Amos 7
7:1 Ngai gaw Tsaw Htum ai dai Madu kaw na shingran langai lu la nngai. Dai shingran hta hkawhkam wa a yihku gambum dan ngut ai hpang, tsing nnan prut wa ai aten hta dinggam-yaw wunawng wuwa hpan dat ai hpe ngai mu nngai.
7:2 Nye a shingran hta dinggam-yaw ni mungdan na tsit lali ai lap yawng sha kau nga ai hpe mu nngai, dai hpang ngai gaw, “Tsaw Htum ai Madu e, na a amyu masha ni hpe mara dat ya u! Shanhte kaning rai hkrung lu na rai ma ta? Shanhte gaw grai kaji ai hte n-gun kya ai ni rai nga ma ai!,” ngu nna tsun we ai.
7:3 Dai Madu gaw shi a myit galai mat nna, “Nang mu ai lam gaw byin wa lu na ra ai n rai,” ngu nna tsun wu ai.
7:4 Ngai gaw kaga shingran langai mung Tsaw Htum ai Madu kaw na lu la nngai. Dai shingran hta shi a amyu masha ni hpe wan hte ari jaw hkyen nga ai hpe mu nngai. Dai wan gaw mungkan ga a npu tsang hta nga ai nammukdara hka kaba hpe hkru kau nna mungkan ga a lamu ga hpe mung hkru magang shangun nga sai.
7:5 Dai hpang ngai gaw, “O Tsaw Htum ai Madu e, jahkring kau u! Na a amyu masha ni kaning rai hkrung nga lu na rai ma ta? Shanhte gaw grai kaji ai hte n-gun kya nga ma ai!,” ngu nna tsun we ai.
7:6 Dai Madu gaw shi a myit bai galai mat nna, “Dai gaw byin wa na ra ai n rai,” ngu nna tsun wu ai.
7:7 Ngai gaw dai Madu kaw na shingran kaga lu la nngai. Dai shingran hta, shadawn sumri hte shading nna gaw gap da sai bunghku makau e shadawn sumri hpe shi a lata hta lang nna tsap nga ai hpe ngai mu nngai.
7:8 Shi gaw ngai hpe, “Amo e, nang hpa mu n ta?,” ngu nna san wu ai. Ngai gaw, “Shadawn sumri langai,” ngu nna htan we ai. Dai hpang, shi gaw, “Nye a amyu masha ni gaw n ding ai bunghku zawn rai nga ma ai hpe madun dan na matu dai hpe ngai lang nngai. Shanhte hpe ari jaw na lam hte seng nna nye a myit bai galai mat na ra ai n rai.
7:9 Isak a amyu matu mara ni nawku ai shara ni jahten shaza hkrum na mara ai. Israela a chyoi pra ai shara ni hten run taw mat na mara ai. Ngai gaw Hkawhkam Yeroboam a magam matu hpe jahtum kau na nngai,” ngu nna tsun wu ai.
7:10 Behtela na hkinjawng Amazia gaw Israela a Hkawhkam Yeroboam hpang de ning ngu shiga shana dat wu ai: “Amo gaw amyu masha ni a lapran e nang hpe gumlau na matu maw mawn nga ai. Shi a tsun shaga ai ga ni gaw mungdan hpe jahten nga ai.
7:11 Ndai gaw shi tsun ai ga rai nga ai: ‘Yeroboam gaw majan hta si mat na ra ai, Israela amyu masha ni gaw shanhte a mungdan kaw na bawng rim hkrum mat wa na mara ai.’”
7:12 Dai hpang, Amazia gaw Amo hpe, “Myihtoi wa e, ram sai! Yuda mung de bai nhtang wa nna dai shara hta mungga htawn tsun u. Dai amu a matu shanhte nang hpe shabrai jaw mu ga.
7:13 Ndai Behtela e galoi mung myihtoi hkum htoi sa. Ndai shara gaw hkawhkam wa a nawku shara ngu ai amyu sha ting hte seng ai nawku htingnu rai nga ai,” ngu nna tsun wu ai.
7:14 Amo gaw, “Ngai gaw shabrai a matu dai zawn myihtoi htoi ai wa n rai nngai. Ngai gaw yam nga rem sha ai wa hte lakum hpun ni hpe yu lajang ai wa she rai nngai.
7:15 Rai ti mung, dai Madu gaw yam nga rem nga ai nye bungli kaw na shaga la nhtawm shi a amyu masha Israela ni hpang de sa nna myihtoi htoi na matu hkang dat nga ai.
7:16 Dai rai nna, ya chyawm gaw dai Madu tsun ai ga hpe madat u. Nang gaw ngai hpe myihtoi n htoi na matu mung, Israela amyu masha ni hpe ninghkap tsun ai ga jahkring na matu tsun ndai.
7:17 Dai rai nna, Amazia e, dai Madu gaw nang hpe, ‘Na a madu jan gaw mare hta shawa num tai na ra ai, na a kashu kasha ni majan hta sat kau hkrum na mara ai. Na a lamu ga gaw karan kau hkrum nhtawm kaga ni hpe jaw kau ra na ra ai, nang nan gaw n san n seng ai mung hta si na rai ndai. Israela amyu masha ni gaw kaja wa shanhte a mung kaw nna bawng dung hkrum mat wa na mara ai,’” ngu nna tsun wu ai.