Psalms 89
89:1 LALPA ngilneihna thute chu kumkhuain hlaah ka sa ang a: Ka kain i rinawmzia chu chhuan zawng zawng thlengin ka hriattir ang,
89:2 "Ngilneihna chu kumkhua atan rem chhohin a awm ang a; I rinawmna chu vanahte ngei khian i tinghet ang," ka ti ta a ni.
89:3 Ka mi thlan hnenah chuan thu ka thlung a, Ka chhiahhlawh Davida hnenah chhia ka chham ta a;
89:4 "I thlahte chu kumkhua atan ka tinghet ang a, I lalthutphah pawh chhuan zawng zawng thlengin ka rem chho ang," tiin (Selah)
89:5 Aw LALPA, vante khian i thilmak tih hi an fak ang a; Mi thianghlimte inkhawmnaah khian i rinawmna hi an fak bawk ang.
89:6 Van dumahte khian LALPA nena tehkhin theih tu nge awm ni? Mi thiltithei tak fate zingah khian LALPA ang,
89:7 Mi thianghlimte inrawn khawmnaah Pathian hlauhawm tak, A kiang vela mi zawng zawng aiai tih ber tur chu, tu nge awm ni?
89:8 Aw LALPA sipaihote Pathian, Aw JAA, nang anga mi chak tu nge awm? I rinawmna chu i velah a awm si a.
89:9 Nang chuan tuifinriat chapona chungah ro i rel thin a: A tuifawn invawrh laite chu i tireh thin.
89:10 Nang chuan Rahab chu ral thah angin i tikeh sawm a; Nangmah dotute chu i ban tha chakin i tidarh ta a.
89:11 Vante khi nangma ta ani a, lei pawh hi nangma ta a ni: Khawvel leh a chhunga thil awm zawng zawng hi nangma din a ni.
89:12 Chhim leh hmar chu nangma siam ani a: Tabor leh Hermon chu i hming avangin hlimin an zai thin.
89:13 Nang chuan ban thiltithei tak i nei a: I kut chu a chak a, i kut dinglam chu chawimawiin a awm a.
89:14 Felna leh rorelna fel chu i lalthutphah nghahchahn ani a: Ngilneihna leh thutak chu i hmaah an kal thin.
89:15 Thawm hlimawm hre thin hnam chu an eng a thawl e: Aw LALPA, anni chu i hmel engah an awm thin.
89:16 I hming avangin nilengin an hlim thin a: I felna avangin chawimawiin an awm thin
89:17 Nang chu an chakna ropuina i ni si a" I duhsakna avangin kan ki hi chawimawiin an awm thin
89:18 Kan phaw hi LALPA ta ani si a; Kan lal hi Israel-ho Mi Thianghlim ta a ni.
89:19 Chu mi lai chuan i mi thianghlimte hnenah inlarnaah thu i sawi a, Mi pakhat chak tak chungah chuan tanpuina ka nghat a; Mi pakhat, mie zinga thlan chhuah chu ka chawimawi ta a.
89:20 Ka chhiahhlawh Davida chu ka chhar a; Ka hriak thianghlim chuan amah chu ka thih ta a:
89:21 Ka kut hi a hnenah tihnghehin a awm ang a; Ka ban hian ani chu a tichak ang.
89:22 hmelma chuan a ngam lo ang a; Mi sual chuan a tlawm hek lo ang,
89:23 Amah dotute chu ahmaah ka vaw thlu ang a, Amah hawtute chu ka sawisa ang.
89:24 Ani hnenah erawh chuan ka rinawmna leh ka ngilneihna chu a awm ang a; Ka hming avangin a ki chu chawimawiin a awm bawk ang.
89:25 A kut chu tuifinriatah chuan ka nghahtir ang a, A kut ding lam chu luipuiahte chuan.
89:26 Ani chuan, 'Nang chu ka pa, Ka Pathian, ka inchhandamna lungpui i ni,' tiin, mi au vang,
89:27 Tin, keiin ani chu fatirah ka siam ang a, Leia lalte zingah chngnungberah ka siam ang,
89:28 Ka ngilneihna chu kumkhuain a tan ka vawn thatsak ang a, Ka thuthlun chu a hnenah a awm nghet ang.
89:29 A chi thlahte chu kumkhuain ka awmtir ang a, A lalthutphah ch van awm chhung ni chenin ka awmtir bawk ang.
89:30 A fate chuan ka dan hi an hawisan a, Ka rorelnate anga an awm loh a,
89:31 Ka thuruat an bawhchiat a, Ka thupekte an vawn that loh chuan,
89:32 An bawhchhiatnate chu tiangin ka rawn kan ang a, An khawlohnate chu vuakin ka rawn kan ang.
89:33 Nimahsela, ka ngilneihna chu a hnen ata ka laksak vek lo ang a, Ka rinawmna chu data chan ka phal hek lo ang.
89:34 Ka thuthlung chu ka bawhchhe lo ang a, Ka hmuia thu chhuak chu ka tidanglam hek lo ang.
89:35 Vawi khat ka thianghlimna chhalin chhia ka chham a; Davida hnenah dawt ka saiw lo ang;
89:36 A chi thlahte chu kumkhuain an awm ang a, A lalthutphah chu ka hmaah ni angin a awm bawk ang.
89:37 Thla angin kumkhua aan tihnghehin a awm ang a, Van duma hretu rinawm ang khian," i ti a. (Selah)
89:38 Nimahsela nang chuan i thlauthlain i duh lo a, I hriak thiha chungah chuan i thin a rim ta a.
89:39 I chhiahhlawh thuthlun chu i ten a: A lallukhum chu leia paih thla hialin i titlawm ta a.
89:40 A dai zawng zawng chu i titlu a; A kulhbingte chu i tichhe ta a.
89:41 Kawngka kal apiangin a thil an laksak thin a: A vela mite sawi chhiatin a lo awm ta a.
89:42 Amah dotue kut ding lam chu i chawimawi a; A hmelma zawng zawngte chu i tihlim ta a.
89:43 A ni, a khandaih hma chu i beng per a, Ani chu inbeihnaah chuan i din nghehtir ta lo a.
89:44 A enna chu i tihrehsak a, A lalthuphah chu leiah i paih thla ta a.
89:45 A tlangval lai nite chu i tihtawisak a; Ani chu mualphonain i khuh ta si a. (Selah)
89:46 Aw LALPA, i biru kumkhua dawn em ni? Eng chen nge i thinrim chu mei anga a alh dawn le?
89:47 Aw, ka hun hi a tawi turzia hre reng la: Mihring fate zawng zawng hi i va siam engmahlo em!
89:48 Eng mi nge thih ni hmel hmu loa nung a, Seol kut atanga a nunna chhanhim tur chu? (Selah)
89:49 Lalpa, i hman lai khawngaihna i rinawmnaa Davida hnena chhechhama i tiamte kha, Khawiahnge a awm tak?
89:50 Lalpa, i chhiahhlawhte an sawi chhiatna hre reng ang che; Hnam chak takte zawng zawng sawichhiatna ka angchhunga ka tuar thinzia hi;
89:51 Aw LALPA, nangmah dotue sawichhiatna, I hriak thiha hniakte sawichhiatna chu.LALPA chu kumkhuain fakin awm rawh se. Amen, Amen.
89:52 LALPA chu kumkhuain fakin awm rawh se. Amen, Amen.