Psalms 115
115:1 Yehowa e, anhte hpe n rai, anhte hpe n rai: na a chyeju hte sadi sahka a majaw, Na a amying nsang hpe sha, arawng jaw u.
115:2 “Shanhte a Karai Kasang ya kanang nga malu hka?” nga nna, masha amyu ni, hpa rai tsun na ma ta?
115:3 Anhte a Karai Kasang gaw sumsing lamu e anga nga ai; Shi ra ai hku yawng mayawng shi galaw nga ai.
115:4 Shanhte a sumla ni, aja, gumhpraw, Masha a lata hte galaw ai arai, rai nga malu ai.
115:5 Shanhte n-gup tu, timung, n chye shaga ma ai, Myi tu, timung, n mu lu ma ai.
115:6 Na tu, timung, n na lu ma ai, Ladi tu, timung, n chye manam ma ai.
115:7 Shanhte gaw lata hte n chye jum ma ai, Lagaw hte n chye hkawm ma ai: Shanhte a mayu hte nsen n chye shapraw ma ai.
115:8 Dai ni tawk tawn ai ni hte, Shanhte hpe shamyet shanat ai ni yawng, Shanhte hte maren rai na mara ai.
115:9 Israela e, Yehowa hpe shamyet shanat nga u; Shi gaw, shanhte a karum ai wa hte n-gang rai nga ai.
115:10 Arun a dap e, Yehowa hpe shamyet shanat nga u: Shi gaw shanhte a karum ai wa hte n-gang rai nga ai.
115:11 Yehowa hpe hkrit hkungga ai ni e, Yehowa hpe shamyet shanat nga mu; Shi gaw, shanhte a karum ai wa hte n-gang rai nga ai.
115:12 Yehowa gaw anhte hpe adum nga ai; shi anhte hpe shaman ya mi ai: Shi gaw Israela dap hpe shaman ya nga ai; Arun a dap hpe mung shaman ya nga ai.
115:13 Shi gaw Yehowa hpe hkrit hkungga ai ni, Kaji kaba yawng hpe, shaman ya nga ai.
115:14 Yehowa gaw nanhte hte, nanhte a kashu kasha ni hpe, Law htam wa shangun malit ga.
115:15 Lamu hte aga hpe hpan da ai Yehowa gaw, Nanhte hpe shaman ya myit ga.
115:16 Sumsing lamu gaw, Yehowa a lamu rai nga ai, Ginding aga hpe chyawm gaw, shinggyim masha ni hpe ap ya sai.
115:17 Si mat ai ni hte, katsi katsang re ai shara de, yu hkrat wa ai ni, Yehowa hpe shakawn lu ma ai n rai.
115:18 Anhte chyawm gaw, ya kaw nna, htani htana du hkra, Yehowa hpe shakawn kungdawn nga na ga ai. Halelu-Yah.