dai Madu hpe shakawn mu! 135:2 Dai Madu a nta wang hte anhte a Karai Kasang a Nawku Htingnu kata hta tsap nga ai Madu a shangun ma ni e, shi a mying nsang hpe shakawn mu. 135:3 Shi mai kaja nga ai majaw, dai Madu hpe shakawn mu; shi matsan dum nga ai majaw, shi a mying nsang hpe mahkawn shakawn nga mu. 135:4 Shi gaw Yaku hpe shi a matu, Israela amyu masha ni hpe shi madu na matu, lata la nu ai. 135:5 Anhte a Madu gaw galu kaba nga nna, hpara ni yawng hta grau nga ai hpe ngai chye nngai. 135:6 Sumsing lamu hte ginding aga hta e mung, panglai ni hte sung la ai shara shagu hkan e mung, shi myit ai hte maren, galaw nga ai. 135:7 Mungkan ga a jahtum shara kaw nna laru sumwi ni hpe shi sharawt dat nna; nbung laru a matu myi hprap wan gala ya ai hte shi a dum kata kaw nna, nbung hpe mung shapraw dat wu ai. 135:8 Egutu mung hta e, masha hte dusat kaw na kasha alat ni yawng hte hpe shi sat kau ya mu ai. 135:9 Dai mung hta e, Hpara-u hte shi a ali ama ni yawng hte hpe ari jaw na matu; lamik kumla ni hte mauhpa amu ni hpe shi shapraw dan nu ai. 135:10 Shi gaw amyu baw ni law law hpe shamyit kau nna; daru magam n-gun hte hpring ai hkawhkam ni hpe sat kau nu ai. 135:11 Amori masha ni a hkawhkam Sihon, Bashan hkawhkam Oga hte Hkanan mung na hkawhkam ni mahkra hpe mung sat kau nu ai. 135:12 Shi gaw shanhte a lamu ga ni hpe shi a amyu masha ni a lata hta ap ya nu ai; shi gaw dai lamu ga ni hpe Israela ni a lata hta jaw da nu ai. 135:13 Madu e, nang gaw Karai Kasang rai nga ndai hpe tut nawng e htawn tsun na mara ai; prat ban masha ni yawng hte mung nang hpe adum nga na mara ai. 135:14 Dai Madu shi a amyu masha ni hpe makawp maga nga nna; shi a shangun ma ni a ntsa e, matsan dum ai myit rawng nga na ra ai. 135:15 Masha amyu baw ni a hpara sumla ni hpe ja gumhpraw ni hte galaw da nna; dai ni gaw masha a lata hte tawk shapraw da ai sumla ni rai nga ai. 135:16 Shanhte hta n-gup tu ti mung, n lu shaga nga ma ai, myi tu ti mung, n mu lu nga ma ai. 135:17 Shanhte hta na tu ti mung, n na lu ma ai, shanhte gaw nsoi nsa pyi n lu sa nga ma ai. 135:18 Dai ni hpe tawk ai ni hte, shanhte hpe kam hpa nga ai ni yawng hte mung shanhte galaw ai sumla ni zawn rai mat na mara ai. 135:19 Israela amyu masha ni e, dai Madu hpe shakawn mu! Karai Kasang a hkinjawng ni e, shi hpe shakawn mu! 135:20 Lewi ni e, dai Madu hpe shakawn mu; dai Madu hpe nawku daw jau ai ni yawng hte e, shi hpe shakawn mu! 135:21 Ziun ntsa e mung, shi shanu nga ai Yerusalem hta mung, dai Madu hpe shakawn mu. Dai Madu hpe shakawn mu.