Library · lus

2 Chronicles 27

27:1 Jothama chu a lal tantirhin kum sawmhnih leh kum nga mi a ni a, Jerusalem-ah kum sawm leh kum ruk a lal a: a nu hming chu Jerusai, Zadoka fanu a ni. 27:2 Tin, a pa Uzia thiltih ang apiang ti vein LALPA mithmuha thil tha a ti thin a, LALPA biak inah erawh chuan a lut ve lo. Nimahsela mite chuan tha lo takin thil an la ti fo mai a. 27:3 LALPA ina kawngkhar chhakta zawk a siam a, tin, Ophel kulh chungah chuan in tam tak a sa bawk a. 27:4 Tin, Judai tlang ramah khuate a siam a, ramhnuaiah inropui tak tak te, in sangte a sa bawk a. 27:5 Tin, Amona thlahte lal a do a; a hneh a. Tin, Amona thlahte chuan chu mi kum chuan tangka talent za leh buh phur sing leh barli phur singkhat an pe a. Chutiang bawk chuan Amona thlahte chuan a kum hnihna leh a kum thumnaah pawh an pe a. 27:6 Chutichuan Jothama chuan LALPA a Pathian hmaa a kawng a rel fel avangin a lo chak ta a. 27:7 Tichuan Jothama thiltih dang zawng zawng, a ral do zawng zawngte, a awm dan zawng zawngte chu, ngai teh, Israel leh Juda lalte chanchin ziakna buah a chuang a. 27:8 A lal tantirhin kum sawmhnih leh kum nga mi a n a, Jerusalem-ah kum sawm leh kum ruk a lal a.Tin, Jothama chu a pi leh a pute hnenah a muhil a, Davida khawpuiah an phum a: tin, a fapa Ahaza chu a aiah a lal ta a. 27:9 Tin, Jothama chu a pi leh a pute hnenah a muhil a, Davida khawpuiah an phum a: tin, a fapa Ahaza chu a aiah a lal ta a.