Library · lus

Matthew 16

16:1 Tin, Pharisaite leh Saddukaite an lo kal a, amah fiahna'n van ata chhinchhiahna anmahni entir turin an dil a. 16:2 Nimahsela ani chuan, an hnenah, Tlai lam a lo nihin 'Khua a tha dawn a ni ang, kawl a sen em mai,' in ti thin a. 16:3 Tin, zingah chuan 'Vawiin chu khua a chhe dawn a ni ang, kawl a sen a, khua a dur em mai,' in ti thin a. Van awmzia in hre fiahthiam si a, nimahsela hun chhinchhiahnate hi in hre fiah thei lo. 16:4 Chhuan sual tak leh uire hmang takte chuan chhinchhiahna an zawng a, nimahsela, Jona chhinchhiahna chauh lo chu an hnenah chhinchhiahna reng reng pek a ni lo ang, a ti a, a chhang a. Tin, anmahni a kalsan a, a kal ta daih a. 16:5 Tin, zirtirte chu ral leh lam an thlen chuan chhang an lo ken theihnghilh a. 16:6 Tin, Isua'n an hnenah, Pharisaite leh Saddukaite dawidim lakah chuan inveng u la, fimkhur rawh u, a ti a. 16:7 Tin, anni chuan, Chhang kan keng hauh lo, tiin an inngaihtuah a. 16:8 Tin, Isua'n chu chu a hria a, Rin tlemte u, engati nge chhang in neih loh avanga in inngaihtuah ni? 16:9 Tunah pawh in rilruin in la hre lo fo maw? Mi sangnga chhangper pangaa hrai leh in bawmrang ruh khah zat kha, in hre reng lo'm ni? 16:10 Mi sangli chhangper pasariha hraia in bawm ruh khah zat pawh kha? 16:11 Chhang thu in hnenah ka sawi lo tih engtizia nge in hriat loh? Pharisaite leh Saddukaite dawidim lakah erawh chuan fimkhur rawh u, a ti a. 16:12 Chu veleh chhang dawidim lakah fimkhur turin a tir lo a, Pharisaite leh Saddukaite zirtirna laka fimkhur turin anmahni a tir zawk tih an lo hre ta a. 16:13 Tin, Isua chu Philipa Kaisari bial chu a lo thlen chuan a zirtirte hnenah Mite'n Mihring Fapa hi tu nge a ni an tih? tiin a zawt a. 16:14 Tin, anni chuan, Thenkhatin, 'Baptistu Johana a ni,' an ti a; thenkhatin, 'Elija a ni,' an ti; thenkhatin, 'Jeremia emaw zawlnei tua emaw a ni,' an ti, an ti a. 16:15 Ani chuan an hnenah, A nih leh, nangni'n tu nge a ni mi tih? a ti a. 16:16 Tin, Simon Petera'n, Krista, Pathian nung Fapa chu i ni, a ti a, a chhang a. 16:17 Tin, Isua'n a hnenah, Simon Bar-Jona, i eng a thawl e; tisa leh thisen in a hriattir che a ni si lo a, ka pa vana miin a hriattir zawk che a ni. 16:18 Tin, nang Petera i ni tih ka hrilh bawk a che; he lungpui chungah hian ka kohhranho ka rem chho ang a, Mitthi Khaw kulh kawngkharte chuan chu chu an ngam lo ang. 16:19 Van ram chabite ka pe ang chia, lei chungah engpawh i phuar apiang vanah phuar a ni ang a; lei chungah engpawh i phelh apiang vanah phelh a ni ang, a ti a, a chhang a. 16:20 Chumi zawhah Krista a ni tih tumah hrilh lo turin zirtirte chu a ti tlat a. 16:21 Chu mi a chinah chuan Isua'n Jerusalem khuaa a kal turzia te, upate, puithiam lalte, lehkhaziaktute laka thil tam tak a tuar turzia te, tihhluma a awm turzia te, ni thum nia kaihthawha a awm turziate chu a zirtirhote a hriattir tan ta a. 16:22 Tin, Petera chuan ani chu a hruai hrang a, Lalpa, Pathianin khawngaih che rawh se; chung chu i chungah a thleng tawp lo ang, tiin a zilh ta a. 16:23 Ani erawh chu a hawi a, Petera hnenah chuan, Setan, ka hnungah kal rawh; ka tan tlukna i ni e; Pathian thilte ngaituah loin mihring thilte i ngaihtuah zawk a nih hi, a ti a. 16:24 Tin, Isua'n a zirtirte hnenah, Tupawhin mi zui a duh chuan mahni hreawm pawisa loin, a kraws puin mi zui rawh se. 16:25 Tupawh a nun humhim duh apiangin a chan ang a; tupawh keimah avanga a nun chan apiangin a humhim ang. 16:26 Miin khawvel hi a pumin nei se la, a nun chan si se la, a tan eng nge sawt ang? A nih loh leh, miin a nun aiah eng nge a pek ang? 16:27 Mihring Fapa hi a vantirhkohte nen, a Pa ropuinaa inthuamin a lo kal dawn si a; chu mi hunah chuan mi tin an thiltih ang zelin a rul theuh ang.Tih tak meuhin ka ti a che u., heta dingho a thente hi, Mihring Fapa a rama lo kal an hmuh hma chu thihna tem tawp lo tur an awm, a ti a. 16:28 Tih tak meuhin ka ti a che u., heta dingho a thente hi, Mihring Fapa a rama lo kal an hmuh hma chu thihna tem tawp lo tur an awm, a ti a.