Library · lus

1 Kings 11

11:1 Solomona chuan Pharaoa fanu chang lo pawh hnam dang hmeichha tam tak Moab te, Amon te, Edom te, Zidon te, Hit-ho hmeichhiate a hmangaih a; 11:2 chung hnamho chungchang thu chu LALPA'n Israela thlahte hnenah, "Anmahni pawl suh ula, anni pawhin pawl che u suh se: an pathiante lamah in thinlung an hruai kawi ngei dawn si a," tiin alo sawi tawh reng a; chungho chu Solomona chuan hmangaihnain a vuan tlat a. 11:3 Tichuan nupui zasarih, lal fanu a nei a, hmei zathum nen: tin, a nupuite chuan a thinlung an hruai kawisak ta a. 11:4 Tin, heti hi a lo ni ta a, Solomona chu a lo upa hnu chuan, a nupuite chuan pathian dangte lamah a thinlung an hruai kawisak a: tichuan a pa Davida thinlung angin LALPA a Pathian lamah chuan a thinlung chu alo tha famkim ta lo a. 11:5 Solomona chuan Zidon-ho pathiannu Astorethi leh Amon-ho pathian tenawm tak Milkoma chu a lo zui ve ta mai a. 11:6 Tin, Solomona chuan LALPA mithmuhin thil sual alo ti ta a, a pa Davida angin LALPA chu a zui tlat ve ta lo a. 11:7 Chutichuan Solomona chuan Jerusalem bula tlangah Moab-ho pathian tenawm tak Kemosa tan leh, Amona thlahte pahtian tenawm tak Moleka tan hmun sang a lo siam ta a. 11:8 Chutiang bawkin hnam dang a nupui zawng zawng an pathiante hnena inthawia rimtuite hal thinte tan pawh a siamsak a. 11:9 ,10 Chutichuan LALPA Israelte Pathian, a hnena vawi hnih lai inlar a, he thu pathian dangte a zui tur ani lo tih thu lo petu chu a thinlungin a hawisan tak avangin Solomona chungah chuan LALPA thin a lo uur ta a: LALPA'n thu apek chu pawm si hek lo. 11:10 ,9 Chutichuan LALPA Israelte Pathian, a hnena vawi hnih lai inlar a, he thu pathian dangte a zui tur ani lo tih thu lo petu chu a thinlungin a hawisan tak avangin Solomona chungah chuan LALPA thin a lo uur ta a: LALPA'n thu apek chu pawm si hek lo. 11:11 Chuvangin LALPA'n Solomona hnenah chuan, "Hetiang hian i lo awm ta a, ka thuthlungte leh ka thuruatte pawm tura thu ka pek che hi i lo pawmta si lo a, ram hi ka chhuhsak ngei ngei ang chia, i chhiahhlawh ka pe ang. 11:12 Amaherawhchu i pa Davida avangin i dam chhung em chuan ka ti rih lo ang a: nimahsela i fapa zawng ka chhuhsak dawn a ni. 11:13 Ram zawng zawng erawh chu k achhuhsak vek lo ang a; nimahsela ka chhiahhlawh Davida avang leh ka thlan Jerusalem avang hian hna khat chu i fapa ka pe ang," a ti a. 11:14 Tin, LALPA'n Edom mi, Hadada chu Solomona hmelmaah a rawn din chhuak ta a: amah chu Edom rama lal thlah a ni. 11:15 Tin, heti hi a ni a, Davfida Edom rama a awm laia, an mi thahte phum tura sipai hotu Joaba a han kal a, Edom mi mipa fa tawh phawt chu a han thah vek hnu khan, 11:16 (Joaba leh Israel mi zawng zawngte chu thla ruk zet, Edom rama mipa zawng zawng a tihhlum vek hma loh chuan an awm a ni a;) 11:17 Hadada chu a pa chhiahhlawhte zinga Edom mi thenkhatte nen Aigupta rama kal turin an tlan a; Hadada chu naupangte a la ni a. 11:18 Midian ramata an chhuak a, Paran-ah an kal a: tin, Pran atangin mite an hruai a, Aigupta ram, Aigupta ram leh Pharaoa hnen an zuk thleng a; ani chuan in te a lo pe a, ei turte a lo ngaihtuahsak a, ramte a lo pe bawk a. 11:19 Hadada chuan Pharaoa mit a ltung hle mai a, tichuan a nupui ngeia laizawn, lalnu Tahpenesi laizawn chu nupuiah a neihtir a. 11:20 Tin, Tahpenesi laizawn chuan fapa Genubatha a hrinsak a, Tahpenesiin Pharaoa inah a hnute hnek banna a siamsak a: tin, Genubatha chu Pharaoa inah Pharaoa fate zingah chuan a awm ta a. 11:21 Tin, Hadadan Aigupta ram atanga Davida chu a puteho hnenah amuhil ta tih le, sipai hotu Joaba pawh a thi tawh tih a lo hriatin, Hadada chuan Pharaoa hnenah, "Kan rama ka haw theihna'n mi chhuahtir ta che," a ti a. 11:22 Chutichuan Pharaoan a hneah, "Ka hnena i awm hian tlakchham eng nge i