Psalms 140
140:1 Madu e, n hkru n shawp ai masha ni a lata kaw na ngai hpe hkye hkrang la e; kashun kashe du daw sai hkaw shabyin ai masha ni a kata kaw nna mung, ngai hpe makawp maga la e.
140:2 Shanhte gaw tut nawng e, n hkru n shawp ai amu hpe maw mawn nga ma ai hte, tut nawng e, ga law ga la lam hpe shalut kabrawng dat ya nga ma ai.
140:3 Shanhte a shinglet ni gaw gung rawng ai lapu zawn rai nga nna, shanhte tsun shaga ai ga ni mung pu mawp a atuk zawn rai ma ai.
140:4 Madu e, n hkru n shawp ai ni a n-gun atsam kata kaw na, ngai hpe makawp maga la e; ngai hkrat sum mat na matu maw mawn nga ai, kashun kashe du daw sai hkaw shabyin ai masha ni a lata kaw na makawp maga la e.
140:5 Gumrawng gumtawng ai masha ni nye a matu mahkam hkam da nga masai; shanhte ngai hpe rim la na matu, lam e sumgawn nep da nna, mahkam galaw da nga masai.
140:6 Ngai gaw Madu hpe, “Nang gaw nye a Karai Kasang rai nga ndai,” ngu nna tsun nngai; Madu e, karum la na matu, nye a hpyi jahtau ai nsen hpe na ya e!
140:7 Nye a Grau Htum Ai Madu Chyahtum Chyalai n-gun hte hpring nga nna, ngai hpe makawp maga ai Madu e, nang gaw ngai hpe majan pa hta makawp maga ya nit dai.
140:8 Madu e, tara n lang ai wa a ra ai lam hpe hkum jaw ya et; shanhte a n hkru ai maw mawn lam ni hpe mung, hkum hkan ya nga et.
140:9 Nye a gumlau hpyen ni hpe awng padang hkum lu shangun nga et; ngai hpe jahkrit shama ai lam yawng mayawng mung shanhte a ntsa e, bai hkrat wa mu ga.
140:10 Shanhte a ntsa e, hkyeng kahtet nga ai n hprang wan n ga hkrat bun nga u ga; shanhte nhkun de di hkrat bang nna galoi mung bai n lu pru wa lu mu ga.
140:11 Masha kaga ni hpe masu magaw ga hte mara tam nga ai ni, hkrat sum nga mu ga; n hkru ai lam gaw kashun kashe du daw sai hkaw shabyin ai masha ni hpe hkan dep nang nna, shanhte hpe jahten kau mu ga.
140:12 Madu e, nang gaw matsan mayan ni a akyu hte, ra kadawn nga ai ni a ahkaw ahkang hpe makawp maga ya nga ndai gaw, ngai chye nga nngai.
140:13 Ding hpring ai masha ni nang hpe teng teng shakawn kungdawn wa na mara ai; shanhte gaw na a man e, shanu nga lu na mara ai.