Library · kac

Psalms 137

137:1 Ziun mare hpe anhte myit dum dat ga ai shaloi, anhte gaw Babelon mung na hka nu, hka shi ni a makau hkan dung nga let, hkrap nga ga ai. 137:2 Dai makau mayang hkan tu nga ai u byap hpun ni hta anhte a tingse ni hpe noi da nga ga ai. 137:3 Anhte hpe rim da ai ni gaw, shanhte hpe mahkawn mangoi dan na matu tsun ma ai; shanhte gaw, “Ziun a mahkawn, anhte hpe mahkawn dan mi,” nga nna shanhte hpe shangwi shapyaw ya na matu, tsun ma ai. 137:4 Tsasam mungdan hta e, anhte kaning rai nna dai Madu hpe mahkawn shakawn lu na rai nga ga ta? 137:5 Yerusalem e, nang hpe ngai malap kau sayang gaw: tingse hpe galoi mung ngai n dum lu nu ga. 137:6 Nang hpe ngai malap kau nna, nang hpe nye a kabu htum ai shara hku n myit sawn kau ai rai yang, hpang de, ngai galoi mung bai n mahkawn shakawn lu nu ga! 137:7 Madu e, Yerusalem mare hpe dang la ai shani, Edom amyu masha ni galaw ai amu ni hpe dum nga u; “Ndai mare hpe ga du hkra run kau gaw!,” nga nna shanhte tsun ai ga ni hpe adum nga u. 137:8 Babelon e, nang gaw jahten kau ai hkrum na rin dai. Anhte hpe nang galaw mi ai hte maren, nang hpe bai tai lu ai wa gaw a nga ai. 137:9 Na a ma chyangai ni hpe la nna, nlung hta shanhte hpe adit kau ai wa gaw a nga ai.