Library · kac

Psalms 37

37:1 N hkru n shawp ai ni a majaw myit hkum ru et; n teng n man ai amu galaw ai ni hpe hkum yu manawn et. 37:2 Hkraw mat ai tsingdu zawn, shanhte kade nna yang hkoi mat na mara ai; nyip mat ai hpun lawn kasha ni zawn shanhte si mat na mara ai. 37:3 Dai Madu hta kam hpa nga let mai kaja ai amu hpe galaw nga u; dai lamu ga hta shanu nga nna shim nga u. 37:4 Dai Madu hta na a kabu gara ai lam hpe tam la u; shi gaw na a myit ra sharawng ai lam hpe jaw ya na ra ai. 37:5 Na hkum dai Madu hpe ap ya u; shi hta kam hpa nga u, nang hpe shi karum la na ra ai. 37:6 Na a ding man ai lam hpe jan pungding shingkang zawn, shi shapraw dan na ra ai. 37:7 Dai Madu a man e amu sha nga nga nna shi shabyin ya na lam hpe ala nga u; n hkru n shawp ai ni a yaw shada ai lam ni hta awng dang wa nna, ngamu ngamai wa ai ni hpe hkum yu tsang nga et. 37:8 Myit hkum ru, masin mung hkum pawt et, dai gaw nang hpe ru tsang sha hkrum shangun nga ai. 37:9 Dai Madu hta kam hpa nga ai ni gaw lamu ga hpe madu lu na mara ai; rai ti mung, tara n lang ai ni chyawm gaw gawt shapraw kau ai hkrum na mara ai. 37:10 Tara n lang ai ni gaw kade nna yang, hkoi mat wa na mara ai; nang shanhte hpe tam yu ti mung, shanhte hpe mu tam na n rai. 37:11 Rai ti mung, myit shagrit shanem ai ni mahtang dai lamu ga hpe madu lu na mara ai; ngamu ngamai ai lam hte ngwi pyaw sim sa ai lam hpe kabu gara hkam la lu na mara ai. 37:12 N hkru n shawp ai masha wa gaw mai kaja ai masha wa hpe n kaja ai hku maw mawn nna shi hpe n ju n dawng ai myi hte yu azi da nga ai. 37:13 Rai ti mung, tara n lang ai ni gaw kade n na yang, jahten kau ai hkrum mat na hpe Madu chye nga ai majaw, shi shanhte hpe mani nga ai. 37:14 Matsan mayan ni hte ra kadawn ai ni hpe mung, teng man ai amu galaw ai masha ni hpe mung sat kau na nga; n hkru n shawp ai ni gaw shanhte a nhtu ni hpe shaw nna, ndan ni hpe shachyen nga ma ai; 37:15 rai ti mung, shanhte ni mahtang shanhte a nhtu ni hte nan sat kau ai hkrum na mara ai; shanhte a ndan ni mung agrawp daw kau ai hkrum na mara ai. 37:16 Mai kaja ai wa a sut gan kachyi mi gaw tara n lang ai wa a sut gan yawng hta grau nna manu dan nga ai, 37:17 hpa majaw nga yang, Madu gaw tara n lang ai wa a n-gun hpe shadaw kau ya na ra ai; rai ti mung, mai kaja ai ni hpe chyawm gaw shi makawp maga la na ra ai. 37:18 Dai Madu gaw shi a ga madat mara nga ai ni hpe shi lanu lahku nga nna; dai mungdan hpe shanhte htani htana madu na mara ai. 37:19 Yak hkak hkrum ai shaloi nni nkri hpe shanhte hkam sha na mara ai n rai; hku hku ai aten hta mung, shanhte gaw ra kadawn ai lam n nga hkra, hkam la lu na mara ai. 37:20 Rai ti mung, tara n lang ai ni gaw si mat na mara ai; Madu a gumlau hpyen ni mung nam e tu ai nampan ni zawn wai mat nna, wan hkut zawn shanhte mawng mat na mara ai. 37:21 Tara n lang ai masha wa gaw arai shap la ti mung, galoi mung nhtang ya nga ai n rai; rai ti mung, mai kaja ai wa gaw shi a kumhpaw kumhpa ni hpe ndaw nhta jaw ya nga ai. 37:22 Madu kaw na shaman