Psalms 86
86:1 Madu e, ngai hpe karum la na masha n lu nga nngai hte gawng kya nga nngai majaw, ngai hpyi nem ai ga hpe madat ya nna htan ya e.
86:2 Ngai gaw nang hta sadi dung nga nngai majaw, si ai kaw nna ngai hpe hkye hkrang la e, ngai nang hta kam hpa nga nngai hte na a shangun ma rai nga nngai majaw, ngai hpe hkye hkrang la e.
86:3 Nang gaw nye a Karai Kasang rai nga ndai majaw, ngai hpe matsan dum la e; ngai shani tup, nang kaw akyu hpyi nga nngai.
86:4 Madu e, Nye a akyu hpyi ai ga ni nang kaw hkrang lung wa nga ai majaw; na a shangun ma wa hpe kabu shangun e law.
86:5 Nang gaw anhte a ntsa e, mai kaja nga nna mara dat kau ya nga ndai; nang kaw akyu hpyi nga ai ni yawng a matu, na a dinggrin tsaw ra myit hpe hpring hpring tsup tsup hkam sha shangun nga ndai.
86:6 Madu e, nye a akyu hpyi ai ga hpe madat ya e; karum la na matu ngai hpyi jahtau ai nsen ni hpe na ya e.
86:7 Nye a akyu hpyi ai ga hpe nang htan ya ndai majaw; ru tsang hkrum ai aten ni hta ngai nang hpe shaga nngai.
86:8 Madu e, nang hte bung ai karai langai mi mung n nga nga ai. Nang galaw da lu sai amu ni zawn, kadai mung n lu galaw nga ai.
86:9 Nang hpan tawn da ai masha amyu baw ni yawng hte gaw nang kaw sa nna dingnyawm wa na mara ai; shanhte gaw na a galu kaba ai lam hpe shakawn na mara ai.
86:10 Nang gaw galu kaba nga nna mauhpa amu ni hpe galaw nga ndai; nang chyu sha Karai Kasang rai nga ndai.
86:11 Madu e, nang ngai hpe galaw shangun mayu ai lam ngai hpe sharin ya e, ngai gaw na a ga hpe kangka ai hte madat mara nga na nngai; nang hpe tsep kawp ap nawng ai myit masin hte daw jau lu na lam, ngai hpe sharin ya e.
86:12 Madu nye a Karai Kasang e, ngai nang hpe nye a myit masin mahkra hte shakawn nga nngai; na a galu kaba ai lam hpe ngai htani htana htawn tsun nga na nngai.
86:13 Na a dinggrin tsaw ra myit gaw nye a matu kade wa kabu gara nga a hka! Nang gaw ngai hpe lup sung hku kaw nna nan hkye hkrang la nit dai.
86:14 Karai Kasang e, gumrawng gumtawng ai masha ni ngai hpe sa gumlang nga ma ai; nang hpe hpa zawn n nawn ai ni hte gumshem ai masha hpung mi gaw ngai hpe sat hkyen nga ma ai.
86:15 Rai ti mung, Madu e, nang gaw tsaw ra matsan dum ai Karai Kasang rai nga ndai; nang gaw tut nawng e hkam sharang ai, matsan dum ai hte sadi sahka nga ai wa rai nga ndai.
86:16 Ngai hpe mada mara ya nna matsan dum la e; ngai gaw nye nu daw jau ai zawn, ngai nang hpe daw jau ai majaw, ngai hpe n-gun shajat ya nna hkye hkrang la e.
86:17 Madu e, na a mai kaja ai sakse, ngai hpe madun dan e; nang ngai hpe jaw ya ai shangwi shapyaw lam hte karum la ai lam hpe mu ai shaloi, ngai hpe n ju n dawng nga ai ni kaya kahpa hkrum mat na mara ai.