Psalms 70
70:1 Karai Kasang e, ngai hpe hkye hkrang la e! Madu e, ngai hpe ya jang, karum la e!
70:2 Ngai hpe sat na maw mawn ai ni tsep kawp sum mat nna shanut kau ai hkrum mu ga. Nye a ru tsang ai lam ni a majaw kabu gara nga ai ni gaw shingdu de nawku htingnut mat wa nna kaya kahpa hkrum sha nga mu ga.
70:3 Ngai hpe mani asawng ai ni gaw shanhte sum mat ai a jaw e, myi man sum mat mu ga.
70:4 Nang kaw du sa ai ni yawng hte gaw awng sharawng ai hte kabu gara nga mu ga. Na a hkye hkrang la ai lam hpe chyeju dum ai ni yawng hte gaw, “ Madu gaw kade wa galu kaba nga a hka!,” nga nna tut tut atsun nga mu ga.
70:5 O Karai Kasang e, ngai gaw gawng kya nga nngai hte matsan mayan re ai wa rai nga nngai; rai ti mung, nang gaw ngai hpe malap kau nga ndai n rai. Nang gaw nye a hkye hkrang la ai wa hte nye a Madu rai nga ndai. Ngai hpe karum la na tin tin du rit law!