Leviticus 3
3:1 Nanhte hta na kadai rai ti mung, na a dumsu langai ngai hte mahku hkungga nawng ya ai shaloi dai gaw ra n rawng ai usu shing n rai uyi rai na rai nga ai.
3:2 Dai wa gaw hkungga shatai na yam nga a baw hta shi a lata mara nna dai Madu a hpung shingkang shanu nga ai Sum a shang wa chyinghka lam e dai hpe sat na rai wu ai. Arun a shadang sha hkinjawng ni gaw de a asai hpe tawn hkungri a man mali grup grup de lapri ai hte,
3:3 dai Madu a man e lusha hkungga shatai na dai yam nga kaw na sau rap hte pu kan hta na sau yawng,
3:4 sade tawng lahkawng hte sin hta na kaja htum ai ni hpe sak jaw na rai nga ai.
3:5 Dai hkinjawng ni gaw dai yawng hpe tawn hkungri ntsa nat da ai wan nat hkungga ni hte hpawn nat shalawm na rai ma ai. Dai lusha a manam pyaw ai sangau hpe dai Madu awng sharawng nga ai.
3:6 Sagu bainam hte mahku hkungga galaw ai rai yang, dai gaw ala shing n rai ayi rai na rai nga ai; rai ti mung ra n rawng ai rai lu na rai nga ai.
3:7 Sagu nawng ai rai yang,
3:8 de a baw hta shi a lata mara nhtawm, dai hpe Sum a man e sat na rai wu ai. Hkinjawng ni gaw de a asai hte tawn hkungri a man mali grup grup de ru hkaw ai hte dai Madu a man e,
3:9 lusha hkungga shatai na dai yam nga kaw na sau man, marung jahtum na nmai pawt, pu kan hta na sau yawng,
3:10 sade tawng lahkawng hte dai hta kap ai sau, hte sin na kaja htum ai ni sak jaw na rai nga ndai.
3:11 San da hkrum ai hkinjawng wa gaw dai yawng hpe tawn hkungri ntsa mara nhtawm dai Madu hpe lusha hkungga hku nawng na rai nga ai.
3:12 Bainam hpe shi nawng ya ai rai yang,
3:13 de a baw ntsa hta shi a lata mara nhtawm dai hpe Sum a man e sat na rai wu ai. Hkinjawng ni gaw de a asai hpe tawn hkungri a man mali grup grup de lapri ai hte,
3:14 dai Madu a man e lusha hkungga shatai na dai yam nga a pu kan na sau yawng,
3:15 sade tawng lahkawng hte dai hta kap ai sau, sin hta na kaja htum ai ni yawng hpe sak jaw na rai nga ai.
3:16 Dai Madu gaw lusha hkungga hpe awng sharawng nga ai rai nna hkinjawng wa gaw dai yawng hpe tawn hkungri ntsa e nat nawng na rai wu ai. Sau yawng mung dai Madu a matu rai nga ai.
3:17 Israela amyu masha ni kadai mung sau man hte asai sha lu na n rai; dai gaw Israela amyu masha ni yawng shanu nga ai shara shagu hta prat tup hkan galaw shadik shatup na hkang da ai ga matsun rai nga ai.