ai chyeju lu la ai ni gaw lamu ga hpe madu lu na mara ai; rai ti mung, shi kaw na dagam dala hkrum ai ni chyawm gaw gawt shapraw kau ai hkrum na mara ai. 37:23 Dai Madu gaw masha wa hpe shi sa ang ai lam hta woi wa ai; shi hta sharawng awng ai ni hpe makawp maga ya nga ai. 37:24 Shanhte kataw ai lama rai yang, shanhte kataw nan nga na mara ai n rai; kaning rai nme law, Madu gaw shanhte hpe sharawt la na ra ai. 37:25 Ya chyawm gaw, ngai asak kaba ugut gu wa nga nngai, ngai gaw aten na na asak hkrung nga ni ai; rai ti mung, mai kaja ai masha wa hpe Madu kau da nna, shi a kashu kasha ni lusha hpyi sha hkawm ai hpe ngai galoi mung garai n mu yu nga nngai. 37:26 Shi gaw aten shagu, ndut ndang jaw ya ai hte kaga ni hpe hkoi ya nga ai; shi a kashu kasha ni mung chyeju kumhpa tai nga ma ai. 37:27 N hkru ai lam hpe kau da nna mai kaja ai amu hpe galaw u; shing rai, na a aru arat ni gaw dai lamu ga hta tut nawng e, shanu nga lu na mara ai; 37:28 hpa majaw nga yang, Madu gaw teng man ai lam hpe tsaw ra nga nna; kangka ai shi a amyu masha ni hpe n kau da nga ai majaw rai nga ai. Shi gaw shanhte hpe htani htana makawp maga nga ai, rai ti mung, tara n lang ai wa a aru arat ni gaw gawt shapraw kau ai hkrum na mara ai. 37:29 Ding hpring ai masha ni gaw lamu ga hpe madu lu na mara ai hte; dai lamu ga hta htani htana shanu nga na mara ai. 37:30 Mai kaja ai masha langai mi a n-gup ga ni hta hpaji ga rawng nga ai; shi gaw tut nawng e tara ding nga ai. 37:31 Shi gaw Karai Kasang a tara hpe shi a kraw lawang hta kyem da nga ai; dai tara hpe galoi mung ahkan sa nga na ra ai. 37:32 Tara n lang ai masha wa gaw mai kaja ai masha wa hpe lagyim yu nna; shi hpe sat kau na, shakut nga ai. 37:33 Rai ti mung, Madu gaw shi hpe shi a gumlau hpyen wa a lata hta ap kau da na wu ai n rai; shi tara jeyang ai hkrum yang, ari jaw ai hte daw dan hkrum na n rai. 37:34 Madu hta myit mada nga nna shi a hkang da ai ga ni hpe madat mara u; shi nang hpe lamu ga jaw ya nna, nang hpe shagrau sha-a na ra ai. Tara n lang ai ni gawt shapraw kau hkrum ai hpe nang mu lu na ra ai. 37:35 Tara n lang nna mazut gumshem nga ai wa hpe ngai lang mi chye yu ni ai; shi gaw Lebanon arit hpun zawn masha shagu a ntsa e, ka-up da nu ai; 37:36 rai ti mung, kade n na ai aten hta ngai lai wa yu ai shaloi dai shara hta shi n nga sai; shi hpe ngai tam yu tim, shi hpe n mu lu mat ni ai. 37:37 Mai kaja ai masha wa hpe matsing da u, ding hpring ai masha wa hpe maram masam yu u; ngwi pyaw sim sa ai masha wa gaw aru arat law law lu nga ai; 37:38 rai ti mung, yubak kap ai masha ni gaw tsep kawp jahten kau ai hkrum na mara ai; shanhte a aru arat ni mung yeng seng kau ai hkrum nga ma ai. 37:39 Dai Madu gaw ding hpring ai masha ni hpe hkye hkrang la nna, ru tsang hkrum ai aten ni hta shanhte hpe makawp maga ya nga ai. 37:40 Shi gaw shanhte hpe karum nna mawai la nga ai, shanhte gaw shi kaw makawp maga la na matu du sa nga ma ai majaw, shi shanhte hpe tara n lang ai ni a lata kaw nna hkye hkrang la nga ai.