Library · kac

Psalms 81

81:1 Anhte a dahpran shara Karai Kasang hpe kabu gara jahtau nga mu; Yaku a Karai Kasang hpe mahkawn shakawn nga mu! 81:2 Madum sumpyi shawng dum ai hte hpang wa mu, shup sheng ni hpe dum mu; pyaw ngawn ai tingse sumpyi hte daw raw ni hte dum mu. 81:3 Shata praw hte shagawng shani e, poi galaw na matu, pahtau dum mu. 81:4 Dai gaw Israela hta nga nga ai tara rai nga nna, Yaku a Karai Kasang kaw na lu la ai ga ndat rai nga ai. 81:5 Egutu mung hpe shi gasat ai shaloi, Israela amyu masha ni hpe jaw ya ai ga ndat rai nga ai. N chye na ai ga nsen langai mi hpe ngai na nngai, dai nsen gaw, 81:6 “Nanhte a shingma na lit ni hpe ngai shayu kau ya nna, nanhte a wut tawng hpai ai ka htang ni hpe ngai jahkrat da ya ni ai. 81:7 Nang ru tsang hkrum nga ai shaloi, ngai hpe shaga manit dai hte; ngai nanhte hpe hkye hkrang la ni ai. Nbung laru kata na, nye a makoi nga ai shara kaw nna ngai nanhte hpe htan ya mani ai. Meriba hka hpawk e, ngai nanhte hpe chyam yu made ai. 81:8 Nye a amyu masha ni e, ngai sadi jaw ai ga hpe madat la mu; Israela amyu masha ni e, ngai hpe madat ya na, ngai kade wa ra sharawng nga a hka! 81:9 Nanhte gaw kaga hpara shaje hpe galoi mung n nawku lu na rai myit dai. 81:10 Ngai nanhte hpe Egutu mung kaw nna shapraw la ai nanhte a Madu Karai Kasang rai nga nngai. Nanhte a n-gup ni hpe mahka mu, ngai nanhte hpe lusha jaw na mawe ai. 81:11 “Rai ti mung, nye a amyu masha ni ngai hpe madat na ma ai n rai; Israela amyu masha ni ngai hpe madat mara nga ma ai n rai. 81:12 Shing rai, shanhte a baw ja ai lam hku sa wa lu mu ga; shanhte ra mara hpe galaw lu mu ga, ngai shanhte hpe ahkang jaw dat nngai. 81:13 Nye a amyu masha ni ngai tsun ai ga hpe na ya na, ngai kade myit ra nga a hka; nye a a ga hpe shanhte madat mara ya na, ngai kade wa marit nga a hka! 81:14 Ngai gaw shanhte a gumlau hpyen ni hpe alawan sha dang kau ya nna; shanhte a hpyen ni yawng hpe shamyit kau na we ai. 81:15 Ngai hpe n ju n dawng nga ai ni mahtang nye a man e, hkrit kamyin ai hte dingnyawm wa nna; shanhte hkrum sha na ari mung htani htana rai na mu ai. 81:16 Rai ti mung, kaja htum ai hkaulan mam hte ngai shanhte hpe bau nna, nam na lagat jahku hte shanhte hpe myit dik hkra jahkru na mawe ai.”