Library · kac

Proverbs 15

15:1 Si mani hte htan ai ga gaw myit kahtet ai hpe shakawp ya lu tim; kajet kajau re ai ga chyawm gaw pawt sindawng ai hpe shalut kabrawng ya nga ai. 15:2 Hpaji rawng ai ni tsun shaga yang, machye machyang hpaji hpe ningja shapraw ya nga ai; angawk ai masha ni chyawm gaw lachyum n pru ai ga hpe tsun shapraw nga ma ai. 15:3 Dai Madu gaw shara shagu hkan hpa baw byin nga ai hpe, mu chye nga ai; anhte kaja ai hte n hkru ai amu galaw nga ai hpe mung, shi yu nga ai. 15:4 Matsan dum lama ai ga gaw asak rai nga ai, mazut ai ga gaw na a wenyi hpe gawng sharun ya nga ai. 15:5 Na a nwa sharin shaga ai lam hpe n hkap la ai gaw angawk angak lam rai nga ai; shi a shading sharai ai ga matsun hpe hkap la ai gaw hpaji rawng nga ai. 15:6 Ding hpring ai masha ni gaw shanhte a sut gan ni hpe kyem mazing da nga ma ai; tara n lang ai masha ni ru yak kyindut hkrum sha wa ai shaloi, shanhte a sut gan ni hpe shamat kau nga ma ai. 15:7 Chye chyang ai hpaji gaw angawk ai ni kaw na n rai; hpaji rawng ai ni kaw na chyam bra wa nga ai. 15:8 Dai Madu gaw mai kaja ai masha ni a akyu hpyi ga hta awng sharawng nga ai; tara n lang ai masha ni la sa ai shagu hkungga ni hpe shi n dawng nga ai. 15:9 N hkru ai masha ni a lam hpe dai Madu matsat nga ai; jaw ai amu galaw ai ni hpe shi tsaw ra nga ai. 15:10 Shut hpyit ai amu hpe nang galaw ai rai yang, laja lana re ai ari nang hkrum sha na ndai; nang hkum nan shading sharai n hkam ai rai yang, si na rin dai. 15:11 Katsan ga pyi gaw dai shara hta hpa nga nga ai hpe Madu n chye hkra, n magap da lu nga ai; shing re ai rai yang, shinggyim masha a myit mang ai lam gaw Karai Kasang a man kaw nna kaning rai makoi magap da lu na rai nga a ta? 15:12 Rai dum ai masha ni gaw shading sharai na hpe n ra sharawng nga ma ai; shanhte gaw hpaji grau rawng ai ni kaw nna hpaji jaw ga ni hpe galoi mung n hpyi lajin nga ma ai. 15:13 Masha ni kabu gara nga yang, shanhte mani sumsai rai nga ma ai; shanhte yawn hkyen hkrum hkra ai shaloi, shanhte a myi man hta myit daw ai nsam hpe mu lu nga ai. 15:14 Zai byeng-ya rawng ai masha ni gaw sharin la na matu, ra sharawng nga ma ai; myit n su ai masha ni gaw n chye n chyang ai lam hta myit dik nga ma ai. 15:15 Matsan mayan re ai wa a asak hkrun lam gaw dingngam malan dating shakut shaja sha ra nga ai; kabu gara ai masha ni chyawm gaw tut nawng e, pyaw ai asak hkrun lam hpe hkam sha nga ma ai. 15:16 Matsan hkam let, Madu hpe hkrit hkungga ai lam gaw sut su nna nni nkri hkrum sha ai hta grau mai kaja nga ai. 15:17 Nang tsaw ra ai masha ni hte rau namlaw namlap shatmai jawm sha ai gaw n ju n dawng ai shara hta mu mai ai shan lusha jawm sha ai hta grau mai kaja nga ai. 15:18 Masin kahtet ai gaw ndang kalang hpe shabyin nga ai; hkam sharang ai gaw ngwi pyaw sim sa lam hpe jaw ya nga ai. 15:19 Nang lagawn nga ai wa rai yang, mayak mahkak lam hpe shara shagu hkan nang hkrum kadup na ndai; rai ti mung, nang myit malang nga ai wa rai yang chyawm, gaw ru yak tsin-yam nang hkrum hkra na rin dai n rai. 15:20 Hpaji rawng ai kasha gaw shi a kawa hpe kabu shangun nga ai; angawk ai kasha chyu sha, kanu hpe n kaw n law di nga ai. 15:21 Myit n su ai masha ni gaw shanhte a angawk ai lam hta kabu nga ma ai; hpaji rawng ai wa gaw jaw ai amu hpe galaw na ra ai. 15:22 Hpaji jaw ai lam mahkra hpe, nang dang lu ai made hkam la u; shing rai jang, nang awng dang wa na ra ai; dai lam ni hpe n hkam la ai rai yang, nang hkrat sum na rin dai. 15:23 Ra ahkyak ai aten hta ra ahkyak ai ga hpe tsun shaga lu ai gaw gade wa kabu gara shara rai nga a hka! 15:24 Hpaji rawng ai masha ni gaw katsan ga de hkrang ai lam de n yu wa ai sha, asak hkrung ai lam de hkawm lung wa nga ma ai. 15:25 Dai Madu gaw gumrawng gumtawng ai masha ni a dum nta ni hpe jahten kau ti mung; gaida gaina jan ni a sut gan arung arai ni hpe chyawm gaw, makawp maga ya na ra ai. 15:26 Dai Madu gaw n hkru n shawp ai myit mang lam ni hpe n dawng nga ai; ngwi ngawn ai ga ni hpe chyawm gaw shi awng sharawng nga ai. 15:27 Amyat hpe n ding n man ai hku, tam shakut ai rai yang, na a dinghku masha ni ru yak shoihpa hkrum hkra nga ai. Mayun kumhpa n la ai rai yang, nang asak galu na ra ai. 15:28 Mai kaja ai masha ni gaw shanhte ga garai n htang yang, shawng myit yu nga ma ai; n hkru ai masha ni chyawm gaw ga htan lawan nna, dai gaw ru yak tsin-yam shabyin ya nga ai. 15:29 Mai kaja ai masha ni akyu hpyi ma ai shaloi, dai Madu gaw madat ya nga ai; n hkru ai masha ni a akyu hpyi ga hpe chyawm gaw hpa n sawn ya nga ai. 15:30 Mani sumsai myi man ni gaw nang hpe kabu shangun nna; kaja ai shiga gaw nang hpe grau kabu shangun nga ai. 15:31 Nang gaw shading sharai hkam nna madat mara ai wa rai yang, hpaji rawng nga ndai. 15:32 Sharin achyin ai ga hpe nang lale kau ai rai yang, dai gaw na hkum hpe machyi jahkrum nga ndai; shading sharai ai ga hpe nang hkap la ai rai yang chyawm gaw, hpaji grau rawng ai masha nang tai wa na rin dai. 15:33 Dai Madu hpe hkrit hkungga ai gaw hpaji nan rai nga ai; nang shagrit shanem chye yang sha, shagrau sha-a ai hpe hkam la lu nga ai.