Numbers 17
17:1 Dai Madu gaw Mawshe hpe,
17:2 “Amyu bawsang shagu a ningbaw kaw na dawhkrawng shi lahkawng nang hpe sa jaw na matu Israela masha ni hpe tsun u;
17:3 Lewi amyu a malai dai dawhkrawng ntsa hta Arun a mying hpe ka na rai ndai. Dai gaw amyu bawsang shagu hte seng ai ningbaw shagu a matu dawhkrawng langai ngai rai na rai nga ai.
17:4 Dai ni hpe nye a hpung shingkang shanu nga ai Sum de la shang wa nhtawm ngai nang hte hkrum hkrum re ai Ga Shaka Sumpu a man e tawn da u.
17:5 Dai hpang ngai lata la ai wa a dawhkrawng gaw maku ku na ra ai. Dai lam hku nna nang hpe ninghkap ai ndai Israela masha ni a n htum n mat hkraw ai aput angun ga hpe ngai shangap kau lu na rai nngai,” ngu nna tsun wu ai.
17:6 Dai rai nna Mawshe gaw Israela amyu masha ni hpe tsun dat mu ai rai nna shanhte a ningbaw shagu hte mung, amyu baw shagu a matu dawhkrawng langai ngai la nhtawm dawhkrawng shi lahkawng sa ya ma ai. Arun a dawhkrawng mung dai ni hte rau tawn da nga ai.
17:7 Dai hpang Mawshe gaw Sum kata na dai Madu a Ga Shaka Sumpu a man e dai dawhkrawng ni yawng tawn da wu ai.
17:8 Hpang shani e, dai Sum kata de Mawshe shang yu wu yang, Lewi amyu bawsang a malai tawn da ai Arun a dawhkrawng mahtang alap lap ai hte pu majawm nna pu lagra ai hte myin ai batan si si nga ai!
17:9 Mawshe gaw dawhkrawng yawng la nna Israela amyu masha ni hpe madun dan wu ai. Shanhte mung byin ai lam hpe yu yu nna, ningbaw shagu tinang a dawhkrawng bai la shajang ma ai.
17:10 Dai Madu gaw Mawshe hpe, “Ga Shaka Sumpu a man e Arun a dawhkrawng hpe bai tawn da u. Dai gaw gumlau ai Israela masha ni a matu sakse kumla tai na ra ai rai nna shanhte a aput angun ai hpe n jahkring kau ai rai yang, si na rai ma ai,” ngu nna tsun wu ai.
17:11 Mawshe mung dai Madu hkang da sai hte maren galaw wu ai.
17:12 Israela amyu masha ni mung Mawshe hpe, “Yu u, dai gaw anhte a matu jahtum rai nga sai!
17:13 Sum de sit sa ai ni kadai mung si lu na rai nga ai; dai re ai majaw anhte yawng mayawng wa si htum mat na saga ai!,” ngu nna tsun ma ai.