Library · kac

Psalms 149

149:1 Dai Madu hpe shakawn mu! Dai Madu hpe mahkawn ga nnan hte mahkawn mu; shi a kangka ai amyu masha ni a hpawng hta, shi hpe shakawn mu! 149:2 Israela amyu masha ni e, nanhte a Hpan Madu a majaw kabu gara nga mu; Ziun a amyu masha ni e, nanhte a hkawhkam wa a majaw kabu gumrawng nga mu! 149:3 Shi a mying nsang hpe ka manawt let shakawn mu; chying bau ni hte tingse ni hpe dum nna shi hpe shakawn mu. 149:4 Dai Madu gaw shi a amyu masha ni hta awng sharawng nga nna; shagrit shanem ai ni hpe awng padang hte shi shagrau sha-a nga ai. 149:5 Karai Kasang a amyu masha ni gaw shanhte a awng padang lam hta kabu gara lu mu ga; kabu gara ai hte shana tup, shanhte mahkawn mangoi nga mu ga. 149:6 Masha amyu baw ni hpe awng dang kau na matu hte amyu masha ni hpe ari jaw na matu mung, 149:8 shanhte a hkawhkam ni hte mung du, salang ni hpe hpri sumri ni hte gyit nna, Karai Kasang a mungga hte maren, amyu baw ni hpe ari jaw na matu mung, Karai Kasang a amyu masha ni gaw shanhte a lata hta dai ai nhtu ni hpe lang da nna, nsen kaba hte jahtau let, Karai Kasang hpe shanhte shakawn mu ga. Ndai gaw Karai Kasang a amyu masha ni a awng padang lam rai nga ai. Dai Madu hpe shakawn mu!