Psalms 49
49:1 Masha shagu, ndai ga hpe madat la mu! Shara shagu hkan na,
49:2 galu kaba ai hte kaji kadun nga ai ni, sut su ai ni hte matsan mayan masha ni n nga, yawng hte e, madat la mu.
49:3 Nye a myit sawn ai lam ni gaw asan sha rai na ra ai; ngai gaw hpaji ga ni hpe tsun na nngai.
49:4 Ngai gaw ga shagawp ni hte seng ai ga ni hpe tsun nna; dai ni a lachyum ni hpe tingse dum let shaleng dan na nngai.
49:5 Shanhte a sut gan ni hta kam hpa nga nna, shanhte a n taw n tsang sut su ai lam hta shakawng shakat rai nga ai n hkru n shawp ai ni hte gumlau hpyen ni a majaw ngai gaw wang shinggrup da hkrum nga nngai, ngai gaw hkrit tsang ra ai aten ni hta pyi n hkrit nga nngai.
49:7 Masha gaw shi a hkum hpe shi nan galoi mung hkrang la lu ai n rai; shi gaw Karai Kasang hpe shi a bunglat n jaw lu nga ai.
49:8 Hpa majaw nga yang, masha a asak bunglat gaw nau wa kaba la nga ai;
49:9 shi hpe lup wa de n shang hkra htani htana hkrung nga shangun lu na matu shi jaw lu ai manu gaw dang law nga ai n rai.
49:10 Hpaji chye chyang ai masha ni rai ti mung, angawk angak re ai hte mana ai masha ni du hkra pyi, si ai hpe n lai lu ai gaw, kadai mung chye lu nga ai. Shanhte yawng gaw shanhte a sut gan ni hpe shanhte a matu mara ni a matu, htawng da ya nga ai.
49:11 Shanhte gaw shanhte a lamu ga ni hpe kalang mi madu da yu sai ni rai nga ma ti mung; shanhte a lup sung hku ni gaw shanhte a htani htana dum nta rai nga ma ai; shanhte gaw dai shara hta aten tup rawng nga ma ai.
49:12 Masha a galu kaba ai lam gaw si ai kaw nna shi hpe n lu hkum da nga ai; shi gaw dusat ni zawn naw si wa na ra ai.
49:13 Shanhte a hkum ni hpe kam hpa nga ai ni hta hpa byin wa na lam hte shanhte a sut gan ni hta myit dik dum nga ai ni a gam maka hpa rai na re ai hpe yu yu mu.
49:14 Shanhte gaw sagu ni zawn si na matu dingnye lu ma ai, Si du gaw shanhte hpe rem ai sagu rem wa rai na ra ai. Shanhte a hkum tsawp ni gaw shanhte a dum nta hte tsan ai Katsan ga kaw alawan yat mat wa yang; dai ding hpring ai masha ni gaw shanhte hpe padang dip lu na mara ai.
49:15 Rai ti mung, Karai Kasang gaw ngai hpe mawai la nna; shi ngai hpe si du a lata kaw nna hkye hkrang la na ra ai.
49:16 Masha langai mi sut gan lu su wa nna; shi a sut gan n taw n tsang law htam jat wa ai shaloi, myit gale galau hkum rai nga et;
49:17 shi si wa yang, dai ni hpe shi hte rau la mat wa lu nga ai n rai; shi a sut gan ni shi hte rau lup sung hku kata de hkan shang lu ai n rai.
49:18 Masha langai wa mi gaw ndai prat hta e, myit dik dum nna, shi awng dang ai amu hta shakawn ai hkrum sha nga tim pyi,
49:19 shi si ai aten hta, shi a kaji kawa ni yawng nga ai htani htana sin mak ai shara hta rau wa nga na ra ai.
49:20 Masha a galu kaba ai lam gaw si ai kaw nna, dai ni hpe n lu hkum da nga ai; Shi gaw dusat ni zawn naw si wa na ra ai.