Psalms 29
29:1 Sumsing lamu na lamu kasa ni yawng hte e, dai Madu hpe shakawn kungdawn mu; shi a hpung shingkang hte daru magam n-gun hpe shakawn mu.
29:2 Hpung shingkang rawng ai dai Madu a mying nsang hpe shakawn mu; Chyoi Pra ai Wa dan pru ai shaloi, shi a man e, dingnyawm mu.
29:3 Dai Madu a nsen hpe, panglai hka ni a ntsa e, na lu nga ai; hpung shingkang dan hkung ai Karai Kasang a nsen gaw mu zawn ngoi nga ai, shi a nsen gaw nammukdara a ntsa e hpung tang kashaw nga ai.
29:4 Dai Madu a nsen hpe shi a n-gun kaba hte galu kaba ai lam yawng hta na lu nga ai.
29:5 Dai Madu a nsen gaw arit hpun ni hpe sha n rai, Lebanon arit hpun maling ni hpe pyi daw agrawp kau nga ai.
29:6 Lebanon bum ni hpe dumsu kasha ni zawn shi gumtawng shangun nna, Hermon Bum ni hpe usu kasha langai mi zawn gumlawt shangun nga ai.
29:7 Dai Madu a nsen gaw myi hprap wan hpe htoi gala shangun nga ai.
29:8 Shi a nsen gaw dai nam mali hpe ashun shangun nna, Kadesha a nam mali hpe shi awam wu ai.
29:9 Dai Madu a nsen gaw wamyi hpun ni hpe ashun dat nna, hpun lap ni hpe sharun kau wu ai shaloi, “Karai Kasang gaw hpung shingkang rawng nga u ga,” nga nna shi a Nawku Htingnu kata na masha shagu hte jahtau garu ma ai.
29:10 Dai Madu gaw sung ai hka ni hpe up nga ai; shi gaw htani htana hkawhkam hku up nga ai.
29:11 Dai Madu gaw shi a amyu masha ni hpe n-gun atsam jaw ya ai rai nna ngwi pyaw sim sa ai chyeju hte shanhte hpe shaman ya nga ai.