Psalms 45
45:1 Hkawhkam wa a matu, ndai mahkawn hpe ngai jahtuk ai majaw; nye a myit masin hta tsawm htap ai ga ni hte hpring nga li ai. Kungkyang ai laika ka shara wa lang ai pen zawn, nye a shinglet gaw ga shagawp tsun na jin jin rai nga nngai.
45:2 Nang gaw lasha ni hta ahpraw tsawm htum ai wa rai nga ndai; nang gaw ga shaga ningtam rawng ai wa rai nga ndai. Dai majaw Karai Kasang nang hpe tut nawng shaman ya nit dai.
45:3 N-gun chyalai rawng ai hkawhkam wa e, na a nhtu hpye u; nang gaw hpung shingkang hte daru magam hpring nga ai wa rai nga ndai.
45:4 Teng man ai hte rap ra ai tara hpe makawp maga let awng dang ai kaw du hkra, hpung shingkang hta jawn sa wa u! Na a n-gun gaw nang hpe galu kaba ai awng padang ninglaw ni hpe hkam la shangun na ra ai.
45:5 Na a pala ni masen nga ai rai nna, na a gumlau hpyen ni a masin salum ni hpe galun htinggrang ya nga ai. Masha amyu ni mung na a lagaw nhpang e, dingnyawm na mara ai.
45:6 Karai Kasang nang hpe jaw ya nit dai mungdan gaw htani htana prat dingsa agrin nga na ra ai. Nang gaw na a amyu masha ni hpe teng man ai tara hte up hkang na ra ai rai nna,
45:7 ding man ai lam hpe nang tsaw ra nga ai hte, n hkru n shawp ai amu hpa hpe mung n dawng nga ndai. Dai re ai majaw, Karai Kasang na a Karai Kasang gaw nang hpe lata la nit dai; kaga hkawhkam kadai wa hta mung, grau nna kabu gara ai lam, nang hpe jaw ya nga nit dai.
45:8 Na a hpun palawng ni gaw mura, achyaw ni hte manam pyaw nga ai; tingse dum ai ni mung magwi kawng hte mawn sumli da ai hkawhkam htingnu ni hta nang hpe shangwi shapyaw ya nga ma ai.
45:9 Na a hkawhkam htingnu na shayi sha ni hta hkawhkam ni a shayi sha ni mung lawm nga ma ai; na a tingnyang a hkra maga de, htoi kabrim ai ja hte mawn sumli da nga ai hkawhkam jan tsap nga ai.
45:10 Hkawhkam wa a num nnan jan e, ngai hpa tsun na lam hpe madat la u; na a amyu masha ni hte na a makyin jinghku ni hpe malap kau u.
45:11 Na a tsawm htap ai ahpraw shingyan gaw hkawhkam wa hpe myit gang ra sharawng shangun na ra ai; shi gaw na a madu rai nga ai rai nna nang shi a ga hpe madat mara nga ra nga ndai.
45:12 Turu amyu masha ni nang hpe kumhpaw kumhpa sa jaw na mara ai; sut su ai ni mung na a myi man tam wa na mara ai.
45:13 Hkawhkam shayi sha gaw hkawhkam htingnu kata hta nga nga ai-shi gaw kade wa tsawm htap nga a hka! Shi a palawng galu ni hpe ja ri hte da da nga ai.
45:14 Nsam amyu hkum ai palawng galu ni hte sumli nna; shi a shingnan hkawn sek ni mung hkan bawp nang ma ai hte, hkawhkam wa hpang de sa wa ma ai.
45:15 Kabu gara re ai myi man hte shanhte pru sa wa nna; hkawhkam wa a hkaw de shang sa wa ma ai.
45:16 Nye a hkawhkam wa e, na a kaji kawa hkawhkam hkringhtawng matut hkam la lu na matu; nang hta shadang sha law law shaprat wa na ra ai, nang gaw shanhte hpe aga ting a ntsa e, du salang shatai na rin dai.
45:17 Nye a mahkawn ga gaw na a amying hpe htani htana dan hkung shangun na ra ai; masha shagu hte mung nang hpe prat ting shakawn kungdawn nga na mara ai law.