Library · kac

Song of Songs 2

2:1 Ngai gaw Sharon pa na nam nampan, bum kadit hkan e tu ai hka law pan sha rai nga nngai. 2:2 Ju sumwum lapran hkan tu ai hka law pan zawn nye a nja jan mung numsha ni a ka-ang e rai nga ai. 2:3 Maling htinggram hpun ni a lapran tu ai ja magaw hpun langai zawn, ngai tsaw ra dik htum ai wa mung kaga lasha ni hte shadawn dingdaw lu nga ai. de a asi gaw nye a namchyim hta dwi nga ai rai nna, de a shingnip hta dung nga na ngai tsaw nngai. 2:4 Shi gaw ngai hpe poi galaw ai shi a gawknu de woi wa nna nye a ntsa e tsaw ra dawnghkawn sharawt da nga ai. 2:5 Nye a n-gun hpe sabyi si jahkraw ni hte n-gun ban ya nna; ja magaw si ni hte ngai hpe n-gun awai ya nga a hka! Ngai gaw tsaw ra machyi hte gawng kya nga nngai. 2:6 Shi a pai lata nye a baw npu e nga nga ai; shi a hkra lata ngai hpe ahpum da nga ai. 2:7 Yerusalem numsha ni e, ngai hpe ga sadi jaw mi; anhte a tsaw ra myit hpe nanhte ginjang n shawn lu myit ga, laram ai chyahkyi hte shannga ni hta dagam da nngai. 2:8 Nye a tsaw ra nja wa a nsen hpe ngai na nngai. Shi gaw bum ni hpe kagat lai nna kawng ni hpe shingtawt ai hte ngai kaw du sa ai. 2:9 Nye a tsaw ra wa gaw chyahkyi langai zawn rai nna shan-nga kasha hte mung bung nga ai. Yu u, shi gaw bunghku makau e tsap nga ai. Shi gaw hkuwawt hku mada yu nhtawm hkinchyi hku hku praw rai mada yu nga ai. 2:10 Nye a tsaw ra nja wa ngai hpe ga shaga nga ai. Nye a nja jan e, sa rit; nye a tsaw jan e, ngai hte rau sa wa ga. 2:11 Nshung ta lai sai; marang mung hpawng sai; 2:12 nampu nampan ni pa hkan e pu nga sai. Ndai aten gaw mahkawn kashai ai aten rai nna; hkrudu ni tut du du ai nsen hpe pa hkan e na lu nga ai. 2:13 Lakum si ni mying hpang wa sai; sabyi ru ni mung pu pu nga ai; de a manam pyaw bat gaw nbung hta mawng nga ai. Nye a nja jan e, sa rit; nye a tsaw ra nja jan e, ngai hte rau sa wa ga. 2:14 Nang gaw lungkrawp hkan makoi nga ai hkrudu zawn rai nga ndai. Tsaw ra mai ai na a myi man ngai mu lu n-ga; na a ngwi ngawn ai nsen hpe na lu n-ga law. 2:15 Chyahkyawn ni, chyahkyawn kasha ni, sabyi sun na pu pu nga ai sabyi ru ni hpe garai n jahten sharun kau lu yang, dai ni hpe rim kau u. 2:16 Ngai tsaw ra ai wa gaw nye a matu rai nga ai, ngai mung shi a matu rai nga nngai. Shi gaw hkalaw prang yang e shi a sagu hpung hpe 2:17 jahpawt bungli bung wa ai aten kaw nna nsin garai n sin ai aten du hkra shayaw da nga ai. Nye a tsaw ra wa e, chyahkyi zawn mung, Behtera bum ntsa na shan-nga zawn mung nhtang wa rit.