Library · kac

Psalms 17

17:1 Madu e, teng man ai lam a matu, nye a hpyi nem ai ga hpe madat ya e; karum la na matu, nye a jahtau tsun ai nsen hpe na la ya e! Nye a ding man ai akyu hpyi ga hpe madat ya e. 17:2 Nang gaw ding hpring ai lam hpa rai nga ai hpe chye nga ndai majaw; nye a maga de tsap nna nang tara jeyang na rin dai. 17:3 Nang gaw nye a myit masin hpe chye ya nga ndai. Shana aten hta, nang gaw ngai kaw du sa nna, ngai hpe akri akrai san jep yu nit dai, ngai hta n hkru ai myit hpa mung n rawng nga ai hpe nang mu ya nga ndai. 17:4 Kaga masha ni zawn, n hkru ai ga ngai tsun ai n rai; ngai gaw na a hkang da ai ga hpe madat mara nga nngai hte kashun kashe du daw sai hkaw re ai lam ni hta hkan nang kau ni ai n rai. 17:5 Ngai gaw na a lam hta tut nawng e hkawm nga nngai; dai lam kaw nna galoi mung n yit yu nngai. 17:6 Karai Kasang e, nang ngai hpe htan ya ndai majaw, ngai nang hta akyu hpyi nga nngai. Dai majaw, ngai hpang de kayin wa nna, nye a ga ni hpe madat ya e. 17:7 Na a mauhpa tsaw ra myit madun dan nna ngai hpe hkye hkrang la e; na a makau e nga lu yang, ngai gaw nye a gumlau hpyen ni a lata kaw nna shim lum nga nngai. 17:8 Tara n lang ai ni a gasat gala ai hte law la ai hpyen ni ngai hpe wang shinggrup nga ai kaw na na a myi sha ni hpe nang makawp maga ndai zawn ngai hpe na a singkaw ni a shingnip a npu e makoi da e. 17:10 Shanhte gaw matsan dum ai myit n rawng ma ai hte gumrawng gumtawng ai myit hte tsun ma ai. 17:11 Ngai kayin hkawm ai shara shagu hte hta, ya e, shanhte ngai hpe wang shinggrup nga ma ai; ngai hpe gang jahkrat lu na ginjang hpe shanhte sin yu nga ma ai. 17:12 Shanhte ni gaw hkanghkyi ni zawn ngai hpe ashep ashin di nna, gang amya je kau na matu, gyem ai hte la nga ma ai. 17:13 Madu e, sa rit! Nye a gumlau hpyen ni hpe ninghkap nna, dang kau u! Tara n lang ai ni kaw na, na a nhtu hte ngai hpe hkye hkran la e. 17:14 Ndai prat hta shanhte ra mara mahkra hkam la lu ai ni a lata kaw nna, ngai hpe hkye hkrang la e; shanhte a matu, nang mahkawng da ya sai nni nkri lam ni hte shanhte hpe ari jaw u. Dai hpe shanhte a kashu kasha ni alaw ahtam hkam sha mu ga hte matut nna shanhte a shu mashi shu masha ban prat du hkra hkam sha nga mu ga. 17:15 Rai ti mung, ngai chyawm gaw shut hpyit ai amu hpa mung n galaw kau nga nngai majaw ngai nang hpe mu lu na ring ngai hte, ngai yup hprang wa ai shaloi, na a hpung shingkang gaw kabu gara ai hte ngai hpe jahpring ya na ra ai.