Library · lus

2 Chronicles 10

10:1 Tin, Rehoboama chu Sekem khuaah a kal a; Israel-ho zawng zawng chu Sekem khuaah lala siam turin an kal tawh si a. 10:2 Tin, heti hi a ni a, Nebata fapa Jeroboaman chu mi thu chu a lo hriat chuan (lal Solomona hnen ata a tlan bona Aigupta rama la awm a ni si a) Aigupta ram ata Jeroboama chu a lo haw leh a. 10:3 Mi an tir a, an zu ko a; tichuan Jeroboama leh Israel-ho zawng zawng chu an lo kal a, Rehoboama hnenah chuan, 10:4 "I pa khan kan nghawngkawl a tirit em thin a; chuvangin i pain min chhawr rimna leh a nghawngkawl rit tak kan chunga a nghah hi min tihzansak la, tichuan i rawng kan bawl ang," tiin an sawi a. 10:5 Tin, ani chuan an hnenah, "Ni thum hnuah lo kal leh zawk rawh u," a ti a. Tichuan mipuite chu an kal kiang ta rih a. 10:6 Tin, lal Rehoboama chuan, "Heng mipuite chhanna tur hian rem eng nge min ruatpui dawn le?" tiin a pa Solomona dam laia a bula awm thin upahote chu a rawn a. 10:7 Tin, anni chuan a hnenah, "Heng mipuite hi i khawngaih a, i tihlawm a, an hnena thu tha tak takte i sawi chuan kumkhuain i mite an ni ang," tiin an sawi a. 10:8 Nimahsela upaho remruatpui chu a apwm lo a, ama rualpui tlangvalho, a bula awm thinte chu a rawn ta zawk a. 10:9 An hnenah chuan, "Heng mipuiho, ka hnena, 'I pan kan chunga nghawngkawl a nghah hi min tihzansak rawh,' tia sawitute hi ka chan dan tur rem eng nge mi ruatpui le?" a ti a. 10:10 Tin, a rualpui tlangvalhote chuan a hnenah, "Heng mipuiho, 'I pa khan kan nghawngkawl a tirit em thin a, nang chuan min tihzansak rawh khai,' i hnena titute hnenah chuan hetiang hian ti la, hetiang hian an hnenah sawi ang che, 'Ka pa kawng ai chuan ka zungte hia lian zawk a, 10:11 Ka pa khan nghawngkawl rit tak a lo bahtir che u a, kei chuan in nghawngkawl chu ka belhchhah dawn a sin: ka pan vuaknain a hring thin che u a, kei erawh chuan khawmual- kaikuangin ka hring dawn che u a ni. 10:12 Chutichuan Jeroboama leh mipuiho zawng zawng chu lalin, "Ni thum chinah lo kal leh ang che u," tia a hrilh ang khan a ni thum ni chuan Rehoboama hnenah chuan an va kal a. 10:13 Lal chuan chang takin alo chhang hlawm a, lal Rehoboama chuan upahote remruatpui kha a pawm lo a, 10:14 tlangvalhote remruatpui ang khan, "Ka pan in nghawngkawl a lo tirit a, keiin chu chu ka belhchhah zawk dawn a ni; ka pan vuaknain a lo hring thin che u a, kei erawh chuan khawmualkaikuangin ka hring dawn che u a ni," a ti a. 10:15 Chutichuan lal chuan mipuite thu sawi kha a pawm ta lo va: chu chu Pathian vang a ni, LALPA'n Silo mi Ahija hmanga, Nebata fapa Jeroboama hnena a thu lo sawi tawh kha a tihngheh theihna'n. 10:16 tin, lain an thu a pawm lo tih Israel-ho zawng zawngten an hriatin mipuite chuan, "Davida ah chuan chanvo enge kan neih le" Lesaia fapaah chuan roluah tur kan nei hek lo: Israel mite u, in puan in lamah haw theuh rawh u: David, i chhungkua ngaihtuah mai rawh," tiin lal chu an chhang a. Chutichuan Israel ho zawng zawng chu an puan in lamah ah haw ta a. 10:17 Israela thlah, Judai ram khuaa awmte erawh chu an chungah Rehoboama a lal a. 10:18 Tichuan lal Rehoboama chuan hnathawka rawih luihte hotu Hadorama a tir a; ani chuan Israel-ho zawng zawng chuan lungin an lo deng a, a thi ta a. Tin, lal Rehoboama chu Jerusalem khua a tlan tumin a tawlailirah a chuang ta thuai a.Chutichuan Israel-hote chu Davida chhungte chungah an lo hel ta a ni, tun thleng hian. 10:19 Chutichuan Israel-hote chu Davida chhungte chungah an lo hel ta a ni, tun thleng hian.