Psalms 83
83:1 Aw Pathian, tawng loin awm suh ang che: Aw Pathian, ngawi reng suh la, awm hle hle lul suh ang che.
83:2 Ngai teh, nangmah dotute chu an sa mur mur a: Nangmah hawtute chu an dak hraw hraw a.
83:3 I mite hi vervek takin an phiar a, I mi thuhrukte chungah hian a chhe lamin an inrawn hlawm a.
83:4 "Hawh u, an hnam hloh khawpin i tiboral ang u! Israel-ho hming reng reng hi hriat renga a awm tawh lohna turin," an ti a.
83:5 Thu khat vuain an inrawn a; I chungah a chhe lama ti turin thu an intiam hlawm a.
83:6 Edom-ho leh Ismael-ho puan in te, Moab-ho leh Hagar-ho te;
83:7 Gebal-ho leh Amon-ho leh Amalek-ho te; Philistia-ho tura khuaa awmte nen:
83:8 Asuri-ho pawh an lamah an ta ve; Lota thlahte chu an tanpui a. (Selah)
83:9 Anniho chu Midian-ho chunga i tih ang te, Kison luia Sisera chunga i tih ang te, Jabina chunga i tih angte khan ti ve ang che:
83:10 Chu mite chu Endor khuaah an boral a; Lei atan ekdur ang mai an lo nih tak kha.
83:11 An mi liante chu Oreba leh Zeeba ang khan siam la, A ni, an lal zawng zawngte chu Zebaha leh Zalmuna ang khan siam ang che.
83:12 Chu mite chuan, "Pathian awmnate chu luahsak ang u," an tih kha.
83:13 Aw ka Pathian, anniho chu vaivut vir chung chung ang hian siam ang che; Buh sisawp thli chhem len ur ur ang mai hian.
83:14 Ram kangtu mei ang leh, Tlang kangtu meialh ang hian;
83:15 Anni chu i thlipuiin um la, I thli na takin tihlau ang che.
83:16 Aw LALPA, i hming an zawn theihna'n An hmel chu zahnain tikhat ang che.
83:17 Kumkhuain mualpho leh mangang takin awm se la; A ni, tihzaha awmin boral rawh se:Nangmah chauh hi JEHOVA hming pu, Leilung zawng zawng chunga Chungnungber i nih an hriat theihna'n.
83:18 Nangmah chauh hi JEHOVA hming pu, Leilung zawng zawng chunga Chungnungber i nih an hriat theihna'n.