neih ni le, ngai teh, chutia in ram lama haw leh i tum tak mai?" a ti a. Tin, ani chuan, "Engmah phei chu nei lo e: nimahsela mi kaltir reng reng rawh khai," a ti a. 11:23 Tin, Pathianin a hmelmaah Eliada fapa Rezona, a pu Hadadezera, Zoba lal hnen ata tlan bo tawh kha a rawn din chhuak leh a: 11:24 Davida'n Zoba khuaa mite a thah khan ani chuan a hnenah mite a kai khawm a, sipai hotuah a lo tang ta a: tin, Damaska khuaah an kal a, chutah chuan an awm a, Damaska khuaha chuan lalah a thu ta a. 11:25 Hadada tihhreawmna belhchhahin Solomona dam chhung zawng, Israelte hmelma a ni fo thin reng a. Israelte a haw hle mai a, Suria ram chungah ro a rel a. 11:26 Tin, Bebata fapa Jeroboama, Zereda khuaa Phraim mi, Solomona chhiahhlawh pawh chuan, (a nu hming chu Zeruii a ni a, hmeithai ani a,_ chu mi pawh chuan lal chungah a kut a lek ve a. 11:27 Lal chunga akut a rawn lek chhan chu hetiang hi a ni: Solomonan Milo a siam a, a pa Davida khua chu a chhe lai te a siam tha a. 11:28 Chu Jeroboama chu mi chak huaisen a ni a: tichuan Solomonan chu tlangval chu mi taima tak nia a hriat avangin Josefa chhungte hnathawh zawng zawng chunga hotuah a siam a. 11:29 Tin, chung lai chuan heti hi a ni a, Jeroboama Jerusalem khua ata a kal chhuak chu Silo mi zawlnei Ahijan kawng lakah a lo hmu a; Ahija chuan puan thar a sin a; an pahnih chauh chuan phulah an awmdun a. 11:30 Tin, Ahija chuan a puan thar sin chu a la a, phel sawm leh phel hnihah apawtthler a, 11:31 Jeroboama hnenah chuan, "Phel sawm hi la rawh khai: LALPA, Israelte Pathianin heti hian a ti a ni: "Ngai teh, ram hi Solomona ka chhuhsak ang a, hnam sawm chu ka pe dawn che a ni: 11:32 (amaherawhchu ka chhiahhlawh Davida avang leh Israel hnam zawng zawng zinga ka thlan khawpui, Jerusalem avang hian hnam khat zawng anei ang chu:) 11:33 anni chuan mi kalsan a, Zidon-ho pathiannu Astarothi te, Moab-ho pathian Kemosa te, Amon-ho thlahte pathian Milkomate an biak avang leh ka mithmuha thil tha ti tur leh ka thuruatte leh ka rorelte hi pawm tura a pa Davida anga ka kawngte an zawh loh avangin. 11:34 Ram pumpui zawng ka chhuhsak lo ang: amaherawhchu ka thuupekte leh ka thuruatte pawmtu, ka thlan, ka chhiahhlawh Davida avangin a dam chhung hchuan lalah ka la awmtir ang: 11:35 nimahsela ram hi a fapa ka chhuhsak ang a, nangmah hi ka pe dawn che a ni, hnam sawmte chu. 11:36 Tin, ka chhiahhlawh Davida'n ka hming awmtirna'na ka thlan khawpui Jerusalem-ah hian ka hmaa khawnvar aneih reng theihna turin hnam khat chu a fapa ka pe ang. 11:37 Nang hi ka ruat ang chia, i duh ang angin ro i rel ang a, Israelte lalah i awm ang. 11:38 Tin, heti hi ani ang a, thu ka pek apiang che i pawm a, ka kawngte i zawh a, ka chhiahhlawh Davida anga ka thuruatte leh ka thupekte zawm tura ka mithmuha thil tha i tih chuan i hnenah ka awm zel ang a, Davida ka din nghehsak ang khan chhungkaw nghet ka dinsak ang chia, Israelte hi ka pe ang che. 11:39 Chuvang chuan Davida thlah chu ka tihreawm dawn ai, amaherawhchu kumkhua zawngin a ni lo ang,' a ti e," tiin. 11:40 Chutichuan Solomona chuan Jeroboama chu thah a tum ta a: nimahsela Jeroboama chu a tho a, Aigupta ramah, Aigupta ram lal Sisaka hnenah a tlan a, Solomona thih hma loh chuan Aigupta ramah a awm ta a. 11:41 Solomona chanchin dangte leh, a thiltih zawng zawng leh a finnate chu Solomona thiltih ziakna buah a chuang a ni lo'm ni? 11:42 Solomonan Israel-ho zawng zawng chunga Jerusalem khuaa ro a rel chhung chu kum sawmli a ni.Tichuan Solomona chu a pute hnenah chuan amuhil a, apa Davida khawpuiah chuan an phum ta a: tin, a fapa Rehoboama chu a aiawhin a lal ta a. 11:43 Tichuan Solomona chu a pute hnenah chuan amuhil a, apa Davida khawpuiah chuan an phum ta a: tin, a fapa Rehoboama chu a aiawhin a lal ta a.