1 Corinthians 2
2:1 Hpu nau ni e, Karai Kasang a makoi magap da ai teng man ai mungga hkaw tsun dan na matu ngai nanhte kaw sa du ai shaloi, reng ai ningtam ga kaba ni hte hpaji byeng-ya hte seng ai ga kaba ni hpe ngai n lang nngai.
2:2 Hpa majaw nga yang, ngai nanhte hte rau nga nga ai ten hta, Yesu Hkristu a lam, grau nna wudang ntsa e Madu si hkam ai lam hta jan nna kaga lam nga manga hpe malap kau na matu ngai myit daw dan da se ai.
2:3 Dai rai nna, ngai nanhte kaw sa du nga ai ten hte ting hta gawng kya ai hte hkrit gari let,
2:4 nye a tsun sharin shaga ai lam hte hkaw tsun ai mungga ni hpe masha a hpaji byeng-ya ladat hte seng ai ga ni hpe n lang ai sha, Karai Kasang a Wenyi atsam lawm ai ga ni hpe sha lang nngai.
2:5 Dai re ai majaw, Karai Kasang hpe nanhte kam sham ai lam gaw, masha a hpaji byeng-ya hta n shamyet shanat ai sha, Karai Kasang a Wenyi atsam hta shamyet shanat grin nga ai.
2:6 Rai ti mung ngai gaw, Wenyi makam masham lam hta myit su kunghpan sai ni hpe hpaji byeng-ya hte kapyawn nna tsun dan nngai. Rai ti mung dai gaw ndai mungkan ga hte seng ai hpaji byeng-ya n rai; mungkan ga na du ni a hpaji byeng-ya atsam mung n rai; mungkan du ni a n-gun atsam gaw sum mat wa magang nga ai.
2:7 Ngai hkaw tsun ai hpaji byeng-ya gaw masha amyu ni n mu n chye hkra makoi magap da ai Karai Kasang a sung htum ai hpaji byeng-ya a lam rai nga ai. Dai gaw ginding aga garai n lat kaw nna anhte hpung shingkang hkam la na matu Karai Kasang tawn da ai yaw shada ai lam rai nga ai.
2:8 Mungkan a du hkawhkam ni hta na kadai wa mung ndai hpaji byeng-ya hpe chye ma ai n rai; chye taw gaw, hpung shingkang rawng ai Madu hpe shanhte wudang hta jen da na ma ai n rai.
2:9 Rai ti mung Chyum Laika hta, “Kadai n mu n na yu ai lam, byin na re ai ngu nna kadai n myit hkawn pru ai lam hpe Karai Kasang gaw shi hpe tsaw ra ai ni a matu mara lajang da nga ai,” nga nna ka da nga ai.
2:10 Karai Kasang chyawm gaw shi a Wenyi hku nna shi a makoi magap da ai lam anhte hpe shapraw shadan dan mi ai. Dai Wenyi gaw arai yawng mayawng hpe sha n rai, Karai Kasang a sung htum ai hte makoi magap da ai shatawng shada ai lam ni hpe pyi manaw sawk yu nga ai.
2:11 Masha langai mi a lam nga manga hpe dai wa a kata hta rawng ai shi nan a wenyi chyu sha chye lu nga ai, dai hte maren Karai Kasang a Wenyi chyu sha Karai Kasang a lam chye lu nga ai.
2:12 Anhte chyawm gaw ndai mungkan hte seng ai wenyi hpe hkam la saga ai n rai, Karai Kasang anhte hpe jaw da ai chyeju nlang hte hpe lu la u ga, Karai Kasang e shangun dat ai Wenyi hpe hkam la saga ai.
2:13 Dai re ai majaw, Wenyi hpe hkam la sai ni hpe Wenyi hte seng ai teng man ai lam ni hpe hkaw tsun htai dan ai shaloi, anhte gaw masha a hpaji ga ni hte n tsun shaga ai sha, Wenyi e sharin shaga ai ga ni hte she tsun shaga ga ai.
2:14 Dai Wenyi hpe n hkap la ai, mi na ta naw re ai shinggyim masha kadai mung, Karai Kasang a Wenyi e jaw ai chyeju kumhpaw kumhpa ni hpe n hkam la lu nga ai. Dai ni gaw shi a matu angawk angak lam rai nga ai rai nna, Wenyi myit e sha dai lam ni a manu hpe daw dan ya lu nga ai majaw, shi gaw dai hte hpe chye na lu ai n rai.
2:15 Wenyi rawng ai wa chyawm gaw arai yawng mayawng a manu rawng ai lam hpe daw dan lu nga ai; shi hpe mahtang gaw kadai e mung daw dan lu ai n rai.
2:16 Dai Chyum Laika hta, “Kadai wa mi dai Madu a myit hpe chye lu a ni? Kadai wa mi shi hpe hpaji jaw sharin achyin ya lu a ni?,” nga nna ka da nga ai hte maren rai nga ai. Anhte chyawm gaw Hkristu a myit hpe lu ai ni rai nga ga ai.