Psalms 143
143:1 Aw LALPA, ka tawngtaina hi ngaithla la; khawngaih ka dilnaah hian beng lo chhi la: I rinawmna avang leh i felna avangin mi chang ang che.
143:2 I chhiahhlawh chungah hian rorel suh ang che; I mithmuhah chuan mi nung reng reng thiam chang an awm dawn si lo.
143:3 Dotu chuan ka nunna a tiduhdah si a; Ka nun hi leiah a vaw thlu a: Thi tawh daihte angin, hmin thim takahte mi awmtir a.
143:4 Chuvangin ka thlarau hi ka kawchhungah a chau a; Ka thinlung hi ka kawchhungah a mangang ta a.
143:5 Hmasang nite chu ka hre reng thin a; I thiltih zawng zawngte chu ka ngaihtuah thin a: I kut hnathawhte chu ka chhut thin.
143:6 Ka kutte hi i lamah ka phar thin a: Ka nunna hi, ram chau tak angin, nangmahah a tuihal thin.
143:7 Aw LALPA, mi chhang thuai ang che; ka thlarau a chauh dawn hi: Ka lakah hian i hmai thup suh ang che; Chutilochuan khuarkhuruma chhukte ang maiin ka lo awm dah ang e.
143:8 Zingah chuan i ngilneihna thu mi hriattir ang che; Nang ka ring si thin chia: Ka kalna tur kawng chu mi hriattir ang che; Ka rilru hi i hnenah ka dah tlat si thin a.
143:9 Aw LALPA, mi dotute lakah chuan mi chhanhim ang che: I mi thuhruk turin i hnenah ka lo tlan a ni.
143:10 I duhzawng tih mi zirtir ang che; ka Pathian i ni si a: I thlarau chu a tha a ni; ram dik takah chuan mi hruai ang che.
143:11 Aw LALPA, i hming avangin mi tiharh la: I felna avangin ka nuna hi manganna ata hruai chhuak ang che.I ngilneihna avangin mi dotute chu tiboral la, Ka nuna timangangtu zawng zawng chu tiboral ang che; I chhiahhlawh ka ni si a.
143:12 I ngilneihna avangin mi dotute chu tiboral la, Ka nuna timangangtu zawng zawng chu tiboral ang che; I chhiahhlawh ka ni si a.