Deuteronomy 34
34:1 Mawshe gaw Moba pa kaw nna, Nebo bum de lung wa nhtawm, Yerihko mare a sinpraw maga de nga ai Pisga bum pungding de lung wa wu ai. Dai Madu gaw dai yang kaw na shi hpe mungdan ting madun dan wu ai; dai ni gaw Gilead mung kaw nna dingdung maga de nga ai Dan a mare de du hkra;
34:2 Naphtali a lamu ga hte Ehprim, Manashe hte Yuda mung ni hte tsan htum ai sinna maga de na Ka-ang panglai du hkra,
34:3 Yuda mung a dingda daw Zoara mare kaw na namhtan hpun mare ngu ai Yerihko mare hkan nga ai pa layang ni hpe madun dan wu ai.
34:4 Shaloi dai Madu gaw Mawshe hpe, “Abraham, Isak hte Yaku hte hpe ga sadi tawn nna shanhte a amyu matu ni hpe jaw na ngu ndat da ai mungdan gaw dai rai nga ai; dai hpe nang mu mada la ti mung, dai mung de ngai nang hpe rap sa shangun na ni ai n rai,” ngu nna tsun wu ai.
34:5 Dai rai nna dai Madu gaw shi hpe tsun nu ai hte maren, dai Madu a shangun ma kasa Mawshe gaw Moba mung dai shara e si mat sai.
34:6 Dai Madu gaw shi hpe Bet Peora mare hte tawtap ngu na Moba mung na kadit langai mi hta lup makoi da ma ai; rai ti mung, dai ni du hkra shi a lupwa hpe kadai mung hkrak n chye lu nga ai.
34:7 Mawshe si wa yang, shi a asak gaw latsa e hkun ning du nga sai; n-gun lagaw mung n yawm ai sha, shi a myi mung a kaja sha rai nga wu ai.
34:8 Israela amyu masha ni mung shi a matu Moba pa e nhtoi sumshi ya tup sharung shayawt nga ma ai.
34:9 Mawshe a shara hta hkringhtawng dagraw hkam la na matu shi san da nu ai Nun a kasha Yawshu gaw hpaji byeng-ya hte hpring tsup nga wu ai. Israela amyu masha ni Yawshu a ga madat mara nhtawm, dai Madu Mawshe hku nna shanhte hpe jaw da sai hkang da ai ga ni hpe hkan sa shatup nga ma ai.
34:10 Dai Madu hte myi man chyaw ga shaga lu ai Mawshe zawn re ai myihtoi Israela amyu masha ni hta galoi mung n nga yu nga ai.
34:11 Egutu hkawhkam wa kaw na shi a du salang ni hte mungdan ting hta dai Madu Mawshe hpe shangun dat nna galaw shangun ai mauhpa lamik kumla ni zawn kaga myihtoi kadai mung n galaw yu nga ai.
34:12 Israela amyu masha ni yawng a man e Mawshe galaw dan sai hkrit hpa galu kaba ai amu ni hpe kaga myihtoi kadai e mung galaw madun lu nga ai n rai.