Psalms 88
88:1 Ngai hpe hkye hkrang la ai Madu Karai Kasang e shani tup ngai nang hpe hpyi jahtau nna; shana e mung, na a man de du sa nngai.
88:2 Nye a akyu hpyi ai ga hpe na ya e; karum la na matu, nye a hpyi jahtau ai nsen hpe madat ya e!
88:3 Ngai ru tsang law law hkrum sha nga nngai majaw, si mahka de du nga ni ai.
88:4 Si hkyen wa nga ai kaga masha ni yawng zawn ngai rai nga nngai hte; nye a n-gun atsam ni yawng mung htawng mat nga li ai.
88:5 Ngai gaw si ai ni a lapran hta kabai da ai hkrum nga nngai; lasa si nna shanhte a lup sung hku kata kaw kaleng taw nga ai ni zawn ngai rai nga nngai. Dai ni hpe nang tsep kawp malap kau nna, shanhte gaw na a karum la ai lam hpe n hkam la lu ai ni rai nga masai.
88:6 Nang ngai hpe sin dik htum ai hte sung dik htum ai nhkun ngu ai; sung ai lup wa kata de kabai bang kau nit dai.
88:7 Na a masin kahtet ai lam gaw nye a ntsa e, li hkra gamyet da nga ai; dai masin kahtet ai hka leng ni a npu hta ngai ayai aya rai mat nga nngai.
88:8 Nang gaw nye a manang ni hpe ngai hpe kau da shangun nit dai; nang ngai hpe shanhte a man e, matsat shabat shatai kau nit dai. Ngai gaw la sharawng da ai hkrum nga nngai hte lawt lam hpe n mu lu ni ai;
88:9 nni nkri hkam sha ai majaw, nye a myi ni amam nga li ai. Madu e, ngai nang hpe shani shagu shaga nga nngai hte; nye a lata ni hpe sharawt nna, nang kaw akyu hpyi nga nngai.
88:10 Nang gaw si mat ai ni a matu lamik kumla ni hpe madun dan nga n ni? Shanhte rawt nna, nang hpe shakawn nga ma ni?
88:11 Lup sung hku kata e, na a dinggrin tsaw ra myit a lam hpe tsun kajai nga ma ni? Ngarai mung e na a sadi sahka lam hpe shanhte hkai nga ma ni?
88:12 Dai sin htat ai shara hta na a mauhpa lamik kumla ni hpe mu lu nga a ni? Malap kau hkrum ai masha ni a mung hta na a mai kaja ai lam hpe chye lu nga a ni?
88:13 Madu e, karum la na matu, ngai nang hpe shaga nga nngai; jahpawt shagu nang kaw akyu hpyi nga nngai.
88:14 Madu e, nang ngai hpe hpa majaw kau da nga n ta? Nang ngai kaw nna hpa majaw kayin mat wa n ni?
88:15 Ngai naw kaji nga ai aten kaw nna nni nkri hpe hkam sha ni ai gaw ganoi noi si hkra rai ni ai; nang jaw ai ari ahpri ni a majaw ngai hki ba la nga nngai.
88:16 Na a masin kahtet ai gaw ngai hpe agrawp ayai kau nna; nang ngai hpe gasat ai majaw, ngai hpe jahten kau nga ai.
88:17 Shanhte ngai hpe mawru hka zawn shani tup gawan da nna; ngai hpe wang shinggrup da nga ma ai.
88:18 Nang gaw nye a ni dik ai manang ni hpe kau da shangun nit dai; sin htat ai nsin chyu sha nye a manang rai nga sali ai.