Psalms 20
20:1 Nang ru tsang hkrum nga ai shaloi, dai Madu gaw nang hpe htan ya u ga! Yaku a Karai Kasang gaw nang hpe makawp maga nga u ga!
20:2 Shi nang hpe shi a Htingnu kaw nna karum ai lam shangun dat u ga; Ziun bum kaw nna nang hpe karum ai lam jaw dat u ga.
20:3 Na a nawng jau ai hkungga ni yawng hte hpe shi hkap la u ga; na a shagu hkungga yawng hte hpe mung ra sharawng nga u ga.
20:4 Nang ra sharawng ai hpa hpe rai tim, shi nang hpe jaw ya u ga; na a yaw shada ai lam yawng mayawng hte hpe awng dang shangun u ga.
20:5 Shing rai, anhte gaw na a awng padang a majaw, kabu jahtau nga na ga ai; anhte a Karai Kasang hpe shakawn kungdawn ai hte na a awng padang ninglaw hpe masat poi galaw na ga ai. Na a hpyi lajin ai lam yawng mayawng hte hpe mung Madu htan ya nga u ga law.
20:6 Madu shi lata san da sai hkawhkam wa hpe awng padang ninglaw jaw ya nga ai lam, ya ngai chye ni ai; shi gaw shi a chyoi pra ai sumsing lamu kaw nna shi hpe htan ya nga ai hte shi a daru magam n-gun hte shi hpe hkik hkam ai awng padang ninglaw lam ni jaw ya nga ai.
20:7 Nkau mi shanhte a majan leng ni hte bai nkau mi shanhte a jawn gumra ni hpe kam hpa nga ma ai; rai ti mung, nanhte gaw anhte a Madu Karai Kasang a daru magam n-gun hpe kam hpa nga ga ai.
20:8 Shanhte ahtu ai hte kadawng mat wa ma ti mung, anhte rawt nna ngang ngang tsap nga lu na ga ai.
20:9 Madu e, hkawhkam wa hpe awng padang ninglaw jaw ya u; anhte shaga ai shaloi, anhte hpe htan ya mi law.