Library · kac

Song of Songs 2

2:1 Ngai chyawm gaw, Sharun pa na mari pan, Kadit hkan e tu ai hkalaw pan sha, rai nga nngai. 2:2 Nye nja jan gaw, ju singwum e tu ai hkalaw pan zawn, shayi chyinghkawn ni a ka-ang e, dan nga ai. 2:3 Ngai tsawra ai wa mahtang, maling e tu ai lwi dwi hpun zawn, Brang sek ni a ka-ang e, dan nga ai. Ngai gaw shi a shingnip kata e ngwipyaw let dung nga nna, De a asi gaw nye a n-gup hta dwi nga ai. 2:4 Shi gaw, poi galaw ai nta hta ngai hpe jashawn nna, Nye ntsa na dawnghkawn gaw, sumtsaw sumra rai nga ai. 2:5 Ngai gaw sumtsaw sumra hte machyi nngai majaw, Ngai hpe tsabyi si hte shadaw, lwi dwi si hte shapyaw. 2:6 Shi a pai lata nye a baw npu e tawn nna, Shi a hkra lata ngai hpe ginshum u ga. 2:7 Yerusalem a shayi chyinghkawn ni e, Tsawra ai myit, shi hkrai n pru yang, Dai hpe hkum jasu, hkum jahprang mu yaw, Ngu nna, nam na ashu ashan ni hte chyahkyi ni hpe dum let, Ngai nanhte hpe htet da nngai law. 2:8 Ngai tsawra wa a nsen law! Yu u, shi du ra ai: Bum ni hpe shi gumtawng lai nna, Kawng ni hpe shingtawt lai nga ai. 2:9 Ngai tsawra ai wa gaw, chyahkyi yan shat krang la hte bung nga ai; Yu u, shi gaw anhte a bunghku shinggan de tsap nga ai: Hkuwawt hku mada yu let, Hkinji hku azi yu nga ai. 2:10 Ngai tsawra ai wa shaga nna, ngai hpe tsun ai gaw: Nye a nja jan e, nye tsawm htap ai num e, Rawt nna sa wa su. 2:11 Yu u, nshung ta lai sai, Marang mung hpawng nna lamu san sai. 2:12 Pa hkan e nampan pu sai; U ni kashai ai aten mung, du ra ai: An a ga hta hkrudu tut du ai nsen mung, na lu sai. 2:13 Lakum hpun gaw tsit ai si hpe shamyin nu ai; Tsabyi ru ni mung pu pu nna, Ngwipyaw bat shamawng ma ai. Nye nja jan e, nye tsawm htap ai num e, Rawt nna sa wa su. 2:14 Bum na lungbra ni hte, nhkap hkan e shanu nga ai, Nye a hkrudu e: Na a myi man ngai mu lu n ga, Na a nsen ngai na lu n ga; na a nsen ngwipyaw nga ai; Na a myi man mung, hpraw tsawm nga ai. 2:15 Tsabyi ru ni hpe jahten ai nam gwi ni hte, Nam gwi hkalung ni hpe, an a matu rim la mu: An a tsabyi ru ni gaw apu pu masai, nga ai. 2:16 Ngai tsawra ai wa gaw, nye a rai nga ai, Ngai mung shi a rai nga nngai. Shi gaw hkalaw pan prang e sagu ni hpe shayaw nga ai. 2:17 Ngai tsawra ai wa e, shani nhtoi garai n katsi ai hte, Shingnip shingna garai n hkoi mat yang, Kayin nna, Behtera bum ntsa e nga ai, Chyahkyi hte shat krang la zawn, tai nga